«حالىقارالىق ساتباەۆ قورىنىڭ» قامقورشىلار كەڭەسىنىڭ ۇيىتقى بولۋىمەن وتكەن ءىس-شاراعا قوعام قايراتكەرلەرى مەن زيالى قاۋىم وكىلدەرى, پارلامەنت سەناتىنىڭ دەپۋتاتتارى, عۇلاما عالىمنىڭ ۇرپاقتارى, استانا قالالىق ءماسليحاتى مەن قالالىق اكىمدىك وكىلدەرى قاتىستى. العاشقى ءسوزدى پارلامەنت سەناتىنىڭ دەپۋتاتى, «حالىقارالىق ساتباەۆ قورىنىڭ» قامقورشىلار كەڭەسىنىڭ توراعاسى التىنبەك نۇح ۇلى سويلەدى:
«قانىش يمانتاي ۇلىنىڭ ەسكەرتكىشى بىلتىر اشىلعانىن بىلەسىزدەر. پاندەمياعا بايلانىستى اشىلۋ سالتاناتىن كەڭ كولەمدە وتكىزۋگە شەكتەۋ بولدى. سول كەزدە تولىعىنان اشىلماعان ەسكەرتكىشتىڭ تۇجىرىمداماسىن تولىققاندى كەشەن ەتۋ ءۇشىن ماڭايىن ماعىنالى سوزدەر جازىلعان گرانيت تاستارمەن كومكەرۋ كوزدەلدى. بۇگىن قويىلعان 4 تاستىڭ بىرىنشىسىنە قانىش يمانتاي ۇلىنىڭ ءوز ءسوزى, زاڭعار عۇلامالار مۇحتار اۋەزوۆ, الكەي مارعۇلان, شاپىق شوكيننىڭ سوزدەرى, مەملەكەت جانە قوعام قايراتكەرلەرى نۇرتاس وڭداسىنوۆ, اكادەميكتەر ەۆنەي بوكەتوۆ, ومىربەك جولداسبەكوۆ سوزدەرى, تورتىنشىسىنە اقىن-جازۋشىلار كاكىمبەك سالىقوۆ, مەدەۋ سارسەكە, نەسىپبەك ايت ۇلىنىڭ جالىندى سوزدەرى مەن ولەڭ ماتىندەرى جازىلعان», دەدى التىنبەك نۇح ۇلى.
12 ءساۋىر – قانىش ساتباەۆتىڭ تۋعان كۇنى كۇنتىزبەگە عىلىم كۇنى رەتىندە ەنگىزىلگەنى بارشاعا بەلگىلى شىعار. ونى بەكىتتىرۋگە نەگىز بولعان باقىتجان جۇماعۇلوۆ تا قانىش يمانتاي ۇلىنىڭ قازاقستان عىلىمىن قالىپتاستىرۋداعى ەرەن ەڭبەگىنە توقتالىپ ءوتتى. سونىمەن قاتار عىلىم جانە جوعارى ءبىلىم ءمينيسترىنىڭ قۇتتىقتاۋ حاتىن ونىڭ ورىنباسارى ق.ەرعاليەۆ وقىپ بەردى. سەناتور التىنبەك نۇح ۇلى كەلەشەكتە ەسكەرتكىش الدىنان سۋبۇرقاق اشىلاتىنىن مالىمدەدى. سونىمەن قاتار قانىش ساتباەۆ ەسكەرتكىشىنىڭ اۆتورلارى اسقار نارتوۆ پەن ساماتبەك بوكەباي ەسىمدەرىن قۇرمەتپەن اتادى.
مۇحتار اۋەزوۆتىڭ مۇندا جازىلعان سوزىندە: «قانىشتىڭ ءبىر ۇلكەن ەرەكشەلىگى – ول حيميكپەن دە, بيولوگپەن دە, فيزيكپەن دە جانە تاريحشىمەن دە, فيلولوگپەن دە وزدەرىنىڭ عىلىمي تىلدەرىندە سويلەسە بىلەدى. جان-جاقتى عالىم, تىنىمسىز ىزدەنگىش قانىش عالىمدار ءۇشىن ناعىز ۇستاز, بارلىق جاعىنان ۇلگى-ونەگە», دەپتى. وسىعان ورايلاس حالىق قاھارمانى, اكادەميك شاپىق شوكيننىڭ مىنا ءبىر ءسوزى كەلتىرىلگەن: «سينتەزگە بەيىم ويشىلدار وتە سيرەك تۋادى. سينتەتيكالىق ينتەللەكت يەسى اتانعان عالىمدار كەڭىنەن تانىمال: لەوناردو دا ۆينچي, ەينشتەين, اندرەي ساحاروۆ... ولار قانداي ىسكە كىرىسسە دە, جان-جاقتى دانا بولدى. وسىنداي اقىل جۇيەسىندەگى ەرەكشە ويشىلداردىڭ قاتارىنا مەن باتىل تۇردە قانىش ساتباەۆتى قوسامىن», دەگەنىن ۇرپاق جاتتاپ ءوسۋى ءۇشىن قويىلعان سىنتاستاردىڭ ءمان-ماڭىزى ايتپاسا دا تۇسىنىكتى دەپ بىلەمىز.
ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىقوۆ پەن مەملەكەتتىك سىيلىقتىڭ لاۋرەاتى, اقىن نەسىپبەك ايت ۇلى دا جۇرەكجاردى لەبىزدەرىن ورتاعا سالدى. مۇندا قانىشقا ارناپ پوەما جازعان اقىننىڭ شۋماقتارى جازىلعان. ءسوزىمىزدى سونداعى شۋماقپەن قورىتامىز:
«بولمىسى سۇتتەن تازا,
نۇردان جارىق,
باقىتتى ساتباەۆتى تۋعان حالىق.
اتاسى سول دەپ قازاق عىلىمىنىڭ
ايتادى سۇراساڭ دا كىمنەن بارىپ».
