«اقيقاتتىڭ الداسپانى, نامىستىڭ ناركەسكەنى اتانعان ارداقتى شەراعا سانالى عۇمىرىن ۇلت رۋحانياتىنىڭ دامۋىنا ارناعان قارىمدى قالامگەر, قايراتكەر تۇلعا ەدى.
ءسوز زەرگەرى شەرحان مۇرتازا جۋرناليستيكادا تۇتاس ءبىر بۋىندى تاربيەلەپ, تالانتتارعا جول اشقان, وزىندىك مەكتەبىن قالىپتاستىرعان قازاق ءباسپاسوزىنىڭ ماۋەلى بايتەرەگى بولدى. ابىرويلى ازامات رەتىندە بيىك مىنبەرلەردە ەلدىك ماسەلەلەردى كوتەرىپ, ۇلت مۇددەسى جولىندا ايانباي كۇرەستى.
جازۋشىنىڭ قالامىنان تۋعان قۇندى تۋىندىلار ۋاقىتپەن بىرگە جاساپ, وسكەلەڭ ۇرپاقتىڭ جادىندا جاڭعىرا بەرەرى انىق. ونىڭ قازاق رۋحانياتىنداعى ورنى مەن جارقىن بەينەسى ەشقاشان ۇمىتىلمايدى», دەلىنگەن پرەزيدەنتتىڭ قۇتتىقتاۋ حاتىندا.
اۋليەاتا وڭىرىندە جىل باسىنان بەرى دارابوز قالامگەردىڭ 90 جىلدىعى اياسىنداعى ءىس-شارالار جۇيەلى تۇردە ءوتىپ كەلەدى. وسىناۋ ءىس-شارالاردىڭ قورىتىندىسى ىسپەتتى بۇگىنگى ءدۇبىرلى جيىنعا ەلىمىزدىڭ ءار قيىرىنان مارتەبەلى مەيماندار مەن شەراعاڭنىڭ «شەكپەنىنەن شىققان» شاكىرتتەرى كەلدى.
القالى جيىندا بەلگىلى اقىن, مەملەكەتتىك سىيلىقتىڭ لاۋرەاتى نۇرلان ورازالين ءسوز الىپ, قالامگەردىڭ ادەبيەت الەمىندەگى ورنى, كىسىلىك كەلبەتى, ازاماتتىق بولمىسى تۋرالى تولعاندى. ول ءوز سوزىندە اقيقاتتىڭ الداسپانىنا اينالعان شەراعانىڭ ءوزى كەتكەنىمەن, ءسوزى ولمەيتىنىن ايتتى.
حالىق قاھارمانى باقىتجان ەرتاەۆ, مەملەكەتتىك سىيلىقتىڭ لاۋرەاتى, ايتۋلى اقىن اقۇشتاپ باقتىگەرەەۆا, مەملەكەت جانە قوعام قايراتكەرى امالبەك تشانوۆ, بەلگىلى عالىم جانعارا دادەباەۆ تۇلعا تۋرالى ەستەلىكتەرىمەن ءبولىسىپ, شەراعا جۇلدىزى كوكتە ماڭگى سونبەيتىنىن اتاپ ءوتتى.
بۇدان سوڭ تورقالى تويعا جينالعان جۇرتشىلىق «شەرحانتانىم: قازىرگى قازاق ادەبيەتى مەن قازاق ءباسپاسوزىنىڭ دامۋ تەندەنتسيالارى» اتتى عىلىمي-تاجىريبەلىك كونفەرەنتسيادا باس قوستى.
جيىندى – پارلامەنت ءماجىلىسىنىڭ دەپۋتاتى مەيرامبەك تولەپبەرگەن جۇرگىزىپ وتىردى.
باسقوسۋعا مەملەكەت جانە قوعام قايراتكەرلەرى, عالىمدار, جوعارى وقۋ ورىندارىنىڭ پروفەسسورلارى مەن وقىتۋشىلارى, زيالى قاۋىم وكىلدەرى قاتىستى.
الدىمەن جيىنعا قاتىسۋشىلاردى جامبىل وبلىسىنىڭ اكىمى نۇرجان نۇرجىگىتوۆ قۇتتىقتاپ, ءىس-شارانىڭ ماڭىزدىلىعى مەن تۇلعانىڭ ونەگەسى تۋرالى ايتتى.
«بيىل ەلىمىز داڭقتى جەرلەسىمىز, حالىق جازۋشىسى, قازاق جۋرناليستيكاسىنىڭ كورنەكتى وكىلى شەرحان مۇرتازانىڭ 90 جىلدىق مەرەيتويىن اتاپ وتۋدە.
«كونە تاراز» تاريحي-مادەني كەشەنىندە ورنالاسقان «رۋحانيات جانە تاريحتانۋ» ورتالىعى, ءباسپاسوز ءۇيى, ءتورت مەكتەپ پەن حالىقارالىق تاراز يننوۆاتسيالىق ينستيتۋتى شەرحان مۇرتازا ەسىمىمەن اتالادى. تالايعى تاراز كوشەلەرىنىڭ بىرىنە دە جازۋشىنىڭ ەسىمى بەرىلەتىن بولادى. بۇل – مەملەكەت جانە قوعام قايراتكەرىنىڭ سىڭىرگەن ەڭبەگىنە كورسەتىلگەن قۇرمەت. شەرحان مۇرتازا حالىقتىڭ مۇددەسى ءۇشىن ولشەۋسىز ەڭبەك ەتتى. حالىق ونى شىنشىلدىعى مەن ادىلدىگى, جازۋشىلىق شەبەرلىگى ءۇشىن قاستەرلەپ, «شەراعا» دەپ قۇرمەتتەيتىن», دەدى نۇرجان نۇرجىگىتوۆ.
سونداي-اق كونفەرەنتسياعا قاتىسۋشىلاردىڭ اتىنا جولدانعان پارلامەنت سەناتىنىڭ توراعاسى ماۋلەن اشىمباەۆتىڭ, پارلامەنت ءماجىلىسىنىڭ توراعاسى ەرلان قوشانوۆتىڭ, عىلىم جانە جوعارى ءبىلىم ءمينيسترى ساياسات نۇربەكتىڭ قۇتتىقتاۋ حاتتارى وقىلدى.
جيىندا ءسوز العان اقپارات جانە قوعامدىق دامۋ ءمينيسترى دارحان قىدىرالى جازۋشىنىڭ ءومىرى جانە شىعارماشىلىق جولى حالىققا ايانباي قىزمەت ەتۋدىڭ ۇلگىسى ەكەنىن اتاپ ءوتتى.
«شەرحان مۇرتازا ەل رۋحانياتىنىڭ دامۋىنا زور ۇلەس قوستى. ەلىمىزدىڭ ساياسي جانە قوعامدىق ومىرىنە بەلسەنە ارالاسىپ, مەملەكەت مۇددەسى ءۇشىن قىزمەت ەتتى», دەدى ول.
ءوز كەزەگىندە مەملەكەت جانە قوعام قايراتكەرلەرى ومىربەك بايگەلدى, ءۋاليحان قاليجان, تاريح عىلىمدارىنىڭ دوكتورى مامبەت قويگەلدى, جازۋشىلار وداعى توراعاسىنىڭ ورىنباسارى باۋىرجان جاقىپ, ل.گۋميلەۆ اتىنداعى ەۇۋ پروفەسسورى عاريفوللا ەسىم, پارلامەنت ءماجىلىسىنىڭ دەپۋتاتى دارحان مىڭباي, جازۋشى, پۋبليتسيست, حالىقارالىق «الاش» سىيلىعىنىڭ لاۋرەاتى ءامىرحان مەڭدەكە, قوعام قايراتكەرى ورازكۇل اسانعازى ءسوز سويلەپ, تۇلعا تۋرالى تاعىلىمدى ويلارىمەن ءبولىستى.
القالى جيىنعا قاتىسۋشىلار شەرحان مۇرتازانىڭ سان قىرلى قىزمەتى, ەلدىڭ ساياسي جانە قوعامدىق ومىرىندەگى تۇبەگەيلى وزگەرىستەرگە اتسالىسۋى, ادەبيەت پەن جۋرناليستيكانىڭ دامۋىنا قوسقان زور ۇلەسى تۋرالى اڭگىمەلەپ, ونىڭ ادەبي مۇراسىنداعى جاستاردىڭ رۋحاني-ادامگەرشىلىك تاربيەسىنە قاتىستى تاقىرىپتارعا جان-جاقتى توقتالدى.
كونفەرەنتسيا بارىسىندا حالىق جازۋشىسىنىڭ بەس تومدىق شىعارمالار جيناعى مەن ونىڭ «اۋىلدى, سەنى ساعىنام...» اتتى كىتابىنىڭ تۇساۋكەسەرى ءوتتى.
وسىلايشا قازاقستان رەسپۋبليكاسى جوعارعى كەڭەسى مەن پارلامەنتى ءماجىلىسىنىڭ دەپۋتاتى, رەسپۋبليكالىق «قازاق ادەبيەتى», «جاس الاش» («لەنينشىل جاس»), «ەگەمەن قازاقستان» گازەتتەرىنىڭ باس رەداكتورى, «قازاقستان» مەملەكەتتىك تەلەراديو كورپوراتسياسىنىڭ توراعاسى بولىپ ەلەۋلى ەڭبەك ەتىپ, مەملەكەتتىك سىيلىقتىڭ لاۋرەاتى, جامبىل وبلىسىنىڭ قۇرمەتتى ازاماتى جانە تاعى دا باسقا ءتۇرلى ناگرادالارمەن ماراپاتتالعان تارلانبوز تۇلعا رۋحىنا ارنالعان ءىس-شارا جوعارى دەڭگەيدە ۇيىمداستىرىلدى.
حالىق جازۋشىسىنىڭ قالامىنان تۋعان «قارا مارجان», «قىزىل جەبە», «اي مەن ايشا» روماندارى, «ستالينگە حات» جانە «بەسەۋدىڭ حاتى» پەسالارى, «تابىلعان تەڭىز», «بۇلتسىز نايزاعاي», «بەلگىسىز سولداتتىڭ بالاسى», «مىلتىقسىز مايدان» پوۆەستەرى سەكىلدى كوپتەگەن شىعارماسى قالىڭ وقىرماننىڭ ولجاسىنا اينالعانى ءسوزسىز.
قازاقتىڭ كورنەكتى جازۋشىسىنىڭ شىعارمالارى الەمنىڭ كوپتەگەن تىلىنە اۋدارىلعانى ونىڭ مۇراسىنىڭ قۇندى ەكەنىن ايعاقتاي تۇسسە كەرەك.
مەرەيتويعا ارنايى كەلگەن مارتەبەلى مەيماندار قالامگەردىڭ تۋعان اۋىلى, جۋالى اۋدانىنداعى تالاپتى ەلدى مەكەنىنە ات باسىن بۇردى. ءىس-شارالار لەگى بۇدان ءارى قالامگەردىڭ تۋعان اۋىلىندا جالعاسىن تاپتى.
الدىمەن جينالعان جۇرت ابىز تۇلعانىڭ اۋىلىندا, قاسيەتتى ءتاڭىرتاۋدىڭ ەتەگىندەگى مىڭبۇلاق جايلاۋىندا ورنالاسقان تالاپتى اۋىلىنداعى ءوزى تۇرعان ءۇيدىڭ ادەبي-مەموريالدى مۋزەيگە اينالۋىنىڭ كۋاسى بولدى. بۇل ءۇي وسكەلەڭ ۇرپاققا ۇلت رۋحانياتىن ناسيحاتتايتىن ورتالىق رەتىندە قىزمەت ەتەتىنى ءسوزسىز.
ادەبي-مەموريالدى مۋزەي-ءۇيدىڭ القىزىل لەنتاسىن قيۋ سالتاناتىنا اقپارات جانە قوعامدىق دامۋ ءمينيسترى دارحان قىدىرالى, حالىق قاھارمانى باقىتجان ەرتاەۆ, قازاقستاننىڭ ەڭبەك ەرلەرى مۇحتار شاحانوۆ, اياگۇل ميرازوۆا, پارلامەنت سەناتىنىڭ دەپۋتاتى ابدالى نۇراليەۆ جانە پارلامەنت ءماجىلىسىنىڭ دەپۋتاتتارى دارحان مىڭباي, جاناربەك ءاشىمجان, گۇلدارا نۇرىموۆا, ءىلياس بۇلاروۆ, مەيرامبەك تولەپبەرگەن ارنايى قاتىستى.
قادىرلى قوناقتار ادەبي-مەموريالدىق مۋزەي-ۇيگە كىرىپ, ونداعى قۇندى مۇرالارمەن تانىستى. ش.مۇرتازا اتىنداعى «رۋحانيات جانە تاريحتانۋ» ورتالىعىنىڭ ديرەكتورى ساۋران قاليەۆ قالامگەردىڭ بالالىق كەزى مەن ءبىلىم العان شاعى, ستۋدەنتتىك جىلدارى, جۋرناليستيكا جانە جازۋشىلىق قىزمەتى, ساياسي قىزمەتكە ارالاسۋى, جۇمىس كابينەتى مەن ينستالياتسياسى ورنالاسقان ادەبي-مەموريالدىق ءۇيدى تانىستىردى.
جيىن سوڭىندا رەسپۋبليكالىق دەڭگەيدە ۇيىمداستىرىلعان «اقيقاتتىڭ اق تۋى» اتتى جۋرناليستەر اراسىنداعى بايقاۋ مەن «شىننىڭ ءجۇزى – شەراعا» اتتى رەسپۋبليكالىق اقىندار ءمۇشايراسىنىڭ قورىتىندىسى شىعارىلىپ, جەڭىمپازدار مەن جۇلدەگەرلەر ماراپاتتالدى. بۇدان سوڭ ەلىمىزدىڭ ءار قيىرىنان كەلگەن قوناقتارعا ارنالىپ اس بەرىلدى.
جامبىل وبلىسى,
تاراز قالاسى,
جۋالى اۋدانى.
