مەحيكو قالاسىندا ۇيىمداستىرىلعان بوكس كەشىندە اۋەسقوي بوكستان 2017 جىلعى الەم بىرىنشىلىگىنىڭ كۇمىس جۇلدەگەرى ءابىلحان امانقۇل مەن ازيا چەمپيونى بەك نۇرماعانبەت شارشى الاڭعا كوتەرىلدى. رينگكە ءبىرىنشى بولىپ شىققان بەك جەرگىلىكتى بوكسشى لۋچانو اراۋحومەن (6-5-3, 3 كو) جۇدىرىقتاستى. سۋپەر ورتا سالماقتا جوسپارلانعان سەگىز راۋندتىق ايقاستىڭ ەكىنشى راۋندىندا جەرلەسىمىز قارسىلاسىن تەحنيكالىق نوكاۋتپەن ۇتتى. بۇل – نۇرماعانبەتتىڭ كاسىپقوي بوكستاعى سەگىزىنشى جەڭىسى. جەرلەسىمىز بىلتىر WBA International تۇجىرىمى بويىنشا سۋپەر ورتا سالماقتاعى تيتۋلدى جەڭىپ العان بولاتىن.
ال كاسىپقوي بوكستاعى «قازاقتىڭ سالماعىنا» اينالىپ بارا جاتقان ورتا سالماق دارەجەسىندە جەكپە-جەك وتكىزگەن ءا.امانقۇل دا مەكسيكالىق بوكسشى يەاسسون پاچەكو سەرۆانتەسپەن (6-1, 3 كو) جۇدىرىقتاسىپ, قارسىلاسىن ءوز جانكۇيەرلەرى الدىندا سۇلاتىپ سالدى. بۇل – وتانداسىمىزدىڭ كاسىپقوي بوكستاعى ەكىنشى جەڭىسى.
