قازىرگى ۋاقىتتا قازاقستاندا ەلەكتر ەنەرگەتيكاسى ءۇشىن كۇردەلى جاعداي قالىپتاسىپ وتىر.
«ەكونوميكاعا قوسىمشا ەنەرگيا كوزدەرى قاجەت. سونداي-اق بۇل سالانىڭ كليماتقا تەرىس اسەرىن ازايتۋ دا وڭاي بولىپ تۇرعان جوق. بۇل – جاھاندىق ديلەمما, ونىڭ ەكى جاققا دا ءتيىمدى بالانسىن تابۋ كەرەك», دەدى ءاليحان سمايىلوۆ.
ونىڭ ايتۋىنشا, بۇگىندە وندىرىلەتىن ەنەرگيانىڭ 80%-دان استامى كومىر مەن مۇناي سەكىلدى قازبا وتىندارىنان الىنىپ وتىر.
«الداعى ۋاقىتتا بۇل سالادا ايتارلىقتاي وزگەرىس بولا قويماۋى دا مۇمكىن. دەگەنمەن, كومىرقىشقىل گازىن اۋاعا جىبەرمەي ۇستاپ قالۋ جانە ونى كادەگە جاراتۋ, اتموسفەراعا شىعاتىن زياندى قالدىقتاردى ازايتۋ ءۇشىن جاڭا تەحنولوگيالاردى قولدانۋعا باسىمدىق بەرىلۋدە. ءبىز ەكولوگيالىق بالانستى ساقتاۋعا, جاسىل جەلەكتى, ورمان القاپتارىن كوبەيتۋگە بارىنشا كوڭىل بولەمىز», دەدى پرەمەر-مينيستر.
سونداي-اق ول ەنەرگەتيكالىق ينفراقۇرىلىمدى دامىتۋ ماسەلەسىن دە شەشۋ قاجەت ەكەنىن اتاپ ءوتتى. مىسالى, وڭىرلەردە ەلەكتر جەلىلەرىنىڭ توزۋى شامامەن 65%-دى قۇرايدى. جىلۋ ەلەكتر ورتالىقتارىنداعى جابدىقتاردىڭ توزۋ دەڭگەيى دە وسىنداي. كەيبىر قالالاردا بۇل كورسەتكىش ءتىپتى 80%-دى قۇرايدى.
پرەمەر-ءمينيستردىڭ پىكىرىنشە, ەلەكتر ستانتسيالارى مەن قازاندىقتاردىڭ جابدىقتارىن جاڭارتىپ, جەلىلەردى رەكونسترۋكتسيالاۋ قاجەت. سونىمەن قاتار ەكونوميكانىڭ تۇراقتى ءوسۋىن قامتاماسىز ەتۋ ءۇشىن 2035 جىلعا قاراي 10 گۆت-تان استام جاڭا ەنەرگيا قۋاتى قاجەت بولادى.
«الدىمىزدا كۇردەلى مىندەتتەر تۇر. ول ءۇشىن بىزدە جەتكىلىكتى رەسۋرستار بار. اتاپ ايتقاندا, جاڭارتىلاتىن ەنەرگەتيكانى دامىتۋعا جارايتىن قاجەتتى جەر اۋماعى, قازبا بايلىعىنىڭ مول قورى, اتوم ەنەرگەتيكاسىن دامىتۋ جونىندەگى جوسپارىمىز بار», دەدى ءاليحان سمايىلوۆ.
قورىتىندىلاي كەلە, پرەمەر-مينيستر كورشى ەلدەردىڭ ەنەرگيا جۇيەسى ارقىلى ەنەرگيانى تۇراقتى تۇردە جەتكىزۋدى قامتاماسىز ەتۋدى, ەڭ كوپ سالماق تۇسەتىن ماۋسىمدىق كەزەڭدەردە قاجەتتى مانەۆرلىك قۋاتتاردى ۇلعايتۋ شارالارىن قابىلداۋدى, سونداي-اق قازان ايىنىڭ سوڭىنا دەيىن ۇكىمەتتىڭ قاراۋىنا «ينۆەستيتسيا ورنىنا تاريف» ساياساتىن ىسكە اسىرۋدىڭ ناقتى مەحانيزمىن ۇسىنۋدى تاپسىردى.
سونىمەن قاتار ەنەرگەتيكا مينيسترلىگىنە كومىر جاعاتىن ەلەكتر ستانتسيالارىنان زياندى زاتتاردى ازايتۋ جانە ولاردى كادەگە جاراتۋ تەحنولوگيالارىن ازىرلەپ, قولدانىسقا ەنگىزۋ تاپسىرىلدى.
