باسقارما وكىلدەرىنىڭ ايتۋىنشا, تۇرعىنداردىڭ سۇرانىسىن قاناعاتتاندىرۋ ماقساتىندا كومىر قورى تولىقتىرىلۋدا. جالپى, وبلىس بويىنشا 34 كومىر تۇيىعى مەن 4 قويما بار. تۇرعىندار قىسقى ماۋسىم كەزىندە ورتاشا ەسەپپەن 487,8 مىڭ توننا كومىر تۇتىنسا, بۇگىندە ونىڭ جارتىسىنان كوبى (315,9 مىڭ توننا) جەتكىزىلگەن. تۇيىقتار مەن قويمالاردا 15,5 مىڭ توننا قاتتى وتىن قورى بار. بيىل قاراجىرا رازەزىنەن كومىر جەتكىزۋ جوسپارى – 229,8 مىڭ توننا, شۇباركول رازەزىنەن – 258 مىڭ توننا. سوندىقتان ماماندار كومىر تاپشىلىعى بولمايتىنىن ايتادى.
«قىستىڭ قامىن جاز ويلا» دەمەكشى, قاقاعان ايازدان قىسىلماي شىعۋ ءۇشىن حالىقتىڭ باسىم بولىگى ەرتە باستان قامدانادى. ماسەلەن, مامىر-تامىز ايلارىندا 130 مىڭ توننادان استام كومىر ساتىلىپتى. ال قازان ايىنا جەتكىزۋ جوسپارى 64,5 مىڭ توننانى قۇراسا, ازىرگە جەتكىزىلگەنى – 6,5 مىڭ توننا.
وبلىسقا تاۋلىگىنە ورتاشا ەسەپپەن 23 ۆاگون, ناقتىراق ايتساق, 1 587 توننا قاتتى وتىن كەلىپ تۇسۋدە. جولدا كەلە جاتقان 124 ۆاگون (8 556 توننا) كومىر بار. ونىڭ 66 ۆاگونى – «شۇباركول», 58 ۆاگونى – «قاراجىرا» كومىرى. اۋدان جانە قالا اكىمدىكتەرىنىڭ اقپاراتى بويىنشا قويمالار مەن تۇيىقتاردا ءبىر توننا كومىردىڭ ورتاشا باعاسى 14 800-23 مىڭ تەڭگە ارالىعىندا بولماق.
ال تالدىقورعان قالاسى بويىنشا 11 تۇيىق جۇمىس ىستەپ تۇر. بۇگىنگە دەيىن قالا بويىنشا 30 مىڭ توننادان استام قاتتى وتىن ساتىلىپتى. جولدا 3 795 توننا بار.
«تۇرعىنداردى كومىرمەن قامتۋ ماسەلەسى اركەز ءبىزدىڭ نازارىمىزدا», دەگەن جاۋاپتى ماماندار قازىر تۇيىقتاردا قاتتى وتىننىڭ قورى جەتكىلىكتى ەكەنىن ايتادى. قاراپايىم حالىق جەتپەي قالعان كومىردى قىستا دا الۋى مۇمكىن. سوندىقتان تۇيىقتاردا كومىر قورى ۇنەمى قاداعالاۋدا بولادى.
جەتىسۋ وبلىسى
