باسقانى قايدام, مەن بۇعان سەنەمىن. العاش نوتانى كىم ويلاپ تاپقانى تۋراسىندا اركىم ءارتۇرلى ايتادى. نوتانى ويلاپ تاپپاسا دا الەم بويىنشا مۋزىكا تۋرالى العاش عىلىمي ەڭبەك جازعان ءال-فارابي ءبىزدىڭ توپىراقتا تۋعانىن قايدا قوياسىز؟! دەمەك اۋزىمىزدى تولتىرىپ اڭگىمە ايتا الامىز. سول ەڭبەگىندە فارابي ء«بىزدىڭ اينالامىزداعى دىبىستىڭ ءبارى كەمەلىنە كەلمەگەن. ناعىز كەمەلىنە جەتكەن دىبىس – ادامنىڭ داۋىسى» دەگەن تۇجىرىمعا كەلىپتى. «الەمنىڭ ۇستازى» اتانعان ءابۋناسىر بۇل جەردە «باقىرعان قۇر ايقايدى» (اباي) ايتىپ تۇرماعانى بەلگىلى. سول كەمەل داۋىستىڭ بۇگىنگى ءبىزدىڭ زامانداعى يەسى ديماش قۇدايبەرگەن دەمەي كورىڭىز. وسىدان ونداعان عاسىر بۇرىن وتىراردا تۋىپ, الەمدە تۇڭعىش رەت مۋزىكالىق عىلىمي ەڭبەك جازعان ءال-فارابي دۇنيە ەسىگىن قازاق توپىراعىندا اشقان, سول وتىراردا ءشامشى تۋعان, ەندەشە, الەم ساحناسىن ديماشتىڭ انمەن الديلەۋى دە زاڭدىلىق. كەشەگى كوشپەلىلەر ءداۋىرىن ەسەپكە الماعاندا, بۇگىندە دۇنيەگە قازاق ۇلتى نە بەرە الدى دەسە, بىردەن ديماشتىڭ ەسىمى اتالاتىنى ءسوزسىز. وسى ۋاقىت ولشەمى تۇرعىسىنان قاراعانداعى كوزقاراسىمىز وسىلاي دەيدى. ءححى عاسىردىڭ باسىنداعى كەمەل داۋىس – ديماش قۇدايبەرگەننىڭ داۋىسى دەر ەدىك.
كۇنى كەشە عانا, وسىدان ەكى اپتاداي بۇرىن عانا ايداي الەمگە اتاقتى دجەكي چاننىڭ كىتاپ شىعارعانى تۋرالى اقپارات تارادى. حح ءھام ءححى عاسىردىڭ اسا تانىمال ءارتىسى كىتابىنىڭ مۇقاباسىنا ديماش قۇدايبەرگەننىڭ ەسىمىن جازىپتى. ونى كورگەن ءانشى ديماش Instagram پاراقشاسىندا العىس ءبىلدىردى: «سۇيىكتى اكتەرىمدى جاڭا كىتابىنىڭ جارىق كورۋىمەن شىن جۇرەكتەن قۇتتىقتاعىم كەلەدى. وسىدان 6 جىل بۇرىن دۇنيە جۇزىندەگى ادامدار مەن تۋرالى ەندى عانا ءبىلىپ جاتقاندا ماعان قولداۋ ءبىلدىرىپ, باعىت-باعدار كورسەتكەن العاشقى تانىمال تۇلعا بولدىڭىز. ءسىزدىڭ «اۆانگارد» فيلمىڭىزدە باستى ءاندى ورىنداپ, سىزبەن بىرگە جۇمىس ىستەۋگە مۇمكىندىك العانىم مەنىڭ شىعارماشىلىعىمداعى ەڭ جاقسى ساتتەردىڭ ءبىرى بولىپ قالا بەرمەك. سىيلىعىڭىز ءۇشىن جانە مەنىڭ قىتايشا ەسىمىم (ديماسي) ءسىزدىڭ كىتابىڭىزدىڭ مۇقاباسىندا پايدا بولعانى ءۇشىن العىسىم شەكسىز. مەن ءۇشىن بۇل – ۇلكەن مارتەبە», دەپ جازدى ديماش قۇدايبەرگەن. بۇل, ارينە, بۇگىن قاتارداعى اقپارات بولعانىمەن, قازاق ۇلتىنا دەگەن قۇرمەتتى زورى. سول ارقىلى ەلدىڭ دە اتىن شىعارارى ءسوزسىز. قىتايلار بۇعان دەيىن شىڭعىس حان تۋرالى كينو تۇسىرگەنىن بىلەمىز. ەندى ديماشتىڭ اينالاسىندا جۇرگەنىنىڭ ءوزى ءبىراز جايدى اڭعارتادى.
قازىر ديماشتىڭ داۋىسىنا الەمدەگى وركەنيەتتى ەلدەردىڭ ءبارى ءتانتى. بىلايشا ايتقاندا, ءححى عاسىرداعى قازاق ءۇنىن تىڭداپ وتىر. ءتىپتى ونىڭ داۋىسىن تىڭداي-تىڭداي اۋرۋىنان ايىعىپ تۇرعاندار تۋرالى دەرەكتەر بار. تازا, پەرىشتە جۇرەكتىڭ ءۇنى ەكىنشى جۇرەككە جەتكەنى بىلاي تۇرسىن, ەم بولىپ تا قوناتىنىنا ءشۇبا كەلتىرۋگە بولمايدى ەكەن عوي. «سوڭىنان قالماي, سۇيىسپەنشىلىگى مەن ماحابباتىن ارناپ جۇرەتىن الەمنىڭ تۇكپىر-تۇكپىرىنەن كەلگەن تىڭدارماندارى, و توبا, قازاقشا ءان سالىپ تۇر. ءتىلى توسەلگەن, ءسوزى انىق, ءوزى جاتتىققان. ديماشتىڭ ءتىلى – قازاق ءتىلى بولعانى ءۇشىن باقىتتى, قۋانىشتى كەيىپتە بار بولمىسىمەن بەرىلە انگە قوسىلادى» دەپ جازدى ايگۇل احانبايقىزى وتكەندە ديماشتىڭ الماتىداعى كونتسەرتىنەن. سول كونتسەرتىندە ءانشى ء«بىر اسپاننىڭ تاريحى» اتتى جاڭا تۋىندىسىمەن الەم جۇرتشىلىعىن بەيبىتشىلىككە شاقىردى. «جەر بەتىنىڭ حالقى ۇلتقا, دىنگە, ناسىلگە بولىنەدى, بىراق ءبىز ءبارىمىز – ءبىر پلانەتانىڭ بالالارىمىز جانە ءبىر اسپاننىڭ استىندا ءومىر سۇرەمىز. ءومىر – ەڭ باعالى قۇندىلىق. بىردە-ءبىر قاسيەتتى كىتاپ ادامداردى قىرىپ-جويۋعا شاقىرمايدى. ءبىز دوستاسۋدى ۇيرەنۋىمىز كەرەك, ءبىردى-ەكىلى ادام ءۇشىن ميلليونداعان بالالار جاپا شەگىپ جاتىر. بىرلىك بولسىن الەمدە, جەر شارىنىڭ بولاشاعى ءبىزدىڭ قولىمىزدا» دەپ دۇنيە جۇزىندەگى ادامزات بالاسىن تاتۋلىققا ۇندەدى. مىناداي الماعايىپ زاماندا بۇل ءسوز باسقانىڭ ەمەس, قازاق ۇلتى پەرزەنتىنىڭ اۋزىنان شىققانى بۇگىنگى وقيعا بولسا, ەرتەڭگى تاريح. وسى ورايدا ديماشتىڭ قازاقستانداعى كونتسەرتىنە تىڭداۋشىلار 68 ەلدەن كەلگەنىن ەسكەرگەن ءجون. الەمدىك ساياساتكەرلەر نە بيلەۋشىلەر التى قۇرلىققا تارالاتىن اقپارات قۇرالدارىنان وسىلاي ءۇن قاتسا ەل ەلەڭ ەتپەۋى مۇمكىن. ءتىپتى ونداي سوزدەردىڭ ساياسي استارىن تۇسىنگەندە الگىلەردىڭ پيعىلى بەلگىلى بولىپ قالا بەرەتىن ادەتى عوي. ال ديماشتىڭ مىنا سوزدەرى – ساياساتتان بيىك, پاراساتقا جۋىق جۇرەكتىڭ ءۇنى. جۇرەك بولعاندا قانداي, كەۋدەسىندەگى جۇدىرىقتاي عانا ءبىر ۋىس سول ەتكە جاھاندى سىيدىرعان قۇدايدىڭ حيكمەتى ول. ايتپەسە ۇنىنە التى قۇرلىق اۋزىن اشپاس ەدى.
كاليفورنيا شتاتىنىڭ (اقش) سەكسەنگە اياق باسقان سيلۆيا ساندوۆال اتتى تۇرعىنى ديماشقا مايكل دجەكسوننىڭ پلاكاتىن سىيلاعانىن بىلەمىز. بۇل پلاكاتتى كەزىندە سيلۆياعا مايكل قولتاڭباسى مەن ۋاقىتىن قويىپ, ءوزى سىيعا تارتقان. جانە ونى رامكاسىنان الىپ شىعىپ سيلۆياعا بەرىپ جاتقاندا, ءانشى بايقاماي شەتىن جىرتىپ الادى. سيلۆيا دجەكسوننىڭ كۋميرى بولعان جاس كەزىندە, كەيىن ديماشتى كورگەندە پلاكاتتى سوعان بەرۋدى ۇيعارىپ, اقىرى جولىعىپ, تابىستايدى عوي. ءبىر عاجابى, مايكل سيلۆياعا پلاكاتتى بەرگەندەگى داتا – ديماشتىڭ تۋعان كۇنى, ايى, جىلى بولىپ شىعادى. عاجاپتى كورمەيسىز بە؟ جولاۋشىنىڭ ءارى قاراي جول جۇرۋىنە رۇقسات رەتىندە بيلەت جىرتىپ بەرگەندەي, بۇل دا ديماشتىڭ انشىلىك ونەرىنە مايكل دجەكسوننىڭ قولىمەن بەرىلگەن قۇدايدىڭ جولداماسى ىسپەتتى. ول ديماش امەريكاعا كونتسەرتپەن بارعاندا ءوزى ىزدەپ تاپتى يەسىن. باسقا قيسىنعا كەلمەيدى. مەن وسى حيكمەتكە سەنەمىن! ال ءسىز ءوزىڭىز بىلەسىز...
