26-28 قازان ارالىعىندا «قازمەديا ورتالىعىندا» وتەتىن باسقوسۋدا وتاندىق جانە شەتەلدىك جەتەكشى مەديامەنەدجەرلەر, مەملەكەتتىك قۇرىلىمداردىڭ وكىلدەرى, اقپاراتتىق پلاتفورمالاردىڭ باسشىلارى, جۋرناليستەر, بلوگەرلەر جانە تاۋەلسىز ساراپشىلار تاجىريبە الماسىپ, ءتۇرلى تالقىلاۋلار جاسايدى.
150-گە جۋىق وتاندىق جانە حالىقارالىق سپيكەر قاتىسادى. 11 ەلدەن مەديا سالاسىنىڭ ساراپشىلارى كەلىپ, پىكىر الماسىپ, پايدالى اقپاراتتار ايتادى.
جىلدىڭ باستى تاقىرىبى – «جاڭا ءداۋىر – جاڭا مەديا». Meta – Astana Media Week-ءتىڭ جەكە تاقىرىبى بولادى. كومپانيا وكىلدەرى مەتاعالام تۋرالى جان-جاقتى اقپارات بەرىپ, الەۋمەتتىك جەلىدەگى ترەندتەر تاقىرىبىندا ءسوز قوزعايدى.
«سول سەكىلدى TikTok كومپانياسىنىڭ ماماندارى مەديا اپتالىققا بەلسەنە قاتىسىپ, ءوز وي-پىكىرلەرىن ورتاعا سالىپ, پايدالى اقپارات بەرەدى دەپ وتىرمىز. مەديا اپتالىقتىڭ ءبىرىنشى كۇنى, پانەلدىك سەسسيا اياسىندا قاتىسۋشىلار ازەربايجان, وزبەكستان جانە قىرعىزستان سياقتى بۇقارالىق اقپارات قۇرالدارىنىڭ وكىلدەرىمەن ورتاق سىن-قاتەرلەرگە ورتاق جاۋاپتاردى قالاي تابۋعا بولاتىنىن تالقىلايدى», دەپ جازدى اقپارات جانە قوعامدىق دامۋ ءمينيسترى دارحان قىدىرالى الەۋمەتتىك جەلىدە.
ەكىنشى كۇن «قازاقستانداعى جارناما مەديا-نارىعى: قازىرگى جاعدايى» تاقىرىبىنداعى پىكىرتالاس الاڭىنان باستالادى. قازاقستاننىڭ بارلىق وڭىرىنەن كەلگەن مەديا سالانىڭ وكىلدەرى وڭىرلىك باق فورۋمىندا جينالىپ, ايماقتاعى مەديا سالانىڭ ترەندتەرىن, پروبلەمالىق ماسەلەلەرىن جانە ولاردىڭ دامۋ جولدارىن ءسوز ەتەدى.
ءۇشىنشى كۇنى ءباسپاسوز حاتشىلارى ءۇشىن بولەك سەسسيا جۇمىسى قاراستىرىلعان. Media Week ءداستۇرلى تۇردە ءباسپاسوز, راديو, ينتەرنەت-جۋرناليستيكا سالاسىنداعى ۇزدىك جەتىستىكتەرى ءۇشىن «ۇركەر» سىيلىعىنىڭ سالتاناتتى راسىمىمەن اياقتالادى.
