سول الاقانداي اۋىلدا قايسار قىزدىڭ اتىنداعى ورتا مەكتەپ بار. بيىل اشىلعانىنا 90 جىل, ال باتىردىڭ اتىن يەمدەنگەنىنە 60 جىل تولىپ وتىر. ايتۋلى مەرەكەنى جوعارى دارەجەدە اتاپ وتكەن ءبىلىم ورداسى قان مايداندا ەرلىكپەن قازا تاپقان بابالاردىڭ رۋحىنا تاعزىم جاساپ, ماڭگىلىك الاۋعا گۇل شوعىن قويۋدان باستادى. اسكەري كيىم كيگەن جاس ساربازدار مەملەكەتتىك تۋدى اكەلىپ, گيمن شىرقالدى. باتىر قىزدىڭ ەسىمىن اسقاقتاتۋ ارقىلى وزدەرىنىڭ دە تۋعان ەل مەن وسكەن جەرگە قىزمەت ەتۋگە دايىن ەكەندىكتەرىن بايقاتتى.
شارا بارىسىندا ەسكەلدى اۋداندىق ءماسليحاتىنىڭ حاتشىسى قانات ساتانوۆ, شىمىر اۋىلى اقساقالدار القاسىنىڭ توراعاسى ەرنازار ايتقالي ۇلى, اۋداندىق ءبىلىم ءبولىمىنىڭ سەكتور مەڭگەرۋشىسى شولپان جاقانوۆا جۇرەكجاردى تىلەكتەرىن ارناپ, وسكەلەڭ ۇرپاققا مانشۇك مامەتوۆانىڭ ەرلىگى جايلى ايتىپ بەردى.
قادىرمەندى قوناقتاردىڭ تىلەگىنەن كەيىن مەكتەپ وقۋشىلارى شاعىن كورىنىس قويدى. قان مايداندا فاشيستىك گەرمانياعا قارسى تۇرعان وتانداس-
تارىنىڭ قاتارىندا بولعان جانە وشپەس ەرلىكپەن دارالانعان مانشۇك مامەتوۆانىڭ ءرولىن بەينەلەگەن وقۋشىلار كوپشىلىكتى ءتانتى ەتتى. ناعىز قازاق قىزىنىڭ بويىنداعى قايسارلىق پەن باتىرلىقتى تاپ باسىپ كورسەتكەن وقۋشىلاردىڭ ونەرى جۇرەكتى سىزداتىپ, تۇلا بويىمىزدى شىمىرلاتتى. ءۇش بىردەي اتاۋلى كۇنگە ورايلاستىرىلىپ وتكەن مەرەكەدە مەكتەپ وقۋشىلارى بەلسەندىلىكتەرىمەن كوزگە ءتۇستى. پاتريوتتىق اندەر ورىندالىپ, كەشتى تاماشالاعان قوناقتارعا ۇلكەن اسەر سىيلادى. سونىمەن قاتار مانشۇك مامەتوۆانىڭ تۋعان ولكەسى ورال وڭىرىمەن بەينەبايلانىس ورناتىلىپ, باتىر قىزدىڭ ءومىرىن زەرتتەپ جۇرگەن مۇراجاي قىزمەتكەرلەرى قۇتتىقتاۋ جولدادى. كەش قوناقتارىنا تاريحي دەرەكتەردەن سىر شەرتتى.
مەكتەپ ديرەكتورى راۋشان مەيىربەكوۆا سالتاناتتى جيىننان كەيىن كەلگەن قوناقتاردى فويەدە قويىلعان سۋرەت كورمەسىمەن تانىستىردى. بىرنەشە تاقىرىپقا بولىنگەن مادەني كەشتە «قازاقتىڭ قاھارمان قىزى» اتتى تاقىرىپتا ۇيىمداستىرىلعان كىتاپ كورمەسى دە كوپتىڭ كوڭىلىنەن شىقتى. مەكتەپىشىلىك مەرەكە اياسىندا «مانشۇك مامەتوۆا – قازاقتان شىققان ايگىلى پۋلەمەتشى», «قازاقتىڭ قايسار قىزى» تاقىرىبىندا اشىق تاربيە ساعاتتارى ءوتىپ, «ەرلىك ەشقاشان ۇمىتىلمايدى» اتتى پاتريوتتىق اندەر بايقاۋىمەن جالعاستى. ءبىر كۇندە بىرنەشە ءىس-شارانى قولعا العان مەكتەپ ۇجىمى «مانشۇك – حالقىمىزدىڭ باتىر قىزى» تاقىرىبىندا اۋداندىق اسكەري-سپورتتىق سپارتاكيادا دا وتكىزدى. وعان اۋداننىڭ 7 مەكتەبىنەن وقۋشىلار قاتىسىپ, اسكەري-سپورتتىق جاتتىعۋدىڭ 6 تۇرىنەن سىنعا ءتۇستى.
1932 جىلى قۇرىلعان شاعىن عانا مەكتەپ بۇگىندە زامان تالابىنا ساي ۇلكەن ءبىلىم ورداسىنا اينالىپ وتىر. مۇندا 70 ۇستاز قىزمەت اتقارسا, 500 وقۋشى ءبىلىم الادى. باتىر قىزدىڭ ەسىمىن ارقالاعان ءبىلىم ورداسىنىڭ كورسەتكىشى جامان ەمەس. وتكەن جىلى 3 تۇلەگى ۇزدىك اتتەستات الىپ, ۇبت-دان جاقسى ناتيجە كورسەتكەن. ال جالپى اۋدان ۇبت دەڭگەيى بويىنشا 74,3 پايىزعا قول جەتكىزگەن.
ورتا مەكتەپتەن تۇلەپ ۇشقان تۇلەكتەر بۇگىندە رەسپۋبليكانىڭ ءار تۇكپىرىندە ءتۇرلى قىزمەتتەر اتقارىپ ءجۇر. مەكتەپ ۇجىمى زاڭ, ءبىلىم, مەديتسينا, سپورت سالاسىندا وزىندىك قولتاڭباسى بار شاكىرتتەرىمەن ماقتانادى. سونداي ۇزدىك وقۋشىلارىنىڭ ءبىرى – قارجى ءمينيسترىنىڭ ورىنباسارى دانيار جانالينوۆ.
مانشۇك مامەتوۆانىڭ 100 جىلدىعىنا وراي وتكەن پاتريوتتىق-مادەني شاراعا مەكتەپتى ءبىتىرىپ كەتكەن تۇلەكتەر دەمەۋشىلىك جاساعان. كەش سوڭىندا باتىر قىزدىڭ رۋحىنا ارنالىپ اس بەرىلدى. وتان ءۇشىن وت كەشكەن جاننىڭ ەرلىگى مەن ورلىگىن, ەلى مەن جەرىن سۇيەتىنىن پاش ەتكەن, جاس ۇرپاقتى دا سوعان ۇندەيتىن باسقوسۋ پاتريوتتىق نوتادا اياقتالدى.
جەتىسۋ وبلىسى
