بۇل مەرەكەلىك داتا كىتاپحانالاردىڭ جۇمىسىن جانداندىرىپ, سالا ماماندارىنىڭ بەدەلىن ارتتىرۋ ماقساتىندا مادەنيەت جانە سپورت مينيسترلىگىنىڭ باستاماسىمەن بەكىتىلگەن ەدى. اتالعان مەرەكەگە وراي ەل استاناسىندا القالى جيىن ءوتىپ, وعان مادەنيەت جانە سپورت ءمينيسترى داۋرەن اباەۆ قاتىستى. سالتاناتتى ءىس-شارا اياسىندا كىتاپحاناشىلارعا «مادەنيەت سالاسىنىڭ ۇزدىگى» توسبەلگىسى تاپسىرىلىپ, قۇرمەت گراموتاسىمەن جانە العىس حاتتارمەن ماراپاتتالدى.
«ەلىمىزدەگى 70 ميلليون دانا كىتاپ قورىنا قامقورلىق تانىتىپ جۇرگەن بارشا كىتاپحاناشىلاردى كاسىبي مەرەكەمەن قۇتتىقتايمىن. مەنىڭ ويىمشا, كىتاپحانا ءىسىنىڭ قاجەتتىلىگىنە جانە كىتاپحانا ءىسىنىڭ كۇردەلىلىگىنە ەشكىم كۇمان كەلتىرمەيدى. دەگەنمەن قوعام اراسىندا «كىتاپحانالاردىڭ عاسىرى اياقتالدى, ولاردىڭ قىزمەتى قاعاز تاسىعىشتار داۋىرىندەگى اتاۆيزم رەتىندە ەسكىرەدى, ينتەرنەت پەن تسيفرلىق ترانسفورماتسيا ارقاسىندا قوعامدىق كىتاپحانانىڭ ورنىن ءبىر عانا سمارتفون باسا الادى» دەگەن سىندى تەرىس پىكىرلەر بار. مۇنداي پىكىرمەن تۇبەگەيلى كەلىسپەيمىن. جالپى, تەحنولوگياعا كوزسىز تابىنۋ مەن تسيفرعا دەگەن سوقىر سەنىم ءبىزدىڭ ۇرپاقتىڭ ساناسىن قۇندىلىقتارعا تەرەڭ بويلاۋعا مۇمكىندىك بەرمەي, اداستىرادى دەپ سانايمىن», دەدى داۋرەن اباەۆ.
ءمينيستردىڭ ايتۋىنشا, قازىرگى زامانعى كوپشىلىك كىتاپحانانىڭ فۋنكتسيونالدىعى كىتاپتاردى ساقتاۋ, جۇيەلەۋ, تسيفرلاندىرۋ جانە وقىرماندارعا ۇسىنۋ شەڭبەرىنەن الدەقايدا كوپ باعىتتى قامتيدى. بۇل رەتتە اتالعان ۆەدومستۆو كىتاپحانالار جۇمىسىنىڭ جاڭا قاعيداتتارى مەن ستاندارتتارىن كەزەڭ-كەزەڭىمەن ەنگىزۋمەن اينالىسۋعا دايىن.
«كىتاپحانا – بۇل بىلىمگە ءۇڭىلىپ, سانالى تۇردە, جايلى ورتادا وقۋعا كەلەتىن عيباداتحانا. ءبىزدىڭ كۇندەلىكتى كۇيبەڭ تىرلىك قاربالاستان ارىلىپ, رۋحانيات الەمىنە ەنۋگە مۇمكىندىك تۋعىزاتىن قاستەرلى ورىن. سوندىقتان كىتاپحانا ءىسىن قولدايتىن بولامىز. بۇل ءبىزدىڭ بەرىك ۇستانىمىمىز», دەپ تۇيىندەدى مينيستر.
ايتا كەتەيىك, بۇگىندە ەلىمىزدە 11 مىڭنان اسا كىتاپحانا جۇمىس ىستەيدى. ونىڭ 7 مىڭنان استامى ءبىلىم بەرۋ جۇيەسىنە قاراستى بولسا, 3 مىڭنان استامى مادەنيەت جانە سپورت سالاسىنا قارايدى.
