ىرىكتەۋ كەزەڭنىڭ العاشقى تۋر ويىنىن ەلوردادا وتكىزىپ, سلوۆەنيا قۇراماسىن سەنىمدى تۇردە جەڭگەن (2:0) ريكاردو كاكا جاتتىقتىراتىن ۇلتتىق قۇراما جىگىتتەرى چەرنوگوريادا ارالاس قۇراممەن ويناسا دا, جانكۇيەرلەردى جەرگە قاراتقان جوق. سىرت الاڭداعى ماتچقا جاراقاتتارىنا بايلانىستى نەگىزگى قۇرامنىڭ ءبىر ەمەس, ءتورت بىردەي ويىنشىسى قاتىسا المادى. اتاپ ايتار بولساق, بيىل نيدەرلاندتا وتكەن ەۋروپا چەمپيوناتىنىڭ ۇزدىك سۇرمەرگەنى ءبىرجان ورازوۆ (7 گول), سلوۆەنيامەن بولعان ويىندا گول سوققان دۋگلاس جانە سول ماتچتا پاركەتكە شىققان تاجىريبەلى فۋتزالشىلارىمىز شىڭعىس ەسەنامانوۆ پەن 2021 جىلعى قازاقستاننىڭ ۇزدىك ويىنشىسى داۋرەن تۇرساعۇلوۆ ۇلتتىق قۇراماعا كومەكتەسە المادى.
ەسەسىنە, بۇل ماتچتا بىرقاتار قازاقستاندىق جاس فۋتبولشىلار وزدەرىن كورسەتۋگە مۇمكىندىك الدى. ادەتتە ماڭىزدى ويىنداردا جاستاردى الاڭعا شىعارا بەرمەيتىن ريكاردو كاكا پودگوريتساداعى كەزدەسۋدە قوسالقى قاقپاشى نۇرالەم بايدۋللادان باسقا بارلىق ويىنشىنى پاركەتكە شىعاردى. ونىسى تۇسىنىكتى. سەبەبى كاكا دۋگلاس, تاينان سەكىلدى جاسى كەلىپ قالعان قۇراماداعى ارداگەر فۋتزالشىلاردىڭ ورنىن باسادى-اۋ دەگەن ءىزباسارلاردىڭ قارىم-قابىلەتىن قازىردەن-اق تەكسەرىپ جاتىر. ويتكەنى الداعى ەكى-ءۇش جىلدا قازاقستان قۇراماسىن بۋىن الماسۋ پروتسەسى جۇرەتىنى بەلگىلى. دۋگلاستار قاشانعا دەيىن دوپ تەبە بەرەدى دەيسىز؟!
بالكىم, ەكى جىلدان كەيىن جالاۋى جەلبىرەيتىن الەمدىك دودادا نەگىزگى قۇرامنان كەشە پاركەتكە شىققان رايىمبەك جۇما, اقجول ءدارىباي, سەرىك ءماجيتوۆ سەكىلدى جاس ورەندەرىمىزدى كورىپ قالارمىز. دەگەنمەن, جاس جىگىتتەر چەرنوگورياعا قارسى ويىندا گول سوعا الماسا دا, جامان ويىن كورسەتتى دەپ ايتا المايمىز. باستىسى – قاتەلىك جاساماي, جاتتىقتىرۋشىنىڭ تاپسىرماسىن تولىق ورىنداپ شىقتى.
قازاقستان مەن چەرنوگوريا فۋتزالشىلارى بۇعان دەيىن بىردە-ءبىر رەت ءوزارا ويىن وتكىزبەگەن سوڭ, ەكى قۇراما دا العاشقى تايمدا «سىرىن بىلمەيتىن اتتىڭ سىرتىنان جۇرمە» دەگەندەي, وتە ساقتىقپەن وينادى. كەزدەسۋدىڭ 11-مينۋتىندا لەو ەسەپ اشىپ, قازاقستان قۇراماسىن العا شىعارعاننان كەيىن عانا ويىن جاندانا باستادى. كوبىنە قارسى شابۋىلعا يەك ارتقان الاڭ يەلەرى ارادا التى مينۋت وتكەندە تارازى باسىن تەڭەستىردى. گول اۆتورى – فيليپ ماركوۆيچ. ءبىرىنشى كەزەڭنىڭ اياقتالۋىنا ءبىر مينۋت قالعاندا ەدسون دالدىك تانىتىپ, تابلوداعى كورسەتكىشتى 1:2-گە جەتكىزدى. ءبىر قىزىعى, العاشقى تايمداعى ءۇش گولدىڭ ۇشەۋى دە ويىن جاعدايىندا ەمەس, ستاندارتتان سوعىلدى.
ءۇزىلىس ۋاقىتىندا كاكادان كەرەكتى اقىل-كەڭەستى تىڭداپ شىققان جەرلەستەرىمىزدىڭ ەكىنشى تايمداعى ويىنى تۇرلەنىپ شىعا كەلدى. ءبىرىنشى تايمدا گول سوعاتىن بىرنەشە مۇمكىندىگىن پايدالانا الماعان البەرت اقبالىقوۆ, تاينان ەكىنشى 20 مينۋتتا ءوز ەنشىلەرىنە ءبىر-ءبىر گولدان جازدى. سونداي-اق ارنولد كناۋب تا ءبىر مارتە مەرگەندىگىمەن كوزگە ءتۇستى. قورىتىندى ەسەپ – 1:5.
قاتارىنان ەكى ماتچتا ءىرى ەسەپپەن جەڭىلگەن چەرنوگوريا (ولار العاشقى تۋردا سلوۆەنيادان 3:1 ەسەبىمەن ۇتىلعان) ىرىكتەۋ كەزەڭنىڭ كەلەسى ساتىسىنا شىعۋدان تۇبەگەيلى ءۇمىتىن ءۇزدى. سەبەبى ەليتالى راۋندقا تەك توپ كوشباسشىسى عانا شىعادى. العاشقى ەكى تۋردا ۇپايدان شاشاۋ شىعارماعان قازاقستان قۇراماسى 6 ۇپايمەن ءبىرىنشى ورىنعا مىقتاپ جايعاسىپ الدى. ەكىنشى ورىنداعى سلوۆەنيادا ءالى ءۇمىت بار. ولاردىڭ ەنشىسىندە ءۇش ۇپاي بار.
ەندى قازاقستان قۇراماسى كەلەسى تۋر ويىنىن 9 قاراشادا الماتىدا ءدال وسى چەرنوگوريامەن وتكىزەدى. ەگەر جەرلەستەرىمىز بۇل ويىندا دا جەڭىسكە جەتىپ, سوڭعى تۋردا سلوۆەنيامەن تەڭ تۇسسە دە ىرىكتەۋدىڭ ەليتالى كەزەڭىنە جولداما الادى. سوڭعى تۋر ماتچى 2023 جىلدىڭ 8 ناۋرىزىنا جوسپارلانعان.
