جوبا پرەزيدەنت قاسىم-جومارت توقاەۆتىڭ تاپسىرماسىمەن قولعا الىنعان «وقۋعا قۇشتار مەكتەپ» باستاماسىن قولداۋ ماقساتىندا ىسكە اسىرىلىپ كەلەدى.
«شەۆرون» كومپانياسىنىڭ قولداۋىمەن «KAZMEDIA HOLDING» جۇزەگە اسىرىپ جاتقان باستاما اياسىنداعى ارناۋلى سەمينارلاردا مۇعالىمدەرگە جانە وقۋشىلارعا 134 جىلدىق تاريحى بار, گەوگرافيا, جاراتىلىستانۋ عىلىمدارىنان باستاپ, عارىشتى يگەرۋگە دەيىنگى سالالاردا كوپجىلدىق حالىقارالىق عىلىمي-زەرتتەۋلەر مەن فوتو-بەينە دەرەكتەردىڭ باي قورىن قالىپتاستىرعان National Geographic جۋرنالىنىڭ رەسۋرستارىن ءتيىمدى قولدانۋ ادىستەرى تانىستىرىلادى.
جوبا ەكى ماقساتتى كوزدەيدى. ءبىرىنشىسى – الەمدىك دەڭگەيدەگى ساپالى عىلىمي كونتەنتتەردىڭ قازاق تىلىندەگى قولجەتىمدىلىگىن كەڭەيتۋ. بۇل رەتتە كومپانيا National Geographic جۋرنالىنىڭ قازاق تىلىندەگى جيىنتىق توپتامالارىمەن رەسپۋبليكا مەكتەپتەرىنىڭ كىتاپحانالارىن قامتاماسىز ەتۋ جۇمىستارىن اتقارۋدا. «شەۆرون» كومپانياسىنىڭ اتسالىسۋىمەن جىل سوڭىنا دەيىن باتىس قازاقستان وبلىسىنىڭ جانە نۇر-سۇلتان, الماتى قالالارىنىڭ مەكتەپتەرىنە جۋرنال توپتامالارى تەگىن تاپسىرىلادى.
جوبانىڭ ەكىنشى ماقساتى – قوعامدا عىلىمعا دەگەن قىزىعۋشىلىقتى, ىنتا-ىقىلاستى ارتتىرۋ. سوعان وراي, مەكتەپ مۇعالىمدەرى مەن وقۋشىلارىنا ارنايى تاقىرىپتىق سەمينارلار وتكىزىلىپ, الەمدىك عىلىمي-رەسۋرستاردى ساباق بارىسىندا قالاي قولدانۋعا, وقۋشىلاردى قالاي قىزىقتىرۋعا بولاتىنى, ال وقۋشىلارعا عىلىمي جوبالارىنا قالاي دۇرىس پايدالانۋ كەرەكتىگى جان-جاقتى تۇسىندىرىلەدى.
ەسكە سالا كەتەيىك, مۇعالىمدەرگە ارنالعان سەمينارلار بۇعان دەيىن استانا جانە ورال قالالارىندا, وقۋشىلارعا ارنالعان سەمينارلار ورال قالاسى مەكتەپتەرىندە وتكەن بولاتىن.
اتالعان جوبا 17 قازان كۇنى №20 مەكتەپتە ساعات 9.00-11.00, №34 مەكتەپتە ساعات 14.00-16.00 ارالىعىندا وتەدى. 18 قازاندا №41 مەكتەپتە ساعات 09.00-11.00, №49 مەكتەپتە – 14.00-16.00 ارالىعىندا وتەدى.
