العاش رەت استانادا وتكەن ازياداعى ءوزارا ءىس-قيمىل جانە سەنىم شارالارى جونىندەگى كەڭەستىڭ سامميتىنە ۇيىمعا مۇشە مەملەكەتتەر, بايقاۋشىلار, قوناقتار, جالپى سانى 50-دەن استام دەلەگاتسيا قاتىستى. ونىڭ 12-ءسى مەملەكەت جانە ۇكىمەت باسشىلارى دەڭگەيىندە بولدى.
– ازيا كەڭەسىندەگى ەڭ باستى قۇجات – «ترانسفورماتسيا جونىندەگى استانا مالىمدەمەسى» بولدى. ازيا كەڭەسىن تولىققاندى وڭىرلىك حالىقارالىق ۇيىمعا بىرتىندەپ كەزەڭ-كەزەڭمەن جانە كونسەنسۋسقا نەگىزدەلگەن ترانسفورماتسيالاۋدىڭ قۇرىلىمدى, ينكليۋزيۆتى جانە اشىق كەلىسسوزدەر پروتسەسى باستالدى دەگەن ءسوز. ايتا كەتەيىك, قازاقستان پرەزيدەنتى ق.توقاەۆ بۇل تۋرالى ءاردايىم ايتىپ جۇرەتىن. ازيا كەڭەسىنىڭ قازىرگى ەرەكشەلىكتەرى حالىقارالىق ۇيىمعا ۇقسايدى. ويتكەنى باسقارۋ ورگاندارى, اتقارۋشى ورگاندارى, قۇرىلىمدارى بار, – دەدى اوسشك باس حاتشىسى.
«استانا مالىمدەمەسىندە» مۇشە مەملەكەتتەردىڭ وڭىردەگى قاۋىپسىزدىكتى نىعايتۋ جانە ەكونوميكالىق ءوسۋدى, ءوزارا بايلانىستى, الەۋمەتتىك جانە مادەني دامۋدى قامتاماسىز ەتۋ ءۇشىن بىرلەسكەن جۇمىس توپتاستىرىلعان, وندا ءار ەلدىڭ ساياسي ەركى جانە ۇجىمدىق شەشىم قامتىلعان.
– بۇل مالىمدەمە شەڭبەرىندە ترانسفورماتسيانىڭ العاشقى قادامدارى بەلگىلەندى. وسى كۇنگە دەيىن بارلىق كەزدەسۋلەر باسقوسۋ نەمەسە كەزدەسۋ دەپ اتالىپ كەلسە, ەندى بۇل كەزدەسۋلەر ينستيتۋتسيونالدىق دارەجەگە كوتەرىلدى. ولار ەندى مەملەكەت جانە ۇكىمەت باسشىلارى دەڭگەيىندەگى كەڭەس, ال سىرتقى ىستەر مينيسترلەرىنىڭ باسقوسۋلارى سىرتقى ىستەر مينيسترلەرىنىڭ كەڭەسى دەپ اتالادى. ەكىنشى ينستيتۋتسيونالدى شەشىم – حاتشىلىقتى باسقارىپ وتىرعان اتقارۋشى ديرەكتوردىڭ مارتەبەسى باس حاتشى مارتەبەسىنە اينالدىرىلدى. ورتا جانە ۇزاقمەرزىمدى پەرسپەكتيۆادا مۇشە مەملەكەتتەر العا قويعان ماقساتتارعا ساي ازيا كەڭەسىنىڭ زاڭنامالىق جانە اكىمشىلىك بازاسىن نىعايتۋ, بيۋدجەتتىك جانە كادرلىق مەحانيزمدەردى حالىقارالىق پراكتيكاعا جاقىنداتۋ جولىمەن بىرقالىپتى ترانسفورماتسيا پروتسەسىن جالعاستىرۋ كوزدەلگەن», دەدى كەڭەستىڭ باس حاتشىسى.
بيىل كەڭەس قۇرامى كۋۆەيت ەلىمەن تولىقتى. وسىلايشا, ازيا كەڭەسىنە مۇشە مەملەكەت سانى – 28. ال 1999 جىلى ولاردىڭ سانى 15 بولعان. بۇل كەڭەس بەدەلىنىڭ ارتىپ جاتقانىن, ونىڭ باسقا مەملەكەتتەر ءۇشىن تارتىمدى ەكەنىن كورسەتىپ وتىر دەگەن پىكىردە قايرات سارىباي. «بىلتىر تۇرىكمەنستان ازيا كەڭەسىنىڭ بايقاۋشى مارتەبەسىنە يە بولدى. سونداي-اق سامميت قارساڭىندا ازيا كەڭەسى مەن ەۋرازيالىق ەكونوميكالىق وداق ءوزارا ارىپتەستىك تۋرالى مەموراندۋمعا قول قويدى. وسىلايشا, ازيا كەڭەسىنىڭ وتباسى جانە حالىقارالىق بايلانىستار جەلىسى ءوسىپ, جالعاسۋدا. بۇل دا توراعالىقتىڭ ءبىر باسىمدىعى», دەدى ق.سارىباي.
ازياداعى ءوزارا ءىس-قيمىل جانە سەنىم شارالارى جونىندەگى كەڭەسكە قازاقستان 2024 جىلعا دەيىن توراعالىق ەتەدى.
