جەرەبە تاڭداپ بەرگەن جوعارىداعى بەس قارسىلاستىڭ ۇشەۋىمەن قازاقستان فۋتبولشىلارى بۇعان دەيىن ءتۇرلى دەڭگەيدەگى تۋرنيرلەردە بىرنەشە رەت كەزدەسكەنىن جانكۇيەرلەر جاقسى بىلەدى. بۇل جولعى ىرىكتەۋدە سولتۇستىك يرلانديا جانە سلوۆەنيا قۇرامالارى ءبىز ءۇشىن جاڭا قارسىلاس بولماق. دەگەنمەن قازاقستاننىڭ 19 جاسقا دەيىنگى قۇراماسى بىلتىر ەۋروپا چەمپيوناتىنىڭ ىرىكتەۋ كەزەڭىندە سولتۇستىك يرلانديا فۋتبولشىلارىمەن ءبىر توپتا ونەر كورسەتكەن. وكىنىشكە قاراي, ەكى ويىندا دا جەرلەستەرىمىز 1:2 جانە 1:3 ەسەبىمەن جەڭىلىپ قالعان ەدى. بالكىم, ەرەسەكتەر قۇرامامىز ىنىلەرىنىڭ ەسەسىن قايتارىپ قالار.
ماماندار تاراپىنان «ن» توبىنىڭ كوشباسشىسى دەپ باعالانىپ جاتقان دانيامەن قازاقستان قۇراماسى وسىمەن ءۇشىنشى مارتە ءبىر توپتا ويناعالى تۇر. العاش رەت 2006 جىلعى الەم چەمپيوناتىنىڭ ىرىكتەۋىندە ەكى قۇرامانىڭ جولدارى ءتۇيىسىپ, ەكى ماتچتا دا دانيا فۋتبولشىلارى جەڭىسكە جەتكەن بولاتىن. كوپەنگاگەندە الاڭ يەلەرى 3:0 ەسەبىمەن باسىم تۇسسە, الماتىداعى ماتچتا جەرلەستەرىمىز 1:2 ەسەبىمەن جول بەردى. اراعا 11 جىل سالىپ ەكى قۇراما 2018 جىلى رەسەيدە وتكەن الەم چەمپيوناتىنىڭ ىرىكتەۋىندە تاعى كەزدەستى. بۇل جولعى ويىنداردا دا دانيا قۇراماسىنىڭ مەرەيى ۇستەم بولدى – 4:1, 3:1.
1992 جىلى ەۋروپا چەمپيونى اتانعان دانيا قازىرگى تاڭدا فيفا رەيتينگىندە 10-ورىندا تۇر. قۇرامانى جەرگىلىكتى مامان كاسپەر يۋلمانن 2020 جىلدان بەرى جاتتىقتىرىپ كەلەدى.
فينليانديا فۋتبولشىلارىمەن دە «ارا قاتىناسىمىز» جاقسى ەمەس. سەبەبى بۇعان دەيىن سۋومي ەلىنىڭ وكىلدەرىمەن ءبىزدىڭ قۇراما الەم جانە ەۋروپا چەمپيوناتتارىنىڭ توپتىق كەزەڭدەرىندە ءتورت مارتە كەزدەسىپ, بارلىعىندا جەڭىلىپ قالعان. تەك 2006 جىلى ۇيىمداستىرىلعان ءبىر عانا جولداستىق كەزدەسۋدە قۇرامالار تەڭ تارقاسقان. فينليانديا قازىرگى كەزدە الەمدىك رەيتينگتە 56-ورىندا تۇر. جۋىردا عانا مارەسىنە جەتكەن ۇلتتار ليگاسىندا ولار «ۆ» ديۆيزيونىندا بوسنيانى العا جىبەرىپ, ءوز توبىندا ەكىنشى ورىنعا تابان تىرەگەن بولاتىن.
«ن» توبىنىڭ اۋتسايدەرى رەتىندە ايتىلىپ جاتقان سان-مارينو قۇراماسىمەن دە بۇعان دەيىن توپتىق كەزەڭدە ويناعانبىز. 2020 جىلعى ەۋروپا چەمپيوناتىنىڭ ىرىكتەۋىندە ءبىزدىڭ جىگىتتەر ەكى ماتچتا دا ءىرى ەسەپپەن جەڭىسكە جەتكەن. استانادا وتكەن العاشقى ويىندا جەرلەستەرىمىز قارسىلاس قۇرامانىڭ قاقپاسىنا جاۋاپسىز ءتورت گول سوققان بولسا, سان-مارينوداعى قارىمتا كەزدەسۋدە 3:1 ەسەبىمەن تىزە بۇكتىرگەن ەدى.
فرانكفۋرتتەگى جەرەبە تارتۋ راسىمىنە ارنايى بارعان قازاقستان ۇلتتىق قۇراماسىنىڭ باس جاتتىقتىرۋشىسى ماگومەد اديەۆ قفف ءباسپاسوز قىزمەتىنە سۇحبات بەرىپ, ەۋرو-2024 ىرىكتەۋ كەزەڭىنىڭ جەرەبەسىنە قاتىستى ءوز پىكىرىن ورتاعا سالدى.
– قارسىلاستاردى قيىن دەپ ايتۋعا بولادى. بۇگىنگى تاڭدا وڭاي قارسىلاس جوق. وتە مىقتى توپقا تۇستىك دەپ ويلايمىن. ويتكەنى ناقتى كوشباسشى قۇراما جوق. دەگەنمەن دانيا فۋتبولى قازىر دامۋدىڭ داڭعىل جولىنا شىقتى. ولاردىڭ جاس ويىنشىلارىنىڭ دەڭگەيى وتە جوعارى. دات فۋتبولشىلارى توپتىڭ ءفاۆوريتى بولادى دەپ ويلايمىن. قارسىلاستار تۋرالى مالىمەتتەردى بىرتىندەپ جيناي باستايمىز. ءبىزدى الدا قيىن ءارى قىزىقتى ويىندار كۇتىپ تۇر. باسەكەگە توتەپ بەرۋگە تىرىسامىز, – دەيدى م.اديەۆ.
گەرمانيا وسىمەن ەكىنشى رەت ەۋروپا چەمپيوناتىن ءوز ەلىندە قابىلداماق. ماتچتار 2024 جىلدىڭ 14 ماۋسىمى مەن 14 شىلدەسى ارالىعىندا بەرلين, كەلن, دورتمۋند, ديۋسسەلدورف, فرانكفۋرت, گەلزەنكيرحەن, گامبۋرگ, لەيپتسيگ, ميۋنحەن جانە شتۋتگارت قالالارىنداعى ستاديونداردا وتەدى.
ايتا كەتەيىك, 2024 جىلعى ەۋروپا چەمپيوناتىنىڭ ىرىكتەۋ كەزەڭى 2023 جىلدىڭ ناۋرىز ايىندا باستالادى. جاڭا ىرىكتەۋ ءتۋرنيرىن قازاقستان قۇراماسى 2023 جىلدىڭ ناۋرىز ايىندا ءوز الاڭىندا سلوۆەنيامەن جانە دانيامەن قارسى ماتچتارمەن باستايدى.
ەۋرو-2024 ىرىكتەۋ كەزەڭىنىڭ ويىن كۇنتىزبەسى (استانا ۋاقىتىمەن)
23.03.2023 | 20:00
قازاقستان – سلوۆەنيا
26.03.2023 | 19:00
قازاقستان – دانيا
16/17.06.2023 | 00:45
سان-مارينو – قازاقستان
19/20.06.2023 | 00:45
سول.يرلانديا – قازاقستان
07.09.2023 | 20:00
قازاقستان – فينليانديا
10.09.2023 | 19:00
قازاقستان – سول.يرلانديا
14/15.10.2023 | 00:45
دانيا – قازاقستان
17/18.10.2023 | 00:45
فينليانديا – قازاقستان
17.11.2023 | 20:00
قازاقستان – سان-مارينو
20/21.11.2023 | 00:45
سلوۆەنيا – قازاقستان
