- بيىل جالپى 5,5 مىڭ گەكتار ءتاتتى ءتۇبىر القابىنان 214,4 مىڭ توننا ءونىم جينالادى دەپ جوسپارلانۋدا. قازىرگى ۋاقىتقا دەيىن 160 گەكتار القاپتان 12 946 مىڭ توننا ءونىم جينالسا, ونىڭ 11 076 تونناسى قانت زاۋىتتارىنا وتكىزىلدى. وبلىس بويىنشا ءار گەكتاردان الىنعان ورتاشا ءونىم 630 تسەنتنەردى قۇراۋدا. جيناۋ جۇمىستارىنا 30-دان اسا تەحنيكا جۇمىلدىرىلعان.
جالپى 2022 جىلى قانت قىزىلشاسى ءونىمىنىڭ ساتىپ الۋ باعاسى تونناسىنا 30,0 مىڭ تەڭگەنى قۇرايدى. ياعني, قانت زاۋىتى وتكىزىلگەن ءونىمنىڭ تونناسىنا - 15,0 مىڭ تەڭگە تولەسە, مەملەكەت تاراپىنان - 15,0 مىڭ تەڭگە سۋبسيديا تولەنەدى. ال, 2023 جىلى باعا 40,0 مىڭ تەڭگەگە كوتەرىلەدى. اتاپ ايتقاندا, قانت زاۋىتى قىزىلشانىڭ ءار تونناسىنا 15,0 مىڭ تەڭگە تولەسە, مەملەكەتتىك قولداۋ 25 مىڭ تەڭگەگە جەتەدى. ناتيجەسىندە ءتاتتى ءتۇبىر القابى كەلەسى جىلى 10,0 مىڭ گەكتارعا جەتكىزىلەدى, - دەيدى ە. جيەنقۇلوۆ.
سونداي-اق باسقارما باسشىسىنىڭ ايتۋىنشا, قانت زاۋىتتارى جۇمىستى دۇرىس ۇيىمداستىرىپ وتىرعان بارلىق شارۋالاردىڭ 65-70 پايىزىن تۇقىممەن قامتاماسىز ەتەدى.
قازىرگى تاڭدا ءار گەكتاردان الىناتىن ورتاشا ونىمدىلىك بويىنشا مەركى اۋدانىنىڭ كورسەتكىشى وزگەلەردەن وزىق بولىپ وتىر (800 تس/گا), جامبىل اۋدانىندا – 455 تس/گا, بايزاقتا – 410 تس/گا, شۋ اۋدانىندا – 350 تس/گا قۇراۋدا.
مەركى اۋدانىنداعى «سىپاتاي باتىر» جشس ديرەكتورى قانات شايحيەۆتىڭ ايتۋىنشا, بيىل بالتامىردىڭ شىعىمى جاقسى. وسى جىلى قوجالىق 130 گەكتار القاپقا ءتاتتى ءتۇبىردى ورنالاستىرعان. قازىرگى تاڭدا القاپتىڭ 50-60 گەكتارى جينالعان. ال قانت زاۋىتىنا 3,5 مىڭ توننا ءونىم وتكەرىلگەن.
- بۇعان دەيىن 70-80 گەكتار القاپپەن شەكتەلىپ كەلسەك, بيىل قانت قىزىلشاسى القابىن 130 گەكتارعا دەيىن جەتكىزدىك. بۇل القاپتاردى ۇڭعىمالار ارقىلى جاڭبىرلاتىپ سۋارۋ قوندىرعىسىمەن ىلعالداندىردىق. ونىمدىلىگى جوعارى. الداعى جىلى القاپ كولەمىن 250 گەكتارعا جەتكىزۋ جوسپارىمىزدا بار, - دەيدى سەرىكتەستىك ديرەكتورى.
سەرىكتەستىك تۇقىمدى فرانتسيا مەملەكەتىنەن تاپسىرىسپەن الدىرعان. مۇندا بالتامىردىڭ «ەيدار» سۇرپى ورنالاستىرىلعان.
سونداي-اق قانت قىزىلشاسىن قابىلداۋ جۇمىستارىن قىزۋ اتقارىپ جاتقان «مەركى قانت زاۋىتى» جشس ديرەكتورى نۇرجان قارعاباەۆ بۇگىنگە دەيىن 14 مىڭ توننادان استام بالتامىر جينالعانىن جەتكىزدى. كۇنىنە 2,5 مىڭ توننا ءونىم قابىلدانىپ, شيكىزات قورى جيناقتالۋدا. زاۋىتتىڭ قۋاتتىلىعى تاۋلىگىنە 2,5 مىڭ توننانى قۇرايدى.
- قانت تاپشىلىعىن بولدىرماۋ ماقساتىندا زاۋىت ۇزدىكسىز جۇمىس ىستەۋدە. جينالعان ءتاتتى ءتۇبىردى وڭدەۋدى وسى ايدىڭ 12-ءسى كۇنى باستايمىز. قازىرگى تاڭدا زاۋىتتا 340 ادام جۇمىس ىستەۋدە. وڭدەۋ جۇمىستارى كۇشەيتىلگەندە ولاردىڭ سانىن 550-گە دەيىن جەتكىزەمىز, - دەيدى ول.
