ءوزىن بانك قىزمەتكەرىمىن دەپ تانىستىرعان قاسكويلەر قىزىلجارلىق كەلىنشەككە قوڭىراۋ شالىپ, ونىڭ اتىنا قىلمىسكەرلەردىڭ نەسيە راسىمدەگەلى جاتقانىن ايتىپ شوشىتقان. «قىلمىسقا توسقاۋىل قويۋ ءۇشىن وزىڭىزگە نەسيە الىپ, اقشانى كورسەتىلگەن شوتقا سالۋىڭىز قاجەت» دەگەن ەرتەگىگە سەنگەن ايەل الاياقتاردىڭ نۇسقاۋىمەن بەس بانكتەن زايم راسىمدەگەن...
سولتۇستىكقازاقستاندىق پوليتسيا قىزمەتكەرلەرى الماتىلىق ارىپتەستەرىمەن بىرلەسە وتىرىپ, وسى قىلمىسقا قاتىسى بار ءبىر توپ ادامدى انىقتادى. تەرگەۋ-تەكسەرۋ جۇمىستارىنىڭ ناتيجەسىندە پەتروپاۆلدا الماتىنىڭ ەكى تۇرعىنى سوت الدىندا جاۋاپ بەردى. ولار الاياقتىق جولمەن تاپقان تابىستارىن توپتىڭ باسقا مۇشەلەرىنە جىبەرىپ وتىرعان. قارجى تەحنولوگيالارىن جەتىك بىلەتىن 30 جاستاعى قىلمىسكەر بۇرىن بانكتە جۇمىس ىستەگەن ەكەن, ول جابىرلەنۋشىلەردەن تۇسكەن اقشانى بىردەن كريپتوۆاليۋتاعا اينالدىرىپ وتىرعان.
سوت ۇكىمىمەن 30 جاستاعى قىلمىسكەر – 4, ال ونىڭ «ارىپتەسى» 3,5 جىل مەرزىمگە باس بوستاندىعىنان ايىرىلدى. وسىلايشا, پوليتسيا ءىت قىلمىسكەرلەردى اشكەرەلەۋدىڭ جولىن تاۋىپ, ءىستى سوتقا جەتكىزدى. وسىنىڭ ءوزى ۇلكەن جەتىستىك.
ال بۇعان دەيىن سولتۇستىك قازاقستان سوتى ينتەرنەت ارقىلى قىلمىس جاساعان بىرنەشە قىلمىسكەرگە سوت ۇكىمىن شىعارعان ەدى. سونىڭ ىشىندە قالالىق سوتتىڭ سۋدياسى س.ليتفۋللينا 21 جاستاعى د.قۇلجاباەۆ (تەگى وزگەرتىلدى) دەگەن الاياقتى 3 جىلعا باس بوستاندىعىنان ايىردى. سوت ۇكىمىنە قاراپ وتىرىپ, ەرىكسىز تاڭعالاسىڭ. سەبەبى ورتا عانا ءبىلىمى بار, جاپ-جاس جىگىت وزىنەن الدەقايدا ۇلكەن, ومىرلىك تاجىريبەسى مول 13 ادامدى الداپ, بىرەۋىنە 10, تاعى بىرەۋىنە 20 مىڭ تەڭگە اقشا بەرىپ, ءوزىنىڭ ايتقانىنا وڭاي كوندىرىپ كەلگەن. اككى جىگىت قۇرباندارىنىڭ بارىنە قىلمىستىق سحەمانىڭ ءبىر-اق جولىن قولدانعان. ماسەلەن, ول ە.ءسادۋ (تەگى وزگەرتىلدى) دەگەن ازاماتقا www.technodom.kz سايتى ارقىلى «Technodom Operator» اق-تا جسن-ءدى عانا كورسەتىپ تاۋارلى-كرەديت الۋعا بولاتىنىن ايتادى. ال كرەديت ارتىنان جويىلادى دەپ سەندىرەدى. «ويتكەنى مەن تاپسىرىسىمنان باس تارتامىن, سوندا قارىز اقشا بازادان ءوشىپ قالادى» دەپ سەندىرەدى. سونىمەن بىرگە «ەشقاشان تاپپاسىن» دەپ سول جەردە سيم كارتاسىن دا اۋىستىرىپ بەرەدى. 10 مىڭ تەڭگەگە قىزىققان ە.ءسادۋ ونىڭ ايتقانىنا كونىپ, ءوزىنىڭ تەلەفونىن د.قۇلجاباەۆتىڭ قولىنا ۇستاتادى. ال اناۋ ءسادۋدىڭ تەلەفونىنان ونىڭ جسن ارقىلى 12 اي مەرزىمدىك كرەديتپەن قۇنى 180 مىڭ تەڭگە تۇراتىن «Samsung Galaxۋ ا52» تەلەفونىن الۋعا «فريدوم فينانسپەن» سىرتتان كەلىسىمشارت جاسايدى. سوسىن ەكەۋى تەحنودوم دۇكەنىنە كەلىپ, ساتۋشىدان قىمبات تەلەفون الادى. ە.ءسادۋ قۇلجاباەۆتان العان 10 مىڭ تەڭگە ولجاسىنا ءماز بولىپ قالا بەرەدى, ال قۇلجاباەۆ ۇيالى تەلەفوندى قالتاسىنا باسقان كۇيى زىم-زيا بولادى. نەسيەنىڭ ايلىق وتەۋ مەرزىمى كەلىپ, «فريدوم فينانس» ءوزىن مازالاي باستاعاندا عانا ە.ءسادۋ ءوزىنىڭ وڭباي الدانعانىن ءبىلىپ, سانىن ءبىر-اق سوعادى...
ءدال وسى جولمەن د.قۇلجاباەۆ بارلىعى 13 ادامدى سازعا وتىرعىزىپ كەتكەن. كوبىنە بىرەۋدەن, ال ەكى ادامعا ەكى-ەكىدەن, بارلىعى 3 136 816 تەڭگەگە 15 قىمبات تەلەفون العىزىپ, ولاردى قولدى قىلعان الاياق ولجاسىنىڭ ءبارىن قالانىڭ «سيتي-مولل» دۇكەنىنە, كوكشەتاۋ, استانا قالالارىنىڭ سۋپەرماركەتتەرىنە جانە بازاردا ارزانىراق باعاعا ساتىپ جىبەرگەن. ماركاسى مەن ءنومىرى بەلگىلى بولعاندىقتان دۇكەندەردە ساتىلعان كەيبىر تەلەفوندار الاياقتىق جولمەن قولعا تۇسكەندىكتەن ساتىپ الۋشىدان الىنىپ, ىسكە تىركەلگەن. ءسويتىپ, ايدالاداعى جازىقسىز جاندار دا بۇل الاياقتىقتان جاپا شەككەن. مىسالى, يۋ.گروموۆ دەگەن ازامات وسىنداي تەلەفوننىڭ ءبىرىن استانا قالاسىنداعى «ەسىل» دۇكەنىنەن ساتىپ العان. ارتىنان پوليتسيا ونى تاۋىپ, ىسكە تىركەۋ ءۇشىن تەلەفوندى تاركىلەگەن. سوندىقتان ساتۋشى وعان ءدال سونداي باسقا تەلەفون بەرۋگە ءماجبۇر بولعان...
قاراپايىم, ءتىپتى قارادۇرسىن دەپ ايتۋعا بولاتىن وسى الاياقتىق ءادىس-ايلا جيىرما شاقتى ادامنىڭ باسىن قاڭعىرتىپ قويعان. وسىنىڭ وزىنەن-اق ادامداردىڭ جوق نارسەگە سەنەتىن اڭقاۋلىعىن كورۋگە بولادى. جسن كورسەتىلىپ تۇرعان جەردەن ەشكىم دە جازادان جالتارا المايتىنىن تۇسىنگەن ءجون.
ينتەرنەت الاياقتىقتىڭ تاعى ءبىر كوپ تاراعان مىسالى بار. وتكەن تامىز ايىندا پەتروپاۆل قالالىق سوتى تاعى ءبىر جاپ-جاس جىگىت ر.مالدىبەكتى سوتتادى (تەگى وزگەرتىلگەن). شىعىس قازاقستان وبلىسىنا قاراستى ءۇرجار اۋدانىنىڭ 23 جاستاعى تۋماسى 51 ادامدى سازعا وتىرعىزعان. ءوزى 2021 جىلى 3 جىل التى ايعا سوتتالىپ, مەرزىمىنەن بۇرىن شىققان ەكەن.
ر.مالدىبەكتىڭ الاياقتىعى ءتىپتى قاراپايىم. ول 2021 جىلدىڭ قاڭتار ايىنان باستاپ, 2022 جىلدىڭ اقپانىنا دەيىن ءبىر جىل بويى وLح ارقىلى «الماتى قالاسىندا ارزان باعاعا ۇستەل, ورىندىقتار جاسايمىز» دەگەن حابارلاندىرۋ تاراتادى. حابارلاندىرۋعا «جۇتىنعان» جيھازداردىڭ سۋرەتىن دە سالىپ, تەلەفون ءنومىرىن كورسەتىپ قويادى. دۇكەندەگى جيھازداردىڭ باعاسى ۋداي بولعاندىقتان جيھازعا زار بولىپ جۇرگەن جاندار حابارلاسا باستايدى. ر.مالدىبەك الدىمەن ولارعا جيھازدىڭ باعاسىن, بۇعان ۇيگە جەتكىزۋ قوسىلاتىنىن ايتىپ, سونىڭ جارتى قۇنىن ءوزىنىڭ كاسپي بانكتەگى كارتوچكاسىنا اۋدارۋدى سۇرايدى. وسىدان كەيىن ۇستەل, ورىندىق الۋشىلاردىڭ ءبارى اقشالارىن اۋدارا باستايدى. داندەگەن مالدىبەك ەندى Instagram جەلىسىندە Mebel ءelىt, Cold meۆەl سياقتى اككاۋنتتار اشىپ, ولارعا حابارلاسقانداردان دا «جاسالۋعا» ءتيىستى جيھازدىڭ جارتى اقشاسىن الىپ وتىرادى. ءوزىنىڭ ازدى-كوپ جيھاز تسەحىندا ىستەگەن تاجىريبەسىن پايدالانىپ, كاسىبي تىلدە قالاي سويلەۋدى دە ەركىن مەڭگەرىپ العان. ءسويتىپ, جازىقسىز جانداردىڭ 4 ملن تەڭگەدەي اقشاسىن قولدى قىلعان.
بىراق پوليتسيا سوڭىنا تۇسكەن سوڭ ول 2022 جىلدىڭ اقپان ايىندا الماتىدان پەتروپاۆلعا قاشىپ, ءىزىن سۋىتپاق بولادى. بىراق مۇنداعى پوليتسيا قىزمەتكەرلەرى الماتىلىق ارىپتەستەرىنىڭ سۇرانىمىمەن ونى ۇستاپ, ءىستى سوتقا دەيىن جەتكىزدى. قالالىق سوتتىڭ سۋدياسى ا.ءاشىموۆ اقىرى ر.مالدىبەكتى قىلمىستىق ءىستىڭ 51 ەپيزودى بويىنشا سوتتاپ, بۇرىنعى وتەلمەگەن مەزگىلىن ەسكەرىپ, 6 جىل سەگىز اي مەرزىمگە باس بوستاندىعىنان ايىردى.
«وسىنداي ىستەردەن حالىق قۇلاعدار بولۋى كەرەك. سوندا ساقتىق شارالارىن دا كۇشەيتەدى. ايتپەسە, تولىپ جاتقان ەسكەرتۋگە قۇلاق اسپاي جۇرە بەرەدى», دەيدى ءبىزدى وسى ىستەرمەن تانىستىرعان سولتۇستىك قازاقستان وبلىستىق سوتىنىڭ توراعاسى ەربول جانعازين.
سولتۇستىك قازاقستان وبلىسى
