قالالىق چەمپيوناتتى №3 ءورت ءسوندىرۋ بولىمىندە سولتۇستىك قازاقستان وبلىسى توتەنشە جاعدايلار دەپارتامەنتىنىڭ ءورت ءسوندىرۋ جانە اپاتتى قۇتقارۋ قىزمەتىنىڭ باستىعى, ازاماتتىق قورعاۋ پولكوۆنيگى نۇرلان نۇكىشەۆ اشىپ, قاتىسۋشىلارعا ساتتىلىك تىلەدى.
ء«ورت ءسوندىرۋ ءىسى ۇلكەن شەبەرلىكتى, ەپتىلىكتى, تاپقىرلىقتى, جىلدامدىقتى تالاپ ەتەتىن كاسىپ. سىزدەر سول ادىستەردى ۇيرەنۋگە تالاپتانىپ جاتقان ورەنسىزدەر. سوندىقتان تالاپتارىڭىزعا نۇر جاۋسىن! بولاشاقتا ءورت اپاتتارىنا قارسى كۇرەستە بىرگە بولايىق!» دەدى ول.
«بولاشاق» قوعامدىق قورىنىڭ پرەزيدەنتى الما مۇستافينا دا وقۋشىلاردىڭ اراسىنداعى بىرىنشىلىك ازاماتتىق قورعانىسقا تاربيەلەيتىنىن جەتكىزدى.
قىزىلجاردا وسى كۇندەرى ميزامشۋاق شالقىپ, كۇن نۇرى قۇيىلىپ تۇر. بۇل جارىسقا قاتىسۋشى كوماندالاردىڭ دا كوڭىل كۇيىن كوتەرىپ, ارقا-جارقا كوڭىلدى ءسات ورنادى. ون كوماندانىڭ قۇرامىندا 60 قاتىسۋشى بولدى, ال ولاردىڭ جانكۇيەرلەرى قالىڭ توپ بولىپ مىنبەردەن ورىن الدى.
ەڭ العاشقى تاپسىرما – ءورت ءسوندىرۋ ساتىسىمەن ەكىنشى قاباتقا ورلەۋ. جىلدامدىق پەن ەپتىلىكتى قاجەت ەتەتىن بۇل تاپسىرما وڭاي ەمەس. ۋاقىتتى ۇنەمدەپ, قولىنداعى شلانگانى سۇيرەتىپ ەكىنشى قاباتقا كوتەرىلۋدىڭ ءوزى كۇش-جىگەردى تالاپ ەتەدى. بۇل جارىستا №6 قازاق ورتا مەكتەبىنىڭ وقۋشىسى دانيار اۋباكىروۆ ءبىرىنشى ورىن الدى. اتالعان مەكتەپتىڭ وقۋشىسى يماق ماقسات ەكىنشى جانە №31 مەكتەپتىڭ وقۋشىسى كيريلل زايتسەۆ ءۇشىنشى ورىنعا يە بولدى.
ەكىنشى تاپسىرما ۇستىنە ءورت ءسوندىرۋشىنىڭ قالىڭ كيىمىن كيىپ, 100 مەترلىك كەدەرگىلى قاشىقتىقتى جىلدام جۇگىرىپ وتۋگە ارنالدى. بۇل جارىستا دا اتالعان مەكتەپتەردىڭ وقۋشىلارى الدا بولدى. ال ءورت ءسوندىرۋ شلانگاسىن جىلدام ىسكە قوسىپ, سۋدى ورتكە باعىتتاۋدا ءال-فارابي اتىنداعى مەكتەپتىڭ كومانداسىنا تەڭ كەلەر ەشكىم بولمادى. ەكىنشى ورىندى №6 قازاق ورتا مەكتەبىنىڭ كومانداسى يەلەندى.
جارىس قورىتىندىسى بويىنشا كوماندالىق ءبىرىنشى ورىندى – №6, ەكىنشى ورىندى – №32, ءۇشىنشى ورىندى №31 مەكتەپتەردىڭ كوماندالارى يەلەندى.
پەتروپاۆل
