ماركانى «قازپوشتا» اق بۇۇ-نىڭ قازاقستانداعى وكىلدىگى جانە قازاقستان رەسپۋبليكاسىنىڭ سىرتقى ىستەر مينيسترلىگىمەن بىرلەسىپ شىعارعان.
ء«بىزدىڭ كومپانيا قازاقستاننىڭ بۇۇ-عا مۇشەلىگىنىڭ 30 جىلدىعى سياقتى ايتۋلى وقيعانىڭ قۇرمەتىنە ەستەلىك پوشتا ماركاسىن اينالىمعا شىعارعانىنا قۋانىشتى. وسى ماركا ەلىمىزدىڭ الەمدىك قاۋىمداستىقتاعى ءرولىنىڭ تاماشا دالەلى بولادى دەپ ويلايمىن. بيىل «ەستەلىك جانە مەرەيتويلىق كۇندەر» سەرياسى اياسىندا قازپوشتا قازاقستاننىڭ يۋنەسكو, اوسشك سياقتى حالىقارالىق ۇيىمدارعا مۇشەلىگىنىڭ 30 جىلدىعىنا جانە قازاقستاننىڭ ماتەريالدىق ەمەس مۇرانى ساقتاۋ تۋرالى كونۆەنتسياعا قوسىلۋىنىڭ 10 جىلدىعىنا ارنالعان ماركالار شىعاردى. سونىمەن قاتار ەلىمىزدە پوشتالىق اينالىمدا بۇۇ-نىڭ 50 جانە 60 جىلدىعىنا وراي شىعارىلعان ماركالار قولدانىلادى», دەدى «قازپوشتا» اق باسقارما ءتورايىمى اسەل جاناسوۆا.
ولشەمى 26 ح 29,6 مم پوشتا ماركاسى 10 000 دانا تارالىممەن شىعارىلدى. ماركا پاراعى 8 ماركادان تۇرادى. پاراق ولشەمى 135 x 70 مم. پوشتا ماركاسىنىڭ نومينالى – 700 تەڭگە. ماركالار ۋلتراكۇلگىن بوياۋمەن جانە لاكپەن قورعالعان. سۋرەتشىسى – ەلنارا باينازاروۆا.
بۇۇ-نىڭ قازاقستانداعى باسشىسى ميكاەلا فريبەرگ-ستوري: «ماركا كەسكىندەمەسىنىڭ نەگىزى رەتىندە دومبىرانىڭ تاڭدالۋى كەزدەيسوق ەمەس, ويتكەنى قازاقتىڭ ءداستۇرلى دومبىرا كۇيى يۋنەسكو ماتەريالدىق ەمەس مادەني مۇرانىڭ رەپرەزەنتاتيۆتى تىزىمىنە ەنگىزىلگەن. ءبىز قازاقستاننىڭ وسى وتىز جىل ىشىندە تۇراقتى دامۋ جونىندەگى ءىس-ارەكەتىن قۇپتايمىز. ەستەلىك پوشتا ماركاسىنىڭ شىعارىلىمى قازاقستاننىڭ سىرتقى ساياساتى تاريحىنداعى ماڭىزدى بەلەس جانە تۇراقتى دامۋ ماقساتتارىنا بەيىمدىگى تۋرالى قوعام حاباردارلىعىن ارتتىرۋدىڭ بەلگىسى», دەپ اتاپ ءوتتى.
اتاپ وتىلگەندەي, بۇۇ ەلدىڭ بولاشاققا باعىتتالعان دامۋ كۇن ءتارتىبىن جانە ۇكىمەتتىڭ تۇراقتى دامۋعا دەگەن ۇمتىلىسىن جاقسىراق قولداۋ ءۇشىن قازاقستانعا قولداۋىن كەڭەيتۋدە.
«قازاقستانداعى بۇۇ جۇيەسى - قۇندى, ادام قۇقىقتارىنا نەگىزدەلگەن جانە سەنىمدى سەرىكتەس بولىپ قالا بەرەدى. ول قازاقستانداعى بارلىق سەرىكتەستەرگە ەڭ وزەكتى ساياسي كەڭەستەر, تەحنيكالىق كومەك جانە جاھاندىق جەلىلەرگە قول جەتكىزۋگە باعىتتالعان», دەپ قوستى ۇيىمنىڭ كەڭسەسى.
