«جىل سايىن ءبىزدىڭ ورتالىق «الجير» مەموريالدى كەشەنىنە ارنالعان كورمە ۇيىمداستىرادى. ماقسات – قازىرگى جانە كەيىنگى ۇرپاققا «الجير» تاريحى مەن سول جىلدارى بولعان سۇمدىقتاردى تانىتا ءتۇسۋ. بۇگىنگى كورمەگە حح عاسىردىڭ باسىنداعى قازاق زيالىلارىنىڭ جەكە زاتتارى, ولارعا قاتىستى قۇجاتتار, سۋرەتتەرى مەن كيىم-كەشەك تاعى باسقا قۇندى دۇنيەلەر قويىلعان. سونداي-اق ءبىزدىڭ ورتالىق سول ۋاقىتقا تيەسىلى ءالى اشىلماعان دۇنيەلەردى زەرتتەۋدى قولعا الماقپىز. تاعدىرى «الجير» لاگەرىمەن بايلانىستى تۇلعالارعا قاتىستى ءالى اشىلماعان قانشاما دۇنيە بار», دەدى مادەنيەت جانە سپورت مينيسترلىگى سيرەك كىتاپتار جانە قولجازبالار ۇلتتىق ورتالىعىنىڭ ديرەكتورى جاندوس بولدىقوۆ.
ايتا كەتەيىك, «الجير» مەموريالدى كەشەنىنەن اكەلىنگەن تاريحي قۇندى جادىگەرلەر, قۇجاتتار مەن زاتتار كورمەسىن قالا تۇرعىندارى مەن قوناقتارى قازان ايىنىڭ سوڭىنا دەيىن تەگىن تاماشالاي الادى.
«وزدەرىڭىز بىلەتىندەي, «الجير» لاگەرى قالانىڭ سىرتىندا ورنالاسقان. كولىك ماسەلەسى بار, ەكىنىڭ ءبىرى بارىپ كورە المايدى. سوندىقتان ءبىز كەلۋشىلەرگە ىڭعايلى بولۋى ءۇشىن كورمەنى قالاعا الىپ كەلىپ, ۇيىمداستىرىپ وتىرمىز», دەيدى ورتالىق باسشىسى.
مادەني ءىس-شاراعا زيالى قاۋىم مەن قۋعىن-سۇرگىن قۇرباندارىنىڭ ۇرپاقتارى – تۇرار رىسقۇلوۆتىڭ, جانايدار مەن ەليزاەۆەتا سادۋاقاسوۆتاردىڭ, ماريا ەسقاراەۆانىڭ, شاقتاي ءتاتىموۆانىڭ نەمەرەلەرى قاتىستى.
