«مەن تاعى ءبىر ماسەلەگە ارنايى توقتالعىم كەلىپ وتىر. بۇگىندە ۇلى ابايدىڭ كەسەنەسى – ەلىمىزدەگى ەڭ تانىمال نىساننىڭ ءبىرى. الايدا, تالدىقورعان وبلىسىندا ابايعا ارنالعان بىردە-ءبىر لايىقتى ەسكەرتكىش جوق. بۇل – ۇيات نارسە, ۇلكەن ولقىلىق. ونى تۇزەتۋ كەرەك.
التىنەمەلدە قازاقتىڭ ايگىلى عالىمى شوقان ءۋاليحانوۆتىڭ ماڭگىلىك مەكەنى بار ەكەنى بارشا جۇرتقا بەلگىلى. شاڭقاناي اۋىلىندا ونىڭ ەسكەرتكىشى, مۇراجايى بار. جەرگىلىكتى جۇرت قازاقتىڭ ۇلى پەرزەنتى جەرلەنگەن جەردى قاراۋسىز قالدىرماعان. بىراق, بۇل جەتكىلىكسىز. ءبىز شوقاندى الەمدىك دەڭگەيدە دارىپتەۋىمىز كەرەك. جالپى, ءبىز ۇلى پەرزەنتتەرىمىزدى قۇرمەتتەي ءبىلۋىمىز كەرەك. مۇنداي تاريحي ورىندار تۋرالى ۇنەمى ايتىپ, ۇرپاققا تانىستىرىپ وتىرۋ قاجەت», دەدى پرەزيدەنت.
سونىمەن قاتار مەملەكەت باسشىسى وسى تاقىرىپتان تۋىندايتىن تاعى ءبىر ماسەلەگە توقتالىپ ءوتتى. پرەزيدەنت وزگە ەلدەردە جەرلەنگەن ۇلتىمىزدىڭ ۇلى پەرزەنتتەرىن اتاپ ءوتتى. سونداي-اق ولاردى ۇمىت قالدىرماۋ - ءبىزدىڭ باستى پارىزىمىز ەكەنىن اتاپ ءوتتى.
«ەل تاريحىندا ەرەكشە ورىن الاتىن كوپتەگەن تۇلعالارىمىز شەتەلدە جەرلەنگەن. ۇلتىمىزدىڭ ۇلى پەرزەنتتەرى ءال-فارابي جانە بەيبارىس سۇلتان سيريانىڭ شام شاھارىندا جاتىر. قازاقتىڭ ايگىلى ءۇش ءبيىنىڭ ەكەۋى – تولە بي مەن ايتەكە ءبيدىڭ زيراتى – وزبەكستاندا. قۇرمانعازى مەن بوكەي حاننىڭ كەسەنەسى رەسەي جەرىندە. جات جەردەن توپىراق بۇيىرعان باسقا دا كوپتەگەن تاريحي تۇلعالارىمىز بار. ارينە, ولاردىڭ ءبارىنىڭ سۇيەگىن ەلگە الىپ كەلۋ مۇمكىن ەمەس. ونداي ماقسات تا جوق. بىراق, تاعدىردىڭ جازۋىمەن جات جەردە قالعان ۇلى بابالاردى ۇمىت قالدىرماۋ – ءبىزدىڭ ازاماتتىق پارىزىمىز», دەدى ەل پرەزيدەنتى ق.توقاەۆ.
