ويلى وقىرمانعا جول تارتقان جاڭا جيناقتاردا شىعىستانۋشىنىڭ تاريحي دەرەكتەردى تۇپنۇسقادان پايدالانىپ, اراب جىلناماشىلارىنىڭ شەجىرەلىك جازبالارى مەن باتىس وريەنتاليستەرىنىڭ تۇجىرىمدارىنان مول مالىمەت كەلتىرگەن. اسىرەسە بالا كۇنىندە قىپشاق دالاسىنان تۇتقىنعا الىنىپ, جات جەردە ەرەن ەرلىگىمەن قۇلدىقتان قايراتكەرلىككە كوتەرىلگەن بايبارىس سۇلتاننىڭ تاعدىرى مەن باتىرلىعى, قايسارلىعى, اقىلدىلىعى, مىرزالىعى باسىنان كەشكەن قىزىقتى وقيعالارمەن شەبەر جازىلعان. الەمنىڭ جەتى كەرەمەتىنىڭ ءبىرى پيراميدالار ۇستىندە ماملۇكتەردىڭ كيىزۇي تىككەنى جونىندەگى تىڭ مالىمەتكە دە قانىعاسىز. سونداي-اق «ەر قارۋى – بەس قارۋ» اتتى تىركەستىڭ استارىندا بابالارىمىزدىڭ جەكە قارۋ ءتۇرىن قالاي قولدانعانىن ماملۇكتەردىڭ اسكەري تراكتاتتارى مەن قازاق اۋىز ادەبيەتى ۇلگىلەرىندە ساقتالعان ماتەريالدار نەگىزىندە باياندايدى.
جيىندا بەلگىلى عالىم, قالامگەر, پارلامەنت ءماجىلىسىنىڭ دەپۋتاتى ساۋىتبەك ابدراحمانوۆ اۆتوردىڭ ىزدەنىمپازدىعى مەن بايبارىستانۋداعى ەڭبەگىنە زور باعا بەرىپ: «بۇل جاعىنان كەلگەندە ءسىزدىڭ الدىڭىزعا تۇسەتىن مامان جوق. ءسىز سۇلتاننىڭ ەسىمى «بەيبارىس» ەمەس «بايبارىس» ەكەنىن عىلىمي تۇرعىدان دالەلدەپ بەردىڭىز», دەسە پارلامەنت ءماجىلىسىنىڭ دەپۋتاتى دارحان مىڭباي زەردەلى زەرتتەۋشىنىڭ بىرەۋدىڭ جازعانىن اۋدارىپ ەمەس, تۇپنۇسقامەن تىكەلەي جۇمىس ىستەيتىنىن اتاپ ءوتتى. ال قوعام قايراتكەرى سارسەنباي ەڭسەگەنوۆ اۆتوردىڭ بيىل مامىر ايىندا اتىراۋ جۇرتشىلىعىمەن كەزدەسىپ, ول جاقتان ۇلكەن اسەرمەن ورالعانىن تىلگە تيەك ەتتى. سونىمەن قاتار باسقا دا زيالى ازاماتتار ارابتانۋشىنىڭ ىرگەلى عىلىمي ەڭبەكتەرىنە توقتالىپ, وي-پىكىرلەرىن ءبىلدىردى.
مازمۇندى ءىس-شارا سوڭىندا قايرات ساكي جاڭا كىتاپقا ەنگەن دۇنيەلەرى تۋرالى ءسوز قوزعاپ, الداعى جىلى سۇلتان بايبارىستىڭ تۋعانىنا 800 جىل تولاتىنىن ايتىپ, جينالعان قاۋىمنىڭ پاراساتتى پىكىرى مەن جىلى لەبىزىنە ريزاشىلىعىن جەتكىزدى.
