بۇل ەڭبەكتى اتالعان ينستيتۋتتاعى دەرەكتانۋ, تاريحناما جانە وتان تاريحى ءبولىمىنىڭ جەتەكشى عىلىمي قىزمەتكەرى, عالىم سەيىتقالي دۇيسەن مەن ينستيتۋت ديرەكتورىنىڭ ورىنباسارى, پەداگوگيكا عىلىمدارىنىڭ كانديداتى جاباي قاليەۆ بىرلەسىپ جازعان. وندا بەلگىلى مەملەكەت جانە قوعام قايراتكەرىنىڭ ءومىرى مەن قىزمەتى ناقتى دەرەكتەرمەن ءورىلىپ, تانىمال تۇلعانىڭ تۋعان جەرى, وسكەن ورتاسى جانە ەڭبەگى مەن ومىردەگى قاراپايىم بەينەسى جان-جاقتى قامتىلعان. كىتاپقا جازعان العىسوزىندە تاريح عىلىمدارىنىڭ دوكتورى, پروفەسسور عاني قاراساەۆ جيناق اۆتورلارىنىڭ ىزدەنىسىن ايرىقشا اتاپ, تاريحي تانىمدىق باعىتتا جازىلعان بۇل ەڭبەكتى تۇلعاتانۋعا قوسىلعان ءبىر ۇلەس دەپ باعالاعان.
سابىر نيازبەكوۆ – قازىرگى اقمولا وبلىسى استراحان اۋدانىنىڭ ورنەك اۋىلىندا ومىرگە كەلىپ, العاشقى ەڭبەك جولىن 16 جاسىندا اۋىلدىق كەڭەستىڭ حاتشىلىعىنان باستاپ, اقمولا, قاراعاندى, قوستاناي, وڭتۇستىك قازاقستان, سولتۇستىك قازاقستان, باتىس قازاقستان, جامبىل جانە الماتى وبلىستارىندا جاۋاپتى قىزمەت اتقارىپ, سول وڭىرلەردىڭ الەۋمەتتىك-ەكونوميكالىق دامۋىنا زور ۇلەسىن قوستى. سونداي-اق 1965-1978 جىلدارى قازاق كسر جوعارعى كەڭەسى تورالقاسىنىڭ توراعاسى جانە كسرو جوعارعى كەڭەسى تورالقاسى توراعاسىنىڭ ورىنباسارى بولدى.
مازمۇندى ءىس-شارا اياسىندا مەملەكەت تاريحى ينستيتۋتىنىڭ ديرەكتورى, تاريح عىلىمدارىنىڭ دوكتورى, پروفەسسور ەركىن ءابىل ءسوز الىپ, جاڭا كىتاپ تۋرالى تاعىلىمدى وي قوزعاسا, سابىر ءبىلال ۇلىنىڭ تۋعان اعاسى راحمەتتىڭ قىزى – نازىم اپامىز جيناق اۆتورلارىنا العىسىن ايتىپ, جىلى لەبىزىن ءبىلدىردى. سونىمەن بىرگە وتىرىستا ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى تاريح فاكۋلتەتىنىڭ دەكانى, تاريح عىلىمدارىنىڭ دوكتورى, پروفەسسور تىلەگەن سادىقوۆ, مەملەكەت تاريحى ينستيتۋتى ديرەكتورىنىڭ ورىنباسارى, تاريحشى عالىم بۇركىت اياعان, ارداگەر ۇستاز وسپان سۇلەيمەن ۇلى جانە تاعى باسقا زيالى ازاماتتار ءسوز الىپ, كىتاپقا كەيىپكەر بولعان تۇلعانىڭ قايراتكەرلىگى مەن جيناقتىڭ جاڭالىعى جايىنداعى وي-پىكىرلەرىن ورتاعا سالدى.
