«قازاقستاندا كورىكتى جەرلەر وتە كوپ. وسىنى ۇتىمدى قولدانۋىمىز كەرەك. جەتىسۋ وبلىسىنىڭ اكىمدىگى ءتۋريزمدى دامىتۋعا ايرىقشا ءمان بەرۋى قاجەت. اسىرەسە, الاكول مەن بالقاشتىڭ وراسان زور الەۋەتى بار. «التىنەمەل» جانە «جوڭعار الاتاۋى» ۇلتتىق پاركى – ەكولوگيالىق ءتۋريزمدى دامىتۋ ءۇشىن تاپتىرمايتىن جەر. تەكەلىدەگى ايگىلى شاجا جانە قورا سايلارى كەرەمەت كورىنىستەرگە تولى. مىنە, وسىنىڭ ءبارى – تۇنىپ تۇرعان بايلىق», دەپ اتاپ ءوتتى پرەزيدەنت.
مەملەكەت باسشىسى وڭىرگە تۋريستەردى كوپتەپ تارتۋ ءۇشىن ءتيىستى ينفراقۇرىلىم سالىپ, قولايلى جاعداي جاساۋ كەرەك ەكەنىن ايتتى. الايدا, بۇل – وڭاي شارۋا ەمەستىگىن دە اتاپ ءوتتى.
«جەتىسۋداعى ۇلتتىق پاركتەردە قۇنى 3 ميلليارد تەڭگەدەن استام ينۆەستيتسيالىق جوبالار جۇزەگە اسىرىلماق. وعان ءىرى ينۆەستورلار تارتىلدى. قورىقتارعا اپاراتىن جولدار جوندەلىپ جاتىر. مۇندا ورتالىق ازياداعى ەڭ بيىك «بۇرحان بۇلاق» سارقىراماسىنا ساي ىشىمەن باراتىن جول سالىنادى. ءۇشارال قالاسىنداعى اۋەجايدىڭ ۇشىپ-قونۋ جولاعى جوندەلدى», دەدى پرەزيدەنت.
مەملەكەت باسشىسىنىڭ ايتۋىنشا, وتكەن ەكى جىلدا الاكولدە ينجەنەرلىك ينفراقۇرىلىمدى دامىتۋعا بيۋدجەتتەن 16 ميلليارد تەڭگە ءبولىندى.
«كولدىڭ جاعاسىندا كارىز جەلىسىن سالۋ ءۇشىن قۇرىلىس جۇمىستارى جۇرگىزىلىپ جاتىر. بالقاشتىڭ تۋريستىك الەۋەتىن ارتتىرۋ ءۇشىن بىرنەشە جوبا قولعا الىندى», دەپ قوستى قاسىم-جومارت توقاەۆ.
