مەملەكەت باسشىسى بيىلعى جولداۋىندا قوعامدىق كەڭەستەر قىزمەتىن قايتا فورماتتاۋعا قاتىستى قۇزىرلى ورگاندارعا ناقتى تاپسىرما بەردى. وسى ورايدا اقپارات جانە قوعامدىق دامۋ مينيسترلىگى ءتيىستى جۇمىستار جۇرگىزىپ, قاجەتتى شارالار قابىلداپ جاتقانىن ايتادى. بۇگىندە ەلىمىزدەگى قوعامدىق كەڭەستەردىڭ قۇرامىندا 4 مىڭعا جۋىق ادام بار.
«قوعامدىق كەڭەس – مەملەكەتتىك ورگاندار قىزمەتىنىڭ اشىقتىعىن قامتاماسىز ەتۋگە باعىتتالعان ازاماتتىق قوعام ينستيتۋتتارىنىڭ ءبىرى. «قوعامدىق كەڭەستەر تۋرالى» زاڭعا سايكەس كونسۋلتاتيۆتىك-كەڭەسشى ورگاندار قۇقىقتىق مارتەبەگە يە جانە ءوز قىزمەتىن تاۋەلسىزدىك, دەربەستىك, اۆتونومدى جانە جاريالىلىق قاعيداتتارىنا ساي جۇزەگە اسىرادى. بۇگىنگى تاڭدا قازاقستاندا 256 قوعامدىق كەڭەس ءوز قىزمەتىن رەسپۋبليكالىق جانە جەرگىلىكتى دەڭگەيدە اتقارىپ كەلەدى. سونداي-اق قوعامدىق كەڭەستەردى كۆازيمەملەكەتتىك ۇيىمدار قۇرادى. قازىر قوعامدىق كەڭەستەردىڭ قۇرامىنا 4 مىڭعا جۋىق ادام تارتىلعان, ونىڭ 86 پايىزى ازاماتتىق قوعام وكىلى», دەدى ازاماتتىق قوعام ىستەرى كوميتەتىنىڭ توراعاسى ماديار قوجاحمەت.
وسى جىلدىڭ 9 ايىندا قوعامدىق كەڭەستەردىڭ جاڭارتىلعان قۇرامى 1 020 وتىرىس وتكىزىپ, بىرقاتار ۇسىنىس جاساعان. ء«وز وكىلەتتىكتەرىن ىسكە اسىرۋ شەڭبەرىندە بارلىق دەڭگەيدەگى قوعامدىق كەڭەستەر ازاماتتاردىڭ قۇقىقتارىنا, بوستاندىقتارى مەن مىندەتتەرىنە قاتىستى 3 مىڭعا جۋىق نورماتيۆتىك-قۇقىقتىق اكتىلەردىڭ جوبالارىن قاراپ, شەشىمدەرىن جاريالادى. اۋىز سۋمەن جابدىقتاۋ, سانيتارلىق-ەپيدەميولوگيالىق جاعدايدى جاقسارتۋ, مەملەكەتتىك قىزمەت كورسەتۋ ساپاسى جانە ت.ب. ماسەلەلەر بويىنشا 300-دەن استام قوعامدىق تىڭداۋ ۇيىمداستىرىلدى. رەسپۋبليكالىق جانە جەرگىلىكتى مەملەكەتتىك ورگانداردىڭ 500-گە جۋىق باسشىسىنىڭ ەسەپتەرى تىڭدالدى», دەدى كوميتەت توراعاسى.
«قوعامدىق كەڭەستەردىڭ ءرولى زور, اسىرەسە بۇل قۇرىلىمنىڭ بيۋدجەت جۇيەسىن رەتكە كەلتىرىپ, قارجىنى بەلگىلەنگەن ماقساتتا جۇمسالۋىنا تيگىزەر پايداسى كوپ. وكىنىشكە قاراي, كەيبىر مينيستر, اكىمدەر ولاردىڭ قىزمەتىن دۇرىس باعالاي بىلمەيدى», دەيدى Eurasian Expert Council قوعامدىق قورىنىڭ پرەزيدەنتى, مەملەكەتتىك قىزمەت ىستەرى بويىنشا قوعامدىق كەڭەستىڭ مۇشەسى شىڭعىس لەپسىباەۆ. ونىڭ ايتۋىنشا, قوعامدىق كەڭەستەردىڭ ارالاسۋىمەن بىرقاتار وڭىردە تۇرعىن-ءۇي كوممۋنالدىق شارۋاشىلىق بولىمدەرىنىڭ جۇمىسى رەتكە كەلتىرىلگەن. «وعان قاراعاندى قالاسى اكىمدىگىنىڭ اتالعان ءبولىمى مىسال بولا الادى. سونداي-اق تەمىرتاۋ قالاسىندا قوعامدىق كەڭەس مۇشەلەرى جاڭا مەكتەپ سالۋ جۇمىسىنا ارالاسىپ, بيۋدجەتتەن بولىنگەن قارجىنى سول ماقساتقا عانا جۇمسالۋىن قامتاماسىز ەتىپ, نىساننىڭ سمەتالىق قۇجاتىندا كورسەتىلگەن بارلىق تالاپ-ەرەجەلەرگە ساي بولۋىن قاداعالادى», دەدى سپيكەر.
مەملەكەت باسشىسىنىڭ جولداۋىن ىسكە اسىرۋ جانە ينستيتۋتتىڭ قىزمەتىن جەتىلدىرۋ ماقساتىندا 14 قازاندا ەلوردادا قوعامدىق كەڭەستەردىڭ رەسپۋبليكالىق ءماجىلىسى وتەدى. ءىس-شاراعا بارلىق وڭىرلەردەن 250 ادام قاتىسادى دەپ جوسپارلانىپ وتىر. «پلەنارلىق سەسسيا بارىسىندا ء«بىرىنشى جانە ەكىنشى شاقىرىلىم» قىزمەتىنىڭ قورىتىندىلارى, قوعامدىق كەڭەس مۇشەلەرىنىڭ باقىلاۋ قىزمەتى, سونداي-اق قوعامدىق كەڭەستەردىڭ قىزمەتى تۋرالى باياندامانىڭ جوباسى تالقىلانادى. سونداي-اق ءتۇرلى پانەلدىك سەسسيالار وتەدى. ءماجىلىس قورىتىندىسى بويىنشا قوعامدىق كەڭەستەر ينستيتۋتىنىڭ قىزمەتىن ودان ءارى جەتىلدىرۋ بويىنشا ۇسىنىمدار ازىرلەنەدى», دەدى م.قوجاحمەت.
