ب.ريموۆا اتىنداعى جەتىسۋ وبلىستىق تەاترىنىڭ عيماراتىنا جينالعان كوپشىلىك الدىمەن مەملەكەتتىك تۋدىڭ اكەلۋىنە كۋا بولىپ, گيمندى تىك تۇرىپ ورىندادى. ودان سوڭ مەرەكەلىك شاراعا كەلگەن كوپشىلىكتى قۇتتىقتاعان ءوڭىر باسشىسى پرەزيدەنت قاسىم-جومارت توقاەۆتىڭ باستاماسىمەن ۇلتتىق مەرەكە مارتەبەسىن العان رەسپۋبليكا كۇنىنىڭ ماڭىزىنا توقتالىپ, ەگەمەندىك تۋرالى دەكلاراتسيانىڭ ۇلت تاريحىنداعى ورنىن ايشىقتادى.
«مەملەكەت باسشىسى قاسىم-جومارت كەمەل ۇلى توقاەۆ ەلىمىزدىڭ باستى مەرەكەسى رەتىندە رەسپۋبليكا كۇنىن قايتا قالپىنا كەلتىرۋدى ۇسىنعان بولاتىن. بۇل باستاما قوعام تاراپىنان قىزۋ قولداۋ تاپتى. ەگەمەندىك تۋرالى دەكلاراتسيا قابىلدانعان 1990 جىلعى 25 قازاندا تاۋەلسىزدىگىمىزدىڭ العىشارتى جاسالدى, بەتكە الار باعىتىمىز ايقىندالدى. بۇل كۇن ءبىز ءۇشىن سونىسىمەن قۇندى. قازاقستان – ءبىزدىڭ ءومىر ءسۇرىپ وتىرعان ورتاق وتانىمىز. سوندىقتان ونىڭ تاعدىرى, بۇگىنى مەن بولاشاعى ەلدىڭ ءاربىر ازاماتىنا تىكەلەي قاتىستى», دەدى ب.يساباەۆ.
مەرەكەلىك قۇتتىقتاۋ سوزدەن كەيىن وبلىس اكىمى ءوڭىردىڭ دامۋىنا زور ۇلەس قوسقان بىرقاتار جەتىسۋلىق ازاماتتى «قۇرمەت», «ەڭبەك داڭقى» ءىىى دارەجەلى وردەندەرىمەن, «ەرەن ەڭبەگى ءۇشىن», «شاپاعات» مەدالدارىمەن, قازاقستان رەسپۋبليكاسىنىڭ قۇرمەت گراموتاسىمەن ماراپاتتاپ, «قازاقستاننىڭ ەڭبەك سىڭىرگەن قايراتكەرى», «جەتىسۋدىڭ قۇرمەتتى ازاماتى» اتاقتارىن بەردى. وسى رەتتە «قۇرمەت» وردەنىن العان ەسكەلدى اۋدانىنداعى «چەركاشينا» شارۋا قوجالىعىنىڭ جەتەكشىسى زينايدا چەركاشينا دا ءوز لەبىزىن جەتكىزدى.
«ەسكەلدى اۋدانى – اگرارلى ايماق. وسى وڭىردە ەكى مارتە سوتسياليستىك ەڭبەك ەرى نۇرمولدا الدابەرگەنوۆ پەن باسقا دا 19 ەڭبەك ەرى شىققان. ءبىز سول ەرلەردىڭ جولىن لايىقتى جالعاستىرىپ كەلەمىز. مەملەكەت باسشىسىنىڭ اگرارلىق سالانى دامىتۋ تۋرالى تاپسىرماسىن ورىنداۋعا بەلسەنە اتسالىسامىز. بۇگىنگى ماراپات تەك مەنىكى عانا ەمەس, جەرلەستەرىممەن بىرگە جاساعان جۇمىسىمىزدىڭ ورتاق ناتيجەسى دەپ بىلەمىن», دەدى ز.چەركاشينا.
رەسپۋبليكا كۇنىنىڭ قۇرمەتىنە وراي ماراپاتتالعان جانداردى «قازاقستاننىڭ ەڭبەك سىڭىرگەن قايراتكەرى» اتاعىن العان اقىن ايتاقىن بۇلعاقوۆ, «جەتىسۋ وبلىسىنىڭ قۇرمەتتى ازاماتى» اتاعىن العان ەڭبەك ارداگەرى, كسرو «قۇرمەت بەلگىسى», «حالىقتار دوستىعى» جانە «قۇرمەت», «پاراسات» وردەندەرىنىڭ يەگەرى اسىلمۇرات تۇرعانبەكوۆ قۇتتىقتاپ, جۇرەكجاردى تىلەگىن ارنادى.
سالتاناتتى ءىس-شارا سوڭى جەتىسۋ وبلىستىق فيلارمونياسىنىڭ ونەرپازدارى دايىنداعان كونتسەرتتىك باعدارلاماعا ۇلاستى.
جەتىسۋ وبلىسى
