كوللاجدى جاساعان امانگەلدى قياس, «ەQ»
بۇل تۋرالى Kapital.kz اتالعان رەيتينگ اگەنتتىگىنە سىلتەمە جاساي وتىرىپ حابارلادى. رەسەيلىك بانكتەردىڭ نارىقتان ىعىسۋىنان سوڭ ەلدەگى بەس ءىرى بانكتىڭ دەپوزيتى 2022 جىلدىڭ 1 قاڭتارىنداعى 67 پايىزدان 2022 جىلدىڭ 1 ماۋسىمىندا 72 پايىزعا دەيىن ۇلعايعان.
«قارجىلاندىرۋ كوزدەرى ءۇشىن ءىرى ويىنشىلار مەن جاقسى قارىز الۋشىلار اراسىنداعى باسەكەلەستىكتىڭ ارتۋى ولاردىڭ مولشەرلەمەگە اسەر ەتۋ مۇمكىندىگىن ءبىرشاما شەكتەيدى. بانك سەكتورىنداعى كونتسەنتراتسيانىڭ ارتۋى شاعىن بانكتەرگە قيىندىق تۋدىرادى. ءىرى بانكتەر ءوز جۇيەلەرىن, تەحنولوگياسىن جەتىلدىرۋگە بەلسەندى ينۆەستيتسيا سالىپ, جەدەل وزگەرىپ جاتقان نارىق ۇستانىمدارىنا ساي ءوز پراكتيكاسىن بەيىمدەپ وتىرادى. ولار جاڭا تەحنولوگيالاردى ءبىرىنشى بولىپ قابىلداۋدىڭ ارتىقشىلىعىن پايدالانادى, ال كىشىگىرىم ويىنشىلار نارىقتىڭ تارتىمدىلىعى از سەگمەنتتەرىنە قاراي ىعىسىپ كەتەدى», دەلىنگەن شولۋدا.
اگەنتتىك ساراپشىلارىنىڭ اتاپ وتۋىنشە, قازاقستاندىق جانە حالىقارالىق نارىقتاعى تەحنولوگيالىق ترانسفورماتسيا ناتيجەسىندە قازاقستاندىق بانك سەكتورى جاعىمسىز اسەر تاۋەكەلىنە ۇشىرادى دەپ ەسەپتەمەيدى.
«سونداي-اق جوعارى تەحنولوگيالار سەگمەنتىندەگى نارىق قاتىسۋشىلارى ءداستۇرلى بانكتەرمەن باسەكەگە تۇسەدى دەپ ايتا المايمىز. قازاقستاننىڭ جەتەكشى بانكتەرى كليەنتتەردىڭ تسيفرلى تەحنولوگيالارعا قاتىستى سۇرانىستارىن جەتكىلىكتى دەڭگەيدە قاناعاتتاندىرىپ وتىر. قازاقستاننىڭ قارجى جۇيەسى باسەكەگە شەكتەۋلى دەپ باعالانادى. بانك سەكتورىنىڭ كاپيتالىنداعى مەملەكەت ۇلەسى 10 پايىزدان اسپايدى. مەملەكەتتىڭ بانكتەردىڭ قىزمەتىنە ىقپالى نەگىزىنەن مەملەكەتتىك ۇيىمداردىڭ دەپوزيتتەرىن كوممەرتسيالىق بانكتەر اراسىندا ءبولۋ جانە سۋبسيديالانعان ستاۆكالار بويىنشا تۇپكىلىكتى قارىز الۋشىلارعا نەسيە بەرۋ ءۇشىن ءارتۇرلى مەملەكەتتىك قولداۋ باعدارلاماسى بويىنشا بانكتەرگە ۇزاقمەرزىمدى نەسيەلەر بەرۋ تۇرىندە جۇزەگە اسىرىلادى», دەپ جازادى اگەنتتىك.
سونىمەن قاتار اگەنتتىك اسا جاعىمدى ەمەس ماكروەكونوميكالىق كورسەتكىشتەر اياسىندا ەل ەكونوميكاسىنا نەسيە تاۋەكەلى اسا جوعارى دەپ باعالايدى. S&P-نىڭ بازالىق ستسەناريى بويىنشا 2022-2023 جىلدارى قازاقستاندىق بانكتەردىڭ رەزەرۆتى قالىپتاستىرۋعا كەتەتىن شىعىنى 1,7-2,0 پايىزدى قۇرايدى. ولاردىڭ باعالاۋىنشا, سوڭعى ءبىر جىلدا پروبلەمالىق اكتيۆ كولەمى ءبىرشاما ازايدى جانە الداعى 2 جىلدا جيىنتىق نەسيە پورتفەلىنىڭ 7-10 پايىزىن قۇراماق.
ء«بىز بولشەك نەسيەلەندىرۋ 2022 جىلى نومينالدى ماندە شامامەن 20-25 پايىزعا وسەدى دەپ كۇتەمىز. بۇل ەڭ الدىمەن, مەملەكەتتىك سۋبسيديالانعان يپوتەكالىق نەسيەلەردى بەرۋ ەسەبىنەن بولماق. ۇكىمەت يپوتەكالىق نەسيەلەۋدى سۋبسيديالاۋ باعدارلاماسىنا 1 ترلن تەڭگە ءبولدى. سونداي-اق 2022 جىلى جاڭا نەسيەلەۋدىڭ جىلدىق ءوسىمى 10-12 پايىز بولادى دەپ كۇتەمىز. بۇل يپوتەكا مەن بولشەك نەسيەلەۋ ارقىلى مۇمكىن بولماق. 2022 جىلدىڭ ءبىرىنشى جارتىسىندا جەكە تۇلعالاردىڭ نەسيە كولەمى – 11,5 پايىزعا, تۇتىنۋشىلىق نەسيەلەر – 7,6 پايىزعا, يپوتەكالىق نەسيەلەر 17,1 پايىزعا ارتتى. ءبىزدىڭ پايىمداۋىمىزشا, بولشەك نەسيەگە دەگەن سۇرانىس قاناعاتتاندىرىلدى, ەندى ول جىل سوڭىنا تامان بىرتىندەپ تومەندەي بەرەدى», دەيدى اگەنتتىك.
ساراپشىلاردىڭ بولجاۋىنشا, ەل ەكونوميكاسىنىڭ دامۋ قارقىنى 2021 جىلعى 4,1 پايىزدان بيىل 3 پايىزعا دەيىن تومەندەيدى. بۇعان سەبەپ – مۇناي ءوندىرىسى نارىعىنداعى قۇلدىراۋ جانە جوعارى ينفلياتسيا.
اگەنتتىك: «الداعى ءۇش جىل بەدەرىندە قازاقستان ەكونوميكاسىنىڭ ءوسىمى جىلدىق 4 پايىزدان ءسال تومەن قالىپتاسادى. تەڭىز كەن ورنىنىڭ كەڭەيۋى مۇناي وندىرىسىنە ايتارلىقتاي اسەر ەتىپ, بۇل ءوز كەزەگىندە ەكونوميكالىق وسىمگە ىقپال جاسايدى. ال رەسەي-ۋكراينا قاقتىعىسىنىڭ ەكونوميكالىق وسىمگە اسەرى ازىرگە «قالىپتى» دەڭگەيدە. الايدا رەسەي – قازاقستاننىڭ اسا ءىرى ساۋدا سەرىكتەسى جانە تاۋارلار مەن قىزمەتتەردى جەتكىزۋشى ەل. قازاقستاننىڭ بۇكىل يمپورتىنىڭ 35 پايىزى رەسەيگە تيەسىلى. ال رەسەيگە ەكسپورت بۇكىل جيىنتىق ەكسپورتتىڭ 9 پايىزىن قۇرايدى. رف-نىڭ قانت پەن استىق ەكسپورتىنا تىيىم سالۋى, تەڭگە كۋرسىنىڭ تومەندەۋى قازاقستانداعى تاماق ونىمدەرى باعاسىنىڭ كۇرت شارىقتاپ كەتۋىنە اكەلىپ سوقتى», دەپ مالىمدەدى.
