ايتا كەتەيىك, جيگۋلي دايراباەۆتىڭ كانديداتۋراسىن «اۋىل» حالىقتىق-دەموكراتيالىق پاتريوتتىق پارتياسى ۇسىنعان بولاتىن.
«2022 جىلعى 4 قازاندا ونى «اۋىل» ساياسي پارتياسىنان قازاقستان رەسپۋبليكاسى پرەزيدەنتتىگىنە كانديدات ەتىپ ۇسىنۋ تۋرالى قۇجاتتار وسك-عا ۇسىنىلدى. قازاقستان رەسپۋبليكاسى پرەزيدەنتتىگىنە كانديدات ۇسىنۋ جونىندەگى جوعارى ورگان وتىرىسىنىڭ حاتتاماسىنان ءۇزىندى كوشىرمەلەر ادىلەت مينيسترلىگىندە تىركەلگەنى تۋرالى قۇجاتتىڭ كوشىرمەسى, پرەزيدەنتتىككە كانديداتۋرانى ۇسىنۋعا كەلىسىم بەرۋ تۋرالى ءوتىنىشى, سونداي-اق ومىرباياندىق دەرەكتەرى مەن سايلاۋ جارناسىنىڭ تولەنگەنىن راستايتىن قۇجاتتار ۇسىنىلدى», دەدى قر وسك مۇشەسى اسىلبەك سماعۇلوۆ.
ورتالىق سايلاۋ كوميسسياسىنىڭ قاۋلىسىمەن كانديداتۋرانىڭ زاڭ تالاپتارىنا سايكەستىگى انىقتالدى. سونداي-اق كانديداتقا ازاماتتاردىڭ داۋسىن جيناۋ ءۇشىن قول قويۋ پاراقتارى بەرىلدى.
«اۋماقتىق سايلاۋ كوميسسيالارىنىڭ حاتتامالارىنا سايكەس, قر پرەزيدەنتتىگىنە كانديداتتى قولداۋعا ۋاكىلەتتى تۇلعالار ەلىمىزدىڭ بارلىق 20 وڭىرىندە 125 081 ازاماتتىڭ قولىن جينادى. ونىڭ 122 246 قولى تەكسەرىلىپ, 119 975-ءى سەنىمدى دەپ تانىلدى», دەدى اسىلبەك سماعۇلوۆ.
ورتالىق سايلاۋ كوميسسياسى جيگۋلي دايراباەۆتى قازاقستان رەسپۋبليكاسى پرەزيدەنتتىگىنە كانديدات رەتىندە تىركەدى. قر وسك توراعاسى نۇرلان ءابدىروۆ قازاقستان رەسپۋبليكاسى پرەزيدەنتتىگىنە كانديداتقا تىركەۋ تۋرالى كۋالىكتى تابىس ەتتى.
بۇعان دەيىن ورتالىق سايلاۋ كوميسسياسى قاسىم-جومارت توقاەۆ پەن مەيرام قاجىكەندى قازاقستان رەسپۋبليكاسى پرەزيدەنتتىگىنە كانديدات رەتىندە تىركەگەن بولاتىن.
