سالتاناتتى شارا اياسىندا «ۋاقىت كاپسۋلاسىنا» ەستەلىك جازبا قالدىرىلدى, جيىنعا تاريحشىلار, ارحەولوگتار, قوعام قايراتكەرلەرى جانە قازبا جۇمىستارىن مەڭگەرۋگە نيەتتى جاس ماماندار قاتىستى.
«بوزوق» ۇلتتىق پاركى استانانىڭ تۋريستىك برەندى ءارى ماڭدايالدى سيمۆولى, ەلوردا تۇرعىندارى مەن قوناقتارىنىڭ مادەني دەمالىس ورنىنا اينالادى, ىشكى جانە حالىقارالىق ءتۋريزمنىڭ ءوسۋىن قامتاماسىز ەتەدى.
«بوزوقتىڭ ەجەلگى قالاشىعى ءبىزدىڭ حالقىمىز ءۇشىن ۇلكەن تاريحي جانە قاسيەتتى قۇندىلىققا يە. بۇل جەردە ۇلتتىق ساياباق قۇرۋداعى ماقسات – تاريحي-مادەني مۇرانىڭ باي قاباتىن ساقتاۋ جانە ونىمەن ۇندەس بولۋ, ونى قالىڭ جۇرتقا كورسەتىپ, تانىمال ەتۋ. بولاشاقتا بۇل اۋماق ۇلى دالا تاريحىن بەينەلەيتىن كەشەندى ارحەولوگيالىق ساياباققا, ەلوردامىزدىڭ تۇرعىندارىن عانا ەمەس, سونىمەن قاتار قازاقستان مەن الەمنىڭ تۇپكىر-تۇپكىرىنەن كەلگەن تۋريستەردى تارتاتىن ورتالىققا اينالادى», دەدى مادەنيەت جانە سپورت ءمينيسترى داۋرەن اباەۆ.
جوبا قۇرىلىسى عالىمداردىڭ قاداعالاۋىمەن 2025 جىلعا دەيىن جالعاسادى. ۇلتتىق پارك قالاناتىن ورىندا ماماندار 20 جىل بويى زەرتتەۋ جۇمىستارىن جۇرگىزگەن.
ء«بىز بۇگىن قازاقستاننىڭ قازىرگى استاناسىندا ەجەلگى ۋاقىتتا ادامدار ءومىر سۇرگەنىن عىلىمي نەگىزدە ايتا الامىز. بۇل تۋرالى 1998 جىلى بوزوق قالاشىعىن اشقان ەسىمى الەمگە تانىمال ارحەولوگ كەمەل اقىشەۆتىڭ عىلىمي تۇجىرىمدامالارىنىڭ ارقاسىندا ءبىلىپ وتىرمىز, ەجەلگى شاھاردىڭ قيراندىلارى بۇزىقتى كولىنىڭ شىعىس جاعالاۋىنان تابىلعان. وسى 20 جىل ىشىندە عالىمدار بۇل ايماققا قازبا جانە زەرتتەۋ جۇمىستارىن جۇرگىزىپ, اۋقىمدى ىستەر اتقاردى. مۇندا تابىلعان ءاربىر جادىگەر وسى اۋماقتىڭ باي مادەنيەتى بار بولعانىن دالەلدەيدى», دەدى «بوزوق» مەملەكەتتىك تاريحي-مادەني مۋزەي-قورىعىنىڭ ديرەكتورى ساۋلە بۋرباەۆا.
