سەنات توراعاسى ماۋلەن اشىمباەۆ سەناتور اقىلبەك كۇرىشباەۆتىڭ باسقا جۇمىسقا اۋىسۋىنا بايلانىستى دەپۋتاتتىق وكىلەتتىگىن توقتاتۋ تۋرالى ءوتىنىشىن جەكە ءوزى بەرگەنىن اتاپ ءوتتى. ورتالىق سايلاۋ كوميسسياسى بۇل ءوتىنىشتى قاراپ, سەناتقا ءتيىستى ۇسىنىس ەنگىزدى.
«قازاقستان رەسپۋبليكاسى پارلامەنتى سەناتىنىڭ دەپۋتاتى كۇرىشباەۆ اقىلبەك قاجىعۇل ۇلى قىزمەتتىك مىندەتتەرىن ءوز ەركىمەن بوساتۋ تۋرالى ءوتىنىش بەردى. قازاقستان رەسپۋبليكاسىنىڭ ورتالىق سايلاۋ كوميسسياسى «قازاقستان رەسپۋبليكاسىنىڭ پارلامەنتى تۋرالى» قر كونستيتۋتسيالىق زاڭىنىڭ 24-بابىنىڭ 3 جانە 8-تارماقتارىنا سايكەس قازاقستان رەسپۋبليكاسى كونستيتۋتسياسىنىڭ 52-بابى بويىنشا ۇسىنىم جاسادى. قازاقستان جانە ونىڭ دەپۋتاتتارىنىڭ مارتەبەسى سەنات دەپۋتاتى اقىلبەك كۇرىشباەۆتىڭ وتىنىشىنە بايلانىستى ونىڭ وكىلەتتىگىن مەرزىمىنەن بۇرىن توقتاتۋ تۋرالى ماسەلەنى شەشسىن», دەپ اتاپ ءوتتى جالپى وتىرىستا ورتالىق سايلاۋ كوميسسياسىنىڭ مۇشەسى شاۆكات وتەمىسوۆ.
دەپۋتاتتار ءتيىستى قاۋلى قابىلدادى.
«اقىلبەك قازىعۇل ۇلى سەناتتىڭ زاڭ شىعارۋ جۇمىسىنا ۇلەس قوستى. دەپۋتاتتىق ساۋالدار ارقىلى حالىقتى تولعاندىرعان ماڭىزدى ماسەلەلەردىڭ وڭ شەشىلۋىنە بەلسەنە اتسالىستى. حاتشى رەتىندە كوميتەت جۇمىسىن ءتيىمدى ۇيىمداستىرۋعا ۇلكەن ۇلەس قوستى. اتقارىلعان جۇمىستار ءۇشىن اقىلبەك قاجىعۇل ۇلىنا سەنات باسشىلىعى اتىنان العىسىمىزدى بىلدىرەمىز. ونىڭ دەپۋتاتتىق قىزمەتىن جوعارى باعالاعان پالاتا بيۋروسى اقىلبەك قاجىعۇل ۇلىن سەناتتىڭ قۇرمەت گراموتاسىمەن ماراپاتتادى», دەدى ماۋلەن اشىمباەۆ.
