كەزىندە كۇرەس تۇرلەرىمەن كاسىبي تۇردە اينالىسىپ, تالاي دودادا توماعاسى سىپىرىلعان ارداگەر بالۋانداردىڭ تارتىستى كۇرەسى سپورت كەشەنىنە جينالعان جانكۇيەرلەردىڭ كوڭىلىنەن شىقتى دەۋگە بولادى. ويتكەنى بوزكىلەممەن قوشتاسسا دا, بۇرىنعى بالۋاندار ءالى دە بابىندا ەكەن.
قارا تەڭىز جاعالاۋىندا وتكەن قارا كۇش يەلەرىنىڭ بەلدەسۋىندە قازاقستاندىق بالۋانداردىڭ بىرقاتارى تۇعىر بيىگىنەن كورىندى. اتاپ ايتار بولساق, گرەك-ريم كۇرەسىنەن قازاقستان چەمپيوناتىنىڭ بىرنەشە دۇركىن جۇلدەگەرى, حالىقارالىق تۋرنيرلەردە تابىستى ونەر كورسەتكەن شىمكەنتتىك بالۋان جولدىباي توقباەۆ الەم چەمپيوناتىندا التىننان القا تاعىپ, بولگاريادا ءانۇرانىمىزدى شىرقاتتى. 62 كيلو سالماقتا بەلدەسكەن وتانداسىمىز ەر جىگىتكە ءتان جىگەر كورسەتىپ, چەمپيوناتتاعى كوزدەگەن ماقساتىنا جەتتى.
«بيىلعى الەم چەمپيوناتىنا تىڭعىلىقتى دايىندالىپ, ناعىز سپورتتىق بابىمدا باردىم. بىرىنشىلىككە دەيىن «وسى بالۋانمەن بەلدەسىپ قالام-اۋ» دەپ ءار قارسىلاسىما جەكە-جەكە تاكتيكا قۇرىپ, دايىندالدىم. مىنە, تىنىمسىز ەڭبەكتىڭ ارقاسىندا وسىنداي جەڭىسكە جەتىپ وتىرمىن. فينالدا ارداگەرلەر اراسىنداعى بىلتىرعى الەم چەمپيوناتىنىڭ جەڭىمپازى مىسىرلىق بالۋاندى ءبىر ۇپاي ايىرماشىلىعىمەن تىزە بۇكتىرىپ, التىن جۇلدەگە قول جەتكىزدىم», دەيدى ج.توقباەۆ.
