ويتكەنى تاجىريبە الماسۋ ءۇشىن ۆولونتەرلىك قوزعالىس جەتەكشىلەرىنىڭ باسقوسۋى قاي ەلگە دە بولماسىن پايدالى بولماق. ەستەرىڭىزدە بولسا, وتكەن جىلى «اسىل جۇرەك» رەسپۋبليكالىق ەرىكتىلەر سلەتى ۇيىمداستىرىلدى. پرەزيدەنتتىڭ كەلەر جىلى استانادا اوسشك ەلدەرى ەرىكتىلەر قوزعالىستارى جەتەكشىلەرىنىڭ جيىنىن وتكىزۋ ۇسىنىسى وسى تۇرعىدان الىپ قاراعاندا وتە جاقسى يدەيا. سەبەبى سوڭعى بىرنەشە جىلدا ەلىمىزدە ۆولونتەرلىك جوبالار مەن ۇيىمداردىڭ سانى كوبەيگەنىن كورىپ وتىرمىز. حالىقتىڭ ۆولونتەرلىك قوزعالىستارعا قاتىسۋى كۇن سايىن ارتىپ كەلەدى. ەرىكتىلەر تەك جاستاردان عانا قۇرالمايدى, مىسالى, ستۋدەنتتەر نەمەسە وقۋشىلار عانا ەمەس, سونىمەن قاتار ورتا جاستان اسقان قازاقستاندىقتار دا ۆولونتەرلەر قۇرامىندا ءجۇر.
الەمنىڭ ءارتۇرلى ەلدەرىندەگى ۆولونتەرلىك قوزعالىستاردىڭ وزىندىك ەرەكشەلىكتەرى, وزىندىك تاجىريبەسى جانە قالىپتاسۋ تاريحى بار. قوزعالىس جەتەكشىلەرى ءوز تاجىريبەلەرىمەن, جۇمىس ناتيجەلەرىمەن بولىسەتىن وسىنداي حالىقارالىق دەڭگەيدەگى باسقوسۋدىڭ وتكىزىلۋى ءتيىمدى بولماق. ەرىكتىلەر قابىلەتتەرىن ارتتىرۋ ءۇشىن شەبەرلىك ساباقتارىنا, ترەنينگتەرگە قاتىسا الادى.
مەملەكەت باسشىسى ۇسىنعان ەرىكتىلەر توبى قازاقستاندىقتاردىڭ ازاماتتىق بەلسەندىلىگىن دامىتۋعا, ەل تۇرعىندارى ءۇشىن يگى جانە پايدالى ىستەردى جاساۋ داستۇرگە اينالۋى ءۇشىن پايدالى بولماق. پاندەميا كەزىندە قازاقستاندىق ۆولونتەرلەردىڭ كومەككە مۇقتاج جاندارعا قالاي قولۇشىن سوزىپ, قولداۋ كورسەتكەنىن كوردىك, بۇل بارىنە ۇلگى بولارلىق قاسيەت. وسى تۇرعىدان الىپ قاراعاندا ەرىكتىلەر قوزعالىسى كوشباسشىلارىنىڭ كەزدەسۋى ازاماتتىق بەلسەندىلىكتى ارتتىرادى دەپ سەنىممەن ايتا الامىن.
رەگينا ايۋپوۆا,
قوعامدى جاڭعىرتۋدى الەۋمەتتىك زەرتتەۋ ورتالىعىنىڭ قىزمەتكەرى
