مادەنيەت جانە ونەر قايراتكەرلەرىنەن باسقا ۇلتتىق سپورت سپورتشىلارى – پالۋاندار مەن شاباندوزدار, سونىڭ ىشىندە تۇركيادا وتكەن IV دۇنيەجۇزىلىك كوشپەندىلەر ويىندارىنىڭ جەڭىمپازدارى اتالىپ ءوتتى. مەملەكەت باسشىسىنىڭ تىكەلەي تاپسىرماسى بويىنشا مەملەكەتتىك ماراپاتتى مادەنيەت جانە سپورت ءمينيسترى داۋرەن اباەۆ تابىس ەتتى.
ء«بىز بۇل كۇنگە دامۋدىڭ بىرىڭعاي داڭعىل جولىمەن جەتتىك دەپ ايتا المايمىز. تار جول تايعاق كەشۋلەر بولدى. سوندىقتان دا مەملەكەت باسشىسىنىڭ ۇلتتىق مەرەكە مارتەبەسىن ءدال وسى كۇنگە قايتارۋ شەشىمى ادىلدىكتىڭ سالتانات قۇرۋ اكتىسى دەپ ساناۋعا بولادى», دەپ اتاپ ءوتتى داۋرەن اباەۆ ماراپاتتاۋ راسىمىندە.
سونداي-اق شىعارماشىلىق وداقتار توراعاسى, اكتەرلەر مەن رەجيسسەرلەر, اقىن - جازۋشىلار, كومپوزيتورلار, تەاتر ارتيستەرى, سۋرەتشىلەر, انيماتسيا رەجيسسەرلەرى, مۋزەي قىزمەتكەرلەرى جانە تاعى باسقالار قازاقستان رەسپۋبليكاسى پرەزيدەنتىنىڭ العىس حاتىمەن جانە قۇرمەت گراموتاسىمەن ماراپاتتالدى.
«مادەنيەت جانە سپورت مينيسترلىگى شىعارماشىلىق وداقتارمەن ىنتىماقتاستىقتى جانداندىرۋعا نيەتتى. ءبىز اركەز ۇتىمدى ۇسىنىستارعا اشىقپىز جانە قىزىقتى جانە كەلەشەگى زور جوبالاردى قولداۋعا دايىنبىز. وسىعان دەيىن سىزدەرمەن بىرنەشە رەت كەزدەسۋ وتكىزدىك, وزەكتى ماسەلەلەردى تالقىلادىق جانە شەشىمدەردى بىرلەسىپ ازىرلەپ جاتىرمىز. مينيسترلىك وسى باعىتتاعى جۇمىستى جالعاستىرادى», دەدى مينيستر د.اباەۆ.
ايتا كەتەيىك, سونداي-اق شىعارماشىلىق وداقتارمەن جانە قاۋىمداستىقتارمەن ءوزارا ءىس-قيمىل جانە ىنتىماقتاستىق جونىندەگى كەڭەس وتىرىسى ءوتتى.
