جىلدىق ديناميكادا ەڭ جوعارى كورسەتكىشتى Jusan Bank كورسەتتى: 2,4 ەسە ءوسىم بار. بەرىلگەن زايم كولەمى 1,1 ترلن تەڭگەگە جەتكەن. تامىز بويىنشا بانكتەگى ءوسىم – 0,3 پايىز. ەكىنشى ورىندا – تۇرعىن ءۇي نارىعىنداعى بەلسەندى زايم بەرۋشى «وتباسى بانك» (+53,5 پايىز, 2,7 ترلن تەڭگەگە دەيىن). ۇزدىك ۇشتىكتە قارىز پورتفەلىن 1,8 ترلن تەڭگەگە دەيىن كەڭەيتكەن «بانك تسەنتركرەديت»-تە بار.
بانكتەردەگى كەشىكتىرىلگەن تولەم كولەمى 1,5 ترلن تەڭگە بولدى. بۇل – قارىز پورتفەلىنىڭ 7 پايىزى. 90 كۇننەن اسسا دا تولەنبەگەن قارىز مولشەرى 786,8 ملرد تەڭگەگە جەتىپ, پورتفەلدىڭ 3,6 پايىزىن الىپ تۇر.
سوڭعى ەكى-ءۇش جىل بەدەرىندە ورناعان داعدارىسقا قاراماستان, قازاقستاندىق بانكتەردىڭ اكتيۆى سوڭعى ءبىر ايدا – 2,9 پايىزعا, ال سوڭعى ءبىر جىل ىشىندە 18,3 پايىزعا كوتەرىلگەن. ءسويتىپ, كۇز قارساڭىندا 41,5 ترلن تەڭگەگە جەتكەن.
ۇزدىك وندىقتاعى بانكتەر ىشىندە ەڭ ۇزدىك ايلىق ءوسىم ديناميكاسىن Bank RBK (+7,8 پايىز, 1,7 ترلن تەڭگەگە دەيىن) كورسەتكەن. بانكتىڭ جىلدىق ديناميكاسى دا جوعارى (+37,5 پايىز). سايكەسىنشە, بانكتىڭ قارىز پورتفەلى دە ءبىرشاما وسكەن. سوڭعى ءبىر اي ىشىندە 2 پايىزعا جوعارىلاپ, 793,7 ملرد تەڭگەگە دەيىن جەتسە, سوڭعى ءبىر جىلدا 42,7 پايىزعا كوبەيگەن. بۇل بانك كورپوراتيۆتىك باعىتتا دا, جەكە باعىتتا دا بەلسەندى جۇمىس ىستەيدى. ەكىنشى ورىندا – «بانك تسەنتركرەديت» (+4,9 پايىز, 3,4 ترلن تەڭگەگە دەيىن). بۇل قارجى ينستيتۋتىنىڭ قارىز پورتفەلى ءبىر ايدا 7,5 پايىزعا ءوسىپ, 1,8 ترلن تەڭگەگە جەتتى. ءۇشىنشى ورىندا – Altyn Bank (+4,1 پايىز, 936,2 ملرد تەڭگەگە دەيىن). قارىز پورتفەلى 1,4 پايىزعا ارتىپ, 300,2 ملرد تەڭگەگە تاياعان.
ءوتىمدى اكتيۆتەردىڭ 5,7 پايىزعا نەمەسە 1 008 ملرد تەڭگەگە ۇلعايۋى جانە قارىز پورتفەلىنىڭ 1,1 پايىزعا نەمەسە 246 ملرد تەڭگەگە دەيىن كوبەيۋى اكتيۆتەردىڭ جالپى كولەمىنىڭ ارتۋىنا جول اشقان. بانكتەردە جيناقتالعان وتىمدىلىگى جوعارى اكتيۆ قۇنى 12,6 ترلن تەڭگەگە باعالانادى, سايكەسىنشە, وتىمدىلىگى جوعارى اكتيۆتەر جالپى اكتيۆتىڭ 30,4 پايىزىن الادى. بۇل ءوز كەزەگىندە بانكتەردىڭ كليەنت الدىنداعى مىندەتتەمەسىن تولىعىمەن ورىنداۋىنا مۇمكىندىك بەرەدى.
2022 جىلدىڭ تامىزىندا ەكونوميكاعا نەسيە بەرۋ ۇلەسى 1,6 پايىزعا ارتىپ, 20,7 ترلن تەڭگەنى قۇرادى. قارجى نارىعىن رەتتەۋ جانە دامىتۋ اگەنتتىگىنىڭ اقپاراتى بويىنشا, اتالعان كورسەتكىش ءوسىمى جىل باسىنان بەرى 11,8 پايىز نەمەسە 2,2 ترلن تەڭگە كولەمىندە بولعان. ايتا كەتۋ كەرەك, ەكونوميكاعا بەرىلگەن نەسيەنىڭ باسىم بولىگى, ياعني 19,0 ترلن تەڭگە ۇلتتىق ۆاليۋتامەن راسىمدەلگەن. تەك 1,7 ترلن تەڭگە عانا شەتەل ۆاليۋتاسىمەن ۇسىنىلىپتى.
ينفوگرافيكانى جاساعان امانگەلدى قياس, «ەQ»
جىل باسىنان بەرى ءىرى بيزنەسكە بەرىلگەن زايمدار 4,0 پايىزعا, 3,4 ترلن تەڭگەگە دەيىن ۇلعايعان. ال شاعىن جانە ورتا بيزنەسكە (جەكە كاسىپكەرلەردى قوسا ەسەپتەگەندە) بەرىلگەن قارىز كولەمى 3,3 پايىزعا, 5,4 ترلن تەڭگەگە دەيىن ارتتى. زاڭدى تۇلعالارعا بەرىلگەن نەسيەنىڭ نەگىزگى ۇلەسى – ونەركاسىپ (34,3 پايىز), ساۋدا (21,1 پايىز), قۇرىلىس (7,6 پايىز) جانە ترانسپورت (5,8 پايىز) سالاسىنا تيەسىلى.
زاڭدى تۇلعالارعا بەرىلگەن كرەديتتەر 2022 جىلعى تامىزدا 0,5 پايىزعا تومەندەپ, 7,9 ترلن تەڭگەنى قۇرادى. بۇل رەتتە جىل باسىنان بەرگى كورسەتكىشتىڭ ءوسۋى 2,3 پايىزدى قۇرادى (2021 جىلعى وسىنداي كەزەڭدە 1,8 پايىزعا ءوستى). زاڭدى تۇلعالارعا كرەديتتەردىڭ تومەندەۋى جاڭا نەسيە بەرۋدەن اسىپ تۇسكەن ءىرى وتەۋلەر ناتيجەسىندە ورىن الدى. وسى جىلدىڭ تامىز ايىندا زاڭدى تۇلعالارعا 973 ملرد تەڭگە سوماسىنا قارىزدار بەرىلدى, بۇل 2022 جىلعى شىلدەمەن سالىستىرعاندا 11,2 پايىزعا ارتىق.
«جەكە تۇلعالارعا كرەديتتەر 2022 جىلعى تامىزدا 2,9 پايىزعا ۇلعايىپ, 12,7 ترلن تەڭگەنى قۇرادى (جىل باسىنان بەرى 18,7 پايىزعا ءوستى). جەكە تۇلعالارعا كرەديتتەردىڭ وسۋىنە جەڭىلدەتىلگەن مەملەكەتتىك يپوتەكالىق باعدارلامالاردى ىسكە اسىرۋدى جالعاستىرۋ ناتيجەسىندە يپوتەكالىق كرەديتتەۋدىڭ 3,1 پايىزعا, 4,1 ترلن تەڭگەگە دەيىن ۇلعايۋى, سونداي-اق تۇتىنۋشىلىق قارىزداردىڭ, ونىڭ ىشىندە جەكە كاسىپكەرلەرگە بيزنەس ماقساتتارعا ارنالعان قارىزداردىڭ, 2,3 پايىزعا, 7,0 ترلن تەڭگەگە دەيىن ءوسۋى سەبەپ بولدى», دەلىنگەن حابارلامادا.
سونداي-اق اگەنتتىك نەسيە پورتفەلىنىڭ ساپاسى ءبىرشاما جاقسارعانىن دا اتاپ وتەدى. 2022 جىلعى 1 قىركۇيەكتە بانك سەكتورى بويىنشا NPL قارىزدارىنىڭ دەڭگەيى ءبىر ايدا 0,2 پايىزدىق تارماققا نەمەسە 41 ملرد تەڭگەگە ازايىپ, 787 ملرد تەڭگەنى نەمەسە جالپى نەسيە پورتفەلىنىڭ 3,6 پايىزىن قۇراپتى (2022 جىلعى 1 قاڭتاردا – 3,3 پايىز نەمەسە 669 ملرد تەڭگە بولعان). زاڭدى تۇلعالاردىڭ پورتفەلىندە 90 كۇننەن استام مەرزىمى وتكەن بەرەشەگى بار قارىزداردىڭ دەڭگەيى – 3,6 پايىز نەمەسە 353 ملرد تەڭگە. جەكە تۇلعالاردىڭ پورتفەلىندە – 3,6 پايىز نەمەسە 434 ملرد تەڭگە. جۇمىس ىستەمەيتىن قارىزداردى پروۆيزيالارمەن جابۋ جوعارى بولىپ ساقتالىپ, 72,3 پايىزدى قۇراعان.
«بانكتەردىڭ مەنشىكتى كاپيتالى وسى جىلى تامىزدا 2,5 پايىزعا, 5,0 ترلن تەڭگەگە دەيىن ءوستى. نەگىزگى كاپيتالدىڭ جەتكىلىكتىلىك كوەففيتسيەنتى (ك1) – 17,6 پايىزدى, مەنشىكتى كاپيتال (ك2) 20,9 پايىزدى قۇرادى. بۇل زاڭنامادا بەلگىلەنگەن نورماتيۆتەردەن ەداۋىر اسىپ تۇسەدى جانە بانك سەكتورىنداعى ىقتيمال تاۋەكەلدەردى جابۋدى قامتاماسىز ەتەدى. سەكتور مىندەتتەمەلەرى 2022 جىلعى تامىزدا كليەنتتەر سالىمىنىڭ 1,9 پايىزعا, 28,3 ترلن تەڭگەگە دەيىن ۇلعايۋى ناتيجەسىندە 3,0 پايىزعا, 36,5 ترلن تەڭگەگە دەيىن ءوستى», دەپ مالىمدەدى اگەنتتىك.
سونىمەن بىرگە بازالىق مولشەرلەمەنىڭ ارتۋى اياسىندا قورلاندىرۋ قۇنى دا ۇلعايعان. بانكتىك ەمەس زاڭدى تۇلعالاردىڭ ۇلتتىق ۆاليۋتاداعى مەرزىمدى دەپوزيتتەرى بويىنشا ورتاشا الىنعان سىياقى مولشەرلەمەسى 2022 جىلعى تامىزدا 12,4 پايىز (2021 جىلعى جەلتوقساندا – 7,4 پايىز) بولسا, جەكە تۇلعالاردىڭ دەپوزيتتەرى بويىنشا 11,7 پايىزدى (2021 جىلعى جەلتوقساندا – 8,0 پايىز) قۇرادى.
2022 جىلدىڭ 1 قىركۇيەگىندەگى جاعداي بويىنشا قازاقستاننىڭ بانك سەكتورىندا 22 قارجى ينستيتۋتى جۇمىس ىستەيدى.
