«بۇل ءوڭىردىڭ ترانزيتتىك الەۋەتى وتە زور. سوندىقتان, مۇندا حالىقارالىق كولىك-لوگيستيكا كومپانيالارىن تارتۋ اسا ماڭىزدى. سول ءۇشىن «قورعاس – شىعىس قاقپاسى» ارنايى ەكونوميكالىق ايماعى قۇرىلعان. وعان قۇرعاق پورت, لوگيستيكالىق جانە يندۋستريالىق ايماقتار كىرەدى», دەدى پرەزيدەنت.
قاسىم-جومارت توقاەۆ بۇل جەردە 2026 جىلدىڭ سوڭىنا دەيىن 22 جوبانى جۇزەگە اسىرۋ كوزدەلىپ وتىرعانىن ايتتى.
«ونىڭ جالپى قۇنى – 450 ميلليارد تەڭگە شاماسىندا. دەگەنمەن, جۇكتى ءتۇسىرىپ, قايتا تيەۋگە ارنالعان ورىندار جانە ونى ساقتايتىن قويمالار سالۋ قاجەت. وسى باعىتتا جاڭا, زاماناۋي جوبالاردى قولعا العان ءجون», دەدى مەملەكەت باسشىسى.
سونداي-اق قاسىم-جومارت توقاەۆ مەملەكەت كاسىپكەرلىكتى جان-جاقتى قولداۋ ءۇشىن ءتيىمدى تاسىلدەر قولدانىپ جاتقانىن, اتاپ ايتقاندا, گرانتتار, شاعىن جانە جەڭىلدەتىلگەن نەسيەلەر بەرىلەتىنىن اتاپ ءوتتى.
«وسى وڭىردەگى ەڭبەككە جارامدى حالىقتىڭ ۇشتەن ءبىرى شاعىن جانە ورتا بيزنەس سالاسىندا جۇمىس ىستەيدى. ايماقتاعى كاسىپكەرلەردىڭ سانىن ايتارلىقتاي كوبەيتۋ ءۇشىن مەملەكەت تاراپىنان قولداۋ شارالارىن كۇشەيتۋ قاجەت. وسى ماقساتتا ارنايى ۇلتتىق جوبا جۇزەگە اسىرىلىپ جاتىر. بىراق بۇل تۋرالى حالىقتىڭ كوبى بىلمەي جاتادى. سوندىقتان, ەل ىشىندە بيزنەستى قولداۋ ساياساتى تۋرالى اقپاراتتىق-ءتۇسىندىرۋ جۇمىسىن جۇرگىزۋ قاجەت», دەدى مەملەكەت باسشىسى.
