بۇل تاراپتاعى تۇتىنۋشىلاردىڭ وكپە-نازىن ساراپتاپ قاراساڭىز, ەلەكتروندى ساۋدا, تۇرمىستىق قىزمەت كورسەتۋ, قوعامدىق تاماقتاندىرۋ سالالارىنا قاتىستى شاعىم ايتۋشىلاردىڭ قاراسى كۇرت كوبەيگەن. تۇتىنۋشىلار قۇقىن قورعاۋ دەپارتامەنتى ءاربىر ارىز-شاعىمعا مۇقيات قاراپ, تالداۋ جاساۋدا. 680 ءوتىنىشتىڭ 447-ءسى جەدەل قارالىپ, تۇتىنۋشىلارعا 21 ملن تەڭگەدەن اسا قارجى قايتارىلعان. العان زاتى كوڭىلدەن شىقپاي وپىنعان 111 ادام ساپاسىز تاۋارلارىن ايىرباستاپ الۋ مۇمكىندىگىنە يە بولىپتى. بۇقارالىق اقپارات قۇرالدارىندا بۇل تاراپتاعى الاياقتىقتان اباي بولۋ كەرەكتىگى قانشاما رەت ايتىلسا دا, وڭاي جەم بولىپ جۇرگەندەردىڭ قاتارى ازايار ەمەس.
– كەيىنگى ۋاقىتتا تۇتىنۋشىلاردىڭ ارىز-شاعىمدارى كوپتەپ كەلىپ جاتىر, – دەيدى تۇتىنۋشىلار قۇقىعىن قورعاۋ دەپارتامەنتىنىڭ باسشىسى سۆەتلانا زانەگينا, – ولاردىڭ دەنى ساپاسىز ءونىم توڭىرەگىندە بولىپ كەلەدى. ونىڭ ۇستىنە ساۋدالانعان تاۋارلاردىڭ ۋاقىتىندا جەتكىزىلمەيتىندىگى بار. ساۋدا بۇزىلعاننان كەيىن كەيبىرەۋلەردىڭ قولما-قول اقشاسىن ۋاقىتىندا قايتارماي, دىڭكەسىن قۇرتادى. جىل باسىنان بەرى دەپارتامەنتكە ينتەرنەت دۇكەندەردىڭ اقشالاي قاراجاتتى قايتارماۋىنا وراي 44 تۇتىنۋشى شاعىم ايتىپ كەلدى.
ارينە, زامان تالابىنا ساي ينتەرنەت دۇكەندەردىڭ ارتىقشىلىعى دا بار. ايتالىق, ۋاقىت ۇنەمدەۋ, باعانى باقىلاۋ جانە سالىستىرىپ قاراۋ ءتارىزدى جايلار. شىنىن ايتۋ كەرەك, كوپ جاعدايدا ينتەرنەت دۇكەندەردەگى تاۋار قۇنى كادۋىلگى دۇكەندەرگە قاراعاندا ءبىرشاما ارزان ءارى تۇتىنۋشىعا ءتيىمدى اكتسيالاردى دا ءجيى وتكىزەدى.
كەمشىلىك تە از ەمەس. جالعان سايتتاردا كوزدىڭ جاۋىن الاتىن نەبىر تاۋار سۋرەتتەرى سىڭسىپ تۇر. ساتۋشى الىستا بولعاندىقتان كوزبەن كورىپ, قولمەن ۇستاي المايسىڭ. سوندىقتان كەي تۇستا اڭقاۋ جۇرتتىڭ الاياقتارعا وڭاي جەم بولىپ جاتاتىندىعى دا كەزدەسەدى. ولار الدىن الا 100 پايىز اقشا تولەۋىن سۇرايدى. كەيىن ۇستاتپاي كەتۋى دە مۇمكىن. ءسويتىپ, جاڭا زاماننىڭ جەتىستىگىن وزدەرىنىڭ ارام پيعىلدارىنا پايدالانۋدى ماقسات ەتكەن الاياقتار تۇتىنۋشىنىڭ تاۋار ءۇشىن تولەگەن اقشاسىن الىپ العاننان كەيىن الەۋمەتتىك جەلىدەگى اككاۋنتىن ءوشىرىپ نەمەسە بۇعاتتاپ تاستايدى. مۇنداي الاياقتاردى تابۋ تۇتىنۋشىعا ءتىپتى دە مۇمكىن ەمەس.
قولدانىستاعى زاڭنامادا ينتەرنەت دۇكەندەرى مەن ولاردىڭ تىنىس-تىرشىلىگىن قامتيتىن ءبىر عانا باپ كوزدەلگەن. سوندىقتان ونلاين ساتۋشىلار زاڭنامانىڭ ولقىلىعىن پايدالانىپ, تۇتىنۋشىلار قۇقىعىن بۇزاتىن جاعدايلار ءجيى كەزدەسەدى. دەمەك ولقى ءتۇسىپ جاتقان وسى ءبىر تۇستى رەتتەپ الساق, ءتامام جۇرت وڭاي ولجاعا كەنەلىپ جۇرگەن الاياقتارعا جەم بولماس ەدى.
كوكشەتاۋ
