بيىل بەسىنشى رەت ۇيىمداستىرىلعان ازيا بىرىنشىلىگىنە قازاقستاننىڭ ەكى ۇجىمى – «الاتاۋ ارۋلارى» جانە «دوستىق», وزبەكستاننىڭ «ۋزبەچكا», يراننىڭ «فۋلاد موباراكە», ءۇندىستاننىڭ «ت.سپورتس», كۋۆەيتتىڭ ء«ال-كۋراين» جانە كورەيانىڭ «شۋگار گليدەرس» كوماندالارى قاتىستى. ءاۋ باستا بۇل دودادا يراقتىڭ «زانكو» جانە ەلوردانىڭ «نۇر-سۇلتان» كلۋبتارى دا ونەر كورسەتۋى ءتيىس ەدى. الايدا ەكى ۇجىم دا ءتۇرلى سەبەپپەن ازيا چەمپيوناتىنا قاتىسۋدان باس تارتتى.
ءسويتىپ, جەتى كوماندا ءبىر توپتا باق سىناپ, ءبىر-بىرىمەن اينالمالى جۇيە بويىنشا باس جۇلدەنى ساراپقا سالدى. جارىس قورىتىندىسى بويىنشا التى ماتچتىڭ بارلىعىندا قارسىلاستارىنان باسىم تۇسكەن كورەيانىڭ «شۋگار گليدەرس» كلۋبى 12 ۇپايمەن ازيا چەمپيونى اتاندى. ەكىنشى ورىندى جارىس بارىسىندا تەك كورەيالىق كلۋبقا عانا ەسە جىبەرگەن الماتىنىڭ «دوستىعى» (10 ۇپاي) يەلەنسە, ءۇشىنشى ورىنعا تاعى ءبىر قازاقستاننىڭ كومانداسى – «الاتاۋ ارۋلارى» (8) تابان تىرەدى. ولار – «دوستىق» پەن «شۋگار گليدەرستەن» جەڭىلىپ قالدى. كەيىنگى ورىندارعا «ۋزبەچكا», «فۋلاد موباراكە», ء«ال-كۋراين» جانە «ت.سپورتس» كلۋبتارى جايعاستى.
گاندبولدان ايەلدەر اراسىنداعى كوماندالىق ازيا چەمپيوناتى وسىمەن ءتورتىنشى مارتە قازاقستاندا وتكىزىلدى. ءوز جەرىمىزدە ۇيىمداستىرىلعان ءۇش بىرىنشىلىكتىڭ ەكەۋىندە «قايسار» كومانداسى جەڭىسكە جەتكەن بولسا, كەيىنگى جىلى «الماتى» كلۋبى باس بايگەگە يە بولعان ەدى. ال 2017 جىلى وزبەكستاندا وتكەن سارى قۇرلىق باسەكەسىندە جەرگىلىكتى اگمك كومانداسىنىڭ مەرەيى ۇستەم بولدى. جىل سايىن جارىستى قابىلداۋشى ەلدىڭ كوماندالارى توپ جاراتىن ازيا چەمپيوناتىندا بيىل يگى ء«داستۇر» بۇزىلىپ, تۇڭعىش رەت شەتتەن كەلگەن ەلدىڭ كلۋبى وزا شاپتى.
ءار ەكى جىل سايىن وتكىزىلىپ كەلگەن ازيا چەمپيوناتى جوسپار بويىنشا 2020 جىلى ۇيىمداستىرىلۋى ءتيىس ەدى. الايدا جارىس پاندەمياعا بايلانىستى ءبىر جىلعا كەيىن شەگەرىلىپ, 2021 جىلى دا جاعداي ونشا تۇراقتالماعان سوڭ تاعى دا ءبىر جىلعا قالدىرىلعان بولاتىن. ءسويتىپ بيىل اراعا ءۇش جىل سالىپ چەمپيونات قايتا جالعاسىن تاپتى.
