الماتى – قوناەۆ اۆتوماگيسترالىنىڭ بويىندا ورنالاساتىن G4 City جوباسى اياسىندا Gate District, Golden District, Growing District جانە Green District اتتى ءتورت زاماناۋي اۋدان سالىناتىنى حابارلاندى.
«Gate Distrtict اۋدانى قارجىلىق-ىسكەرلىك كلاستەرى, Golden District اۋدانى ءبىلىم بەرۋ جانە مەديتسينالىق كلاستەر رەتىندە داميدى. ال ەكسپورتقا بەيىمدەلگەن ساۋدا-لوگيستيكا جانە يننوۆاتسيالىق-يندۋستريالىق ونەركاسىپ نىساندارى Growing District اۋدانىنا شوعىرلانادى. Green District مادەنيەت جانە دەمالىس اۋدانىندا كۋرورتتىق كەشەن, گەمبلينگ يندۋستريا نىساندارى مەن ارناۋلى پاركتەر ورنالاسادى. دامۋ پەرسپەكتيۆاسى بويىنشا G4 City 2,2 ميلليونعا دەيىن حالىق مەكەندەيتىن ينتەگراتسيالانعان قالا رەتىندە داميدى. شەتەلدىك ينۆەستورلاردى بەلسەندى تارتۋ ماقساتىندا قالادا ارنايى ەكونوميكالىق ايماقتار قۇرۋ, جاڭا حالىقارالىق اۋەجاي سالۋ جوسپارلانعان», دەلىنگەن حابارلامادا.
مەملەكەت باسشىسى اتالعان جوبا بۇرىننان تالقىلانىپ كەلە جاتقانىن ەسكە سالىپ, ينۆەستورلوردان جوبانىڭ جۇزەگە اسىرىلۋ مەرزىمىن ناقتىلادى. سونداي-اق پرەزيدەنت ينۆەستورلارعا G4 City قالاسىندا قولجەتىمدى باسپانا سالۋ, قالا ورنالاساتىن اۋماق حالقىن تۇرعىن ۇيمەن قامتاماسىز ەتۋ ماسەلەسىن قاراستىرىپ, جوبانىڭ الەۋمەتتىك جاعىنا دا ءمان بەرۋ كەرەك ەكەنىن اتاپ ءوتتى.
الماتى وبلىسى اكىمى مارات سۇلتانعازيەۆ پەن قارجى ءمينيسترى ەرۇلان جاماۋباەۆقا G4 City قالاسىن دامىتۋ جونىندەگى باس جوسپاردىڭ تۇجىرىمداماسىن بەكىتۋ ماسەلەسىنە قاتىستى بىرقاتار تاپسىرما جۇكتەدى.
