الدىمەن فالكاو, سودان كەيىن لارا

وسىدان ءبىر اي بۇرىن عانا WBA پرەزيدەنتى حيلبەرتو حەسۋس مەندوسا WBA Super چەمپيونى گولوۆكين مەن بەلدىككە مىندەتتى ۇمىتكەر لاراعا بوكس كەشىن ۇيىمداستىرۋعا 30 كۇن ۋاقىت بەرگەن بولاتىن. تاراپتار 23 قازانعا دەيىن كەلىسسوز جۇر­گىزىپ, جەكپە-جەك وتكىزەتىنىن نەمەسە گولوۆكيننىڭ بەلدىكتەن باس تارتاتىنى تۋرالى ورتاق مامىلەگە كەلۋلەرى ءتيىس ەدى. الاي­دا ەكى بوكسشىعا بەرىلگەن ۋاقىت اياقتالماي جاتىپ, جوق جەردەن ىسكە داريل پيپلز ارالاسا كەتتى.

بوكس تۋرالى جازاتىن امە­ريكالىق BoxingScene باسى­لى­مىنىڭ مالىمەتىنشە, داريل پيپلز WBA باس­شىلىعىمەن كەزدەسۋ وت­كىزىپ, گولوۆكيندى ءبىرىنشى لا­را­مەن ەمەس, فالكاومەن جۇ­دى­رىقتاستىرۋعا كوندىرگەن. ءسويتىپ, ەكى ۇيىم باسشىلىعى گولوۆ­كين vs فالكاو جۇبىنىڭ جەڭىم­پازىن ەريسلاندي لارامەن جەكپە-جەك وتكىزۋگە مىندەتتەۋگە كەلىسكەن. ازىرگە ءۇش بوكسشىنىڭ ۇشەۋى دە بۇل ماسەلە تۋرالى پىكىر بىلدىرگەن جوق.

دەگەنمەن ماماندار گو­لوۆ­كين IBF بەلبەۋىنەن جانە برازيليالىق بوكسشىمەن جەك­پە-جەك وتكىزۋدەن باس تار­تۋى مۇمكىن ەكەنىن ايتىپ وتىر. ويت­­كەنى فالكاونىڭ ءىسىن جۇر­گىزەتىن پروموۋتەر بوب ارۋم (Top Rank) قازاقستاندىق بوكسشى كەلىسىم بەرەتىندەي گونورار تولەي المايدى دەپ ەسەپتەيدى. مۇنى IBF باسشىلىعى دا ءبىلىپ وتىر. سوندىقتان IBF ەگەر گو­لوۆكين بەلدىكتەن باس تارتاتىن بولسا, وندا فالكاونى ورتا سالماقتىڭ رەيتينگىندە ەكىنشى ورىندا تۇرعان اۋستراليالىق مايكل زەرافامەن (30-4, 19 كو) كەزدەستىرۋدى كوزدەيدى.

بوكس ساراپشىلارى گولوۆ­كين كەلەسى جەكپە-جەگىن كۋبا­لىق بوكسشىمەن وتكىزۋ ىقتي­مالدىعى جوعارى ەكەنىن ايتىپ وتىر. جانكۇيەرلەردىڭ ەسىندە بولسا, وسىدان 6-7 جىل بۇرىن لارا گولوۆكينمەن جەكپە-جەك وتكىزۋگە نيەتتى ەكەنىن بىلدىر­گەنىمەن, كەلىسسوزگە كەلگەندە ءتۇرلى سىلتاۋ ايتىپ, وتانداسىمىزبەن كەزدەسۋدەن قاشىپ ءجۇردى. ەندى ەكى بوكسشىنى WBA ۇيىمى جۇدىرىقتاسۋعا مىندەت­تەگەن سوڭ, قوس تاراپ تا جۇدىرىقتاسۋدان باس تارت­پايتىن سىڭايلى. ونىڭ ۇستىنە گو­لوۆكين ءدال قازىرگى جاع­داي­دا لارانىڭ پروموۋتەرى ەل حەيموننىڭ (Premier Boxing Champions) كەز كەلگەن ۇسىنىسىن قابىلداي الادى. ويت­كەنى جەرلەسىمىز قازىر ءوز بي, ءوزى قوجا. ياعني ەشقانداي پروموۋتەرلىك كومپانيامەن دە, جەكپە-جەكتەرىن اقىلى تۇردە كورسەتەتىن ەشقانداي تەلەارنالارمەن دە كەلىسىمشارتى جوق.

بۇعان دەيىن قارسىلاس تاڭ­داۋدا تارشىلىق كورمەگەن گولوۆكين 40 جاسقا كەلگەندە تىعىرىققا تىرەلدى. ەندىگى باستى سۇراق – وتانداسىمىز قارسىلاس تاڭداي ما, الدە اقشانى تاڭداي ما؟ راس, گەننادي فال­كاوعا قاراعاندا لارامەن جۇدى­رىق­تاسسا, مول قارجىعا كەنە­لەتىنى جاسىرىن ەمەس.