Picodi.com كومانداسى iPhone 14 Pro-نىڭ (128 GB) جەرگىلىكتى باعاسىن ءار ەلدەگى جالاقى مولشەرىمەن سالىستىرا قاراپ, ايفوننىڭ يندەكسىن ەسەپتەپ شىعارعان. قازاقستاندا بۇل سمارتفوننىڭ بازالىق كومپلەكتاتسياسى 699 990 تەڭگە تۇرادى. ال اقش-تاعى تازا باعاسى – 999 دوللار. بىراق بۇل باعا ساتۋدان تۇسكەن سالىق 0 پايىز بولاتىن ءتورت شتاتتا عانا وزەكتى بولىپ سانالادى.
سوڭعى رەسمي دەرەكتەر بويىنشا قازاقستاندا ورتاشا ستاتيستيكالىق جالاقى 312 011 تەڭگەنى (قولعا تيەتىنى 251 401 تەڭگە) قۇرايدى. وسىلايشا, ورتاشا ستاتيستيكاعا يە قازاقستاندىق iPhone 14 Pro ساتىپ الۋ ءۇشىن 58,5 كۇن جۇمىس ىستەۋى كەرەك ەكەن. ياعني بۇكىل جيعان-تەرگەن اقشاسىن تۇگەل سمارتفون ساتىپ الۋعا جۇمسايدى دەگەن ءسوز. بىلتىرمەن سالىستىرعاندا جۇمىس ىستەيتىن مەرزىم 4,3 كۇنگە ازايعان.
سوڭعى بەس جىلداعى قازاقستانداعى ايفون يندەكسى كەلەسىدەي كورىنىس تابادى: 2018 جىلى – 86 كۇن; 2019 جىلى – 76,5 كۇن; 2020 جىلى – 74,6 كۇن; 2021 جىلى – 62,8 كۇن; 2022 جىلى – 58,5 كۇن. سوڭعى شىققان ايفوندى بارىنەن بۇرىن ەڭ جىلدام ساتىپ الۋشى – شۆەيتساريا ازاماتتارى. بۇل ەلدىڭ تۇرعىندارىنا قاجەتتى سومانى جيناۋ ءۇشىن نەبارى 4,6 كۇن كەرەك. امەريكالىق ازامات 5 كۇننەن ءسال اسىرا جۇمىس ىستەپ قاجەتتى قاراجاتتى تاۋىپ الاتىن بولسا, اۋستراليالىق ءبىر اپتا تىنباي ەڭبەك ەتۋى ءتيىس.
ەڭ ناشار كورسەتكىش تاجىكستانعا تيەسىلى. بۇل ەلدىڭ ورتاشا ستاتيستيكالىق ازاماتى 179,5 كۇن جۇمىس ىستەۋى كەرەك. سوڭىنان ساناعاندا ەكىنشى جانە ءۇشىنشى ورىنداردا تۇركيا (146,7 كۇن) مەن قىرعىزستان (136,3 كۇن) ورنالاسقان.
«iPhone 2022 يندەكسى جەرگىلىكتى Apple دۇكەندەرىندە نەمەسە رۇقسات ەتىلگەن ساتۋشىلاردا كورسەتىلگەن iPhone 14 Pro (128 گب جادى بار) رەسمي باعالارى نەگىزىندە ەسەپتەلدى. ورتاشا جالاقى تۋرالى اقپارات مەملەكەتتىك ستاتيستيكا ورگاندارىنىڭ نەمەسە ءتيىستى
مينيسترلىكتەردىڭ ۆەب-سايتتارىنان الىندى جانە بەلگىلى ءبىر ەلدەگى iPhone باعاسى جاريالانعان ساتتە وزەكتى بولىپ سانالادى. سالىقتى شەگەرگەندەگى جالاقى مولشەرى جەرگىلىكتى جالاقى كالكۋلياتورى ارقىلى ەسەپتەلدى. ايلىق جالاقىنى ءبىز ءبىر ايداعى ورتاشا جۇمىس كۇنى – 21 كۇنگە بولدىك», دەلىنگەن Picodi.com حابارلاماسىندا.
