تورعاي مۇراجايلار كەشەنىنىڭ ديرەكتورى گۇلبانۋ سارسەكەيدىڭ ايتۋىنشا, بۇل پاتەفوندى اقاڭ لەنينمەن كەزدەسۋگە بارعان ساپارىندا ماسكەۋ قالاسىنان ساتىپ الىپ كەلگەن.
1988 جىلى الاش ارىستارى اقتالعاننان كەيىن سول كەزدەگى تورعاي وبلىستىڭ پارتيا كوميتەتىنىڭ يدەولوگيا جونىندەگى حاتشىسى وزبەكالى جانىبەكوۆ, اۋدان حاتشىسى جاقان قوساباەۆ پەن ولكە تاريحىنىڭ بىلگىرى عازيز امىرقان ۇلى سىندى ازاماتتار باستاپ, قالىڭ جۇرت قوشتاپ, بۇكىل ەل بولىپ اقشالاي-مالداي قور جيناپ, تورعايدا احاڭ مەن جاقاڭا ارنالعان مۋزەيدى اشادى. اقاڭنىڭ پاتەفونى سول كەزدە الماتىدان كەلگەن العاشقى جادىگەرلەردىڭ ءبىرى بولسا كەرەك.
– قارجى جينالىپ, مۋزەي عيماراتى دايىن بولعان سوڭ, ءار جاققا ارنايى ادامدار جىبەرىلىپ, كىمدە نە بار ەكەنىن سۇراستىرىپ, جادىگەر ىزدەستىرۋ, مۋزەي قورىن تولىقتىرۋ جۇمىستارى باستالادى. سول كەزدە شولپان اپامىزدان ەڭ ءبىرىنشى كەلگەن دۇنيە – وسى اياۋلى اقاڭنىڭ الاقانىنىڭ تابى قالعان كونە پاتەفون ەدى. احمەت بايتۇرسىن ۇلى لەنينگە دالا قازاقتارىنا جاڭا وكىمەتتە بولىپ جاتقان جاڭالىقتاردى ءبىلىپ وتىرۋ ءۇشىن قۇرال كەرەك قوي. ول ءۇشىن, ەڭ ءبىرىنشى كەزەكتە, ەل تىڭدايتىن گرامموفوندار مەن پاتەفوندار, كۇيتاباقتار بولۋ كەرەك دەگەن تالاپ قويىپ, قازاق دالاسىنا تۇڭعىش رەت راديونى اكەلگەنىن جاقسى بىلەسىزدەر. شولپان احمەتقىزى ساقتاپ, جەتكىزگەن بۇل پاتەفون كەيىن ءبىراز ۋاقىت الماتىداعى قازىرگى احمەت بايتۇرسىن ۇلىنىڭ مۋزەي-ۇيىندە تۇرعان, – دەدى گۇلبانۋ سارسەكەي.
مۋزەيدە پاتەفون سويلەتىپ, مۋزىكا تىڭداپ وتىرعان اقاڭ مەن ءبادريساپا انانىڭ, ولاردىڭ ورتاسىندا تۇرعان شولپاننىڭ دا ءمۇسىنى تۇر.
قوستاناي وبلىسى
