وسى ولقىلىقتىڭ ورنىن تولتىرۋ ءۇشىن اقتوبە قالاسىنا جاقىن اۋدانداردىڭ تۇرعىندارى 10-11 سىنىپتا وقيتىن بالالارىنا قالادان رەپەتيتورلىق ورتالىقتار ىزدەپ, ابىگەرگە تۇسەدى. كۇندەلىكتى قالاعا قاتىناۋعا كوپ اتا-انانىڭ شاماسى جەتە بەرمەيتىنى دە بەلگىلى. ءبىلىم ۇبت تاپسىرۋعا عانا ەمەس, جۇيەلى بولۋى كەرەك. اۋىلدىق جەرلەردەگى ءبىلىم ساپاسىن كوتەرۋدە ەڭ الدىمەن جوعارى جىلدامدىقتاعى ينتەرنەت بايلانىسىن جولعا قويۋ كۇن تارتىبىندە تۇر. زاماناۋي بىلىمگە قول جەتكىزۋ ءۇشىن بىرىڭعاي مەكتەپ وقۋلىقتارىمەن دايارلانۋ جەتكىلىكسىز ەكەنىن ۇستازدار دا, وقۋشىلار مەن ولاردىڭ اتا-انالارى دا جاقسى تۇسىنەدى. سوندىقتان قاعازعا باسىلعان وقۋلىقتارداعى اقپاراتتان وزگە تاقىرىپتى ءتۇسىنۋ ماقساتىندا وقۋشىلاردىڭ قوسىمشا اقپارات الۋى, مالىمەتتەردى سارالاۋى مەن تالداي الۋى, سىني ويلاۋ قابىلەتىن جەتىلدىرە ءبىلۋى وتە ماڭىزدى.
ەلىمىزدە قالا مەن اۋىل مەكتەپتەرىنىڭ اراسىنداعى ءبىلىم الشاقتىعىن جويۋ ماقساتىندا NIS مەكتەپتەرى 17 وڭىردەگى 17 مەكتەپكە ادىستەمەلىك قولداۋ كورسەتۋ جوباسىن باستادى. سولاردىڭ قاتارىندا العا اۋدانىنىڭ بەستاماق ورتا مەكتەبى «اۋىلدىق جەردەگى تىرەك مەكتەپتەردىڭ الەۋەتىن دامىتۋ» جوباسى بويىنشا اقتوبەدەگى NIS-ءتىڭ تىرەك مەكتەبى بولىپ بەكىتىلدى. اۋقىمدى جۇمىس زياتكەرلىك جانە بەستاماق ورتا مەكتەپتەرىنىڭ ديرەكتورلارى ساۋلە ومىربەكوۆا مەن انار يستەعۇلوۆانىڭ كەزدەسۋىنەن باستالدى. ءبىر اپتا ىشىندە NIS مۇعالىمدەرى بۇكىل پەداگوگيكالىق ۇجىمعا اشىق ساباقتار, سەمينارلار, شەبەرلىك ساباقتار مەن ترەنينگتەر وتكىزدى. بەستاماقتىق مۇعالىمدەر جاراتىلىستانۋ-ماتەماتيكا جانە الەۋمەتتىك-گۋمانيتارلىق عىلىمدار, گەوگرافيا, تاريح, ونەر, دەنە شىنىقتىرۋ, روبوتتەحنيكا جانە ينفورماتيكا پاندەرى بويىنشا دارىستەرگە قاتىسىپ, كىتاپحانا مەن ۇيىرمەلەردىڭ جۇمىسىمەن تانىستى. سونداي-اق NIS وقىتۋشىلارى وقۋ پروتسەسىندە تىك جانە كولدەنەڭ جوسپارلاۋدى ۇيىمداستىرۋدىڭ تاسىلدەرىن كورسەتتى. بەستاماق مەكتەبىنىڭ وقىتۋشىلارى وسىنداي شىعارماشىلىق بايلانىستىڭ تيىمدىلىگىن اتاپ ءوتتى.
– زياتكەرلىك مەكتەپ مۇعالىمدەرىنىڭ ساباق جوسپارلاۋداعى زەرتتەۋشىلىككە ءمان بەرۋى, وسى باعىتتى تۇرلىشە دامىتۋ شەبەرلىكتەرى, وقۋشىلاردىڭ شىعارماشىلىق قابىلەتىن اشۋداعى جۇمىس باعىتتارى ۇنادى. بۇل – ءبىز ءۇشىن ۇلكەن تاجىريبە الماسۋ, – دەيدى بەستاماق ورتا مەكتەبى تاريح ءپانىنىڭ مۇعالىمى روزا دۇيسەنباەۆا.
ايتا كەتۋ كەرەك, «اۋىلدىق جەردەگى تىرەك مەكتەپتەردىڭ الەۋەتىن دامىتۋ» جوباسىن NIS ءبىلىم بەرۋدى تۇراقتى دامىتۋ قورى جانە «قازاقستان حالقىنا» قورىمەن بىرلەسىپ ىسكە اسىرۋدا. ءبىراز ۋاقىت بۇرىن اقتوبەدەگى NIS ۇستازدارىنان قۇرالعان توپ بەستاماق مەكتەبىنە كەلىپ, «اۋىلدىق جەردەگى تىرەك مەكتەپتەردىڭ الەۋەتىن دامىتۋ» باعدارلاماسىمەن ارىپتەستىك بايلانىس ورناتۋعا وزدەرى ۇسىنىس ەتكەن. NIS مۇعالىمدەرى كۇندەلىكتى پاندىك ساباقتارىنان سوڭ جوبا قاتىسۋشىلارىمەن ساباقتىڭ وتكىزىلۋىنە تالداۋ جاساپ, تىڭداۋشىلاردىڭ سىن-ەسكەرتپەلەرىن جانە ۇسىنىستارىن سۇرادى. تاڭداۋلى ءبىلىم وشاعىنىڭ اۋىل مەكتەبىنە قانشالىقتى اسەر ەتكەنىن وسى وقۋ جىلىنىڭ سوڭىندا مەكتەپ وقۋشىلارىنىڭ ساباق ۇلگەرىمى مەن ۇبت قورىتىندىسى بويىنشا انىقتاۋعا بولادى. اقتوبەدەگى NIS مۇعالىمدەرى بەستاماق مەكتەبىن ءۇش جىل بويى ادىستەمەلىك تۇرعىدان قامتاماسىز ەتەدى. بۇل ەكى جاققا دا پايدالى ءارى تۇپكىلىكتى ناتيجەسى – تىرەك اۋىلداعى ءبىلىم ساپاسىنىڭ ارتۋىنا وڭ اسەر ەتپەك.
اقتوبە وبلىسى
