اقىن, دراماتۋرگ بايانعالي ءالىمجان جۇرگىزگەن ءىس-شاراعا حالىقارالىق الاش سىيلىعىنىڭ يەگەرى, اقىن سەرىك تۇرعىنبەك, جۋرناليست, قوعام قايراتكەرى جانبولات اۋپباەۆ, مەملەكەتتىك سىيلىقتىڭ يەگەرى, جازۋشى روزا مۇقانوۆا, «استانا اقشامى» گازەتىنىڭ باس رەداكتورى, جۋرناليست ەركىن قىدىر, تاعى باسقا زيالى قاۋىم وكىلدەرى قاتىستى. قاتىسۋشىلار قالامگەردىڭ سوڭىندا قالعان شىعارماشىلىق مۇرالارى مەن اسىل قاسيەتتەرى تۋرالى تىلگە تيەك ەتتى. سونداي-اق جيىن بارىسىندا اقىننىڭ «عيبراتتى عۇمىر» اتتى ەستەلىكتەر كىتابى مەن «ۆەسنا دۋشي موەي» اتتى ورىس تىلىنە اۋدارىلعان ولەڭدەر جيناعىنىڭ تۇساۋى كەسىلدى.
اۋەزوۆتىڭ الدىن كورىپ, ءدارىسىن تىڭداعان تۇلعانى اقمولا, استانانىڭ ابىزى دەپ تەككە اتاماسا كەرەك. ۋنيۆەرسيتەتتە ديپلومدىق جۇمىسى «اباي جولىنىڭ كوركەمدىك ەرەكشەلىگىنە» بايلانىستى بولىپ, زاڭعار جازۋشىدان باعىت-باعدار الىپ, اقىل-كەڭەسىن تىڭداعانىنىڭ ءوزى ءبىر تاريح. ول تۋرالى دەرەكتەرگە بايانعالي ءالىمجانوۆ جاقسى توقتالدى.
نۇرعوجا ورازدىڭ العاشقى جيناعى 1964 جىلى «تۇڭعىش كىتاپ» اتاۋىمەن شىعىپتى. بۇعان جالعاس «كىم تابادى؟», «شۇعىلا», «كوڭىل كوكتەمى», «تىڭ تۇلەگى», «قىراندار ۇياسى», «تىڭ ىرعاقتارى», «وت كەشكەن بالالىق», ء«ورىمتالدار», «سارىارقا سىرلارى», «ماڭگىلىك ماحاببات», ء«داۋىر دوداسى», «تالقاندالعان تاريحات», «قاراكۇيىك», «اي-مارال» سياقتى پوەزيا, پروزا, پۋبليتسيستيكالىق بىرنەشە كىتابى جارىق كورگەن.
بۇل كىسىنىڭ شىعارماشىلىعىنا عافۋ قايىربەكوۆ, تۇمانباي مولداعاليەۆ, راقىمجان قوشقارباەۆ, ءسابيت دوسانوۆ, ادەبيەت سىنشىسى باقىت ساربالاەۆ توقتالىپ, جىلى لەبىز بىلدىرگەنى ايتىلادى. ال تاۋەلسىزدىك جىلدارى جازىلعان «قاراكۇيىك» رومانىنا پروفەسسور تۇرسىنبەك كاكىشەۆ ارنايى توقتالىپ, وڭ باعاسىن بەردى.
ەگەمەندىك جىلدارى ەل ەڭسەسىن كوتەرىپ, ازاتتىق رۋحىن جاڭعىرتۋعا ۇلەس قوسقان قالامگەردىڭ ەڭبەگى جەكە توقتالۋدى قاجەت ەتەدى دەسەك, قاتەلەسپەيمىز. و باستا الاش ارىستارى اشىپ باستاعان «سارىارقا» جۋرنالىنىڭ عۇمىرى كەلتەسىنەن قيىلعانى تاريحتان بەلگىلى. اتالعان جۋرنالدىڭ ونەگەسىن جالعاستىرۋعا كىرىسكەن نۇرعوجا وراز قازاقستان ازاتتىق العان بويدا «جاڭا سارىارقا» جۋرنالىن شىعارىپ, ۇلت ۇپايىن تۇگەندەۋگە ۇلەس قوستى. باسىلىم تۋرالى كەزىندە ءابىش كەكىلباي ۇلى «مەن وسى كەزدە «سارىارقا» جۋرنالىنىڭ كوپتەگەن سانىن وقىپ ۇلگەردىم. وتە قىزىق باسىلىم. سارىارقا ايماعىنداعى ادەبيەتشىلەرىمىزدىڭ باسىن قوسىپ, وسى ولكەدەگى بۇرىن قالتارىستا قالىپ كەلگەن كوپتەگەن تاريحي جايتتى, وقيعانى, وتكەن زاماننىڭ قايراتكەرلەرىن, ولاردىڭ حالىقتىڭ زەردەسىندە قالعان مۇرالارىن تىرىلتۋدە وتە ءتيىمدى قىزمەت ىستەپ جاتىر ەكەن», دەپ جازدى.
ۇلت رۋحانياتى ءۇشىن تەر توككەن قالامگەردىڭ ەسىمى ەلىمەن بىرگە جاساي بەرەدى, ەندەشە.
