جيىرما ءتورت جاسىندا كسرو حالىق ءارتىسى اتانعان تالانتتى تۇلعانىڭ تۋعانىنا بيىل 110 جىل تولىپ وتىر. قازاق وپەراسىنىڭ نەگىزىن سالۋشىلاردىڭ ءبىرى, مەملەكەتتىك سىيلىقتاردىڭ لاۋرەاتى, كورنەكتى وپەرا ءانشىسى, دراما اكتريساسى, قوعام قايراتكەرى كۇلاش بايسەيىتوۆانىڭ ۇلت تاريحىنداعى جولى ەرەك. بۇلبۇل ءانشى بالا كەزىنەن-اق حالىق اندەرىن تاماشا ورىنداپ, بويىنداعى ارتىستىك شەبەرلىگىمەن كوزگە تۇسە باستاپتى. «قازاقتىڭ بۇلب ۇلى» اتانعان ونەر يەسىنىڭ عۇمىرى بۇگىندە اڭىزعا اينالدى.
ول قازاقستاندىق جانە شەتەلدىك وپەرادا ءتۇرلى وبرازدى سومدادى, ونىڭ ىشىندە ەۆگەني برۋسيلوۆسكيدىڭ «قىز جىبەك» وپەراسىندا جىبەكتىڭ, احمەت جۇبانوۆ پەن لاتيف ءحاميديدىڭ «اباي» وپەراسىندا اجار بەينەسىن, پەتر چايكوۆسكيدىڭ «ەۆگەني ونەگين», دجاكومو ءپۋچچينيدىڭ «چيو-چيو سان» وپەراسىندا باستى رولدەردى وينادى. وسى رولدەر ارقىلى كۇلاش بايسەيىتوۆا كورەرمەننىڭ ىستىق ىقىلاسىنا بولەندى.
اڭىز-عۇمىردىڭ مەرەيتويىنا ارنالعان «بۇلبۇل» كونتسەرتىنىڭ قارسانىڭدا قازاق وركەسترىنىڭ كوركەمدىك جەتەكشىسى جانە باس ديريجەرى, قازاقستاننىڭ ەڭبەك سىڭىرگەن قايراتكەرى ايتقالي جايىموۆپەن از-كەم سۇحباتتاسقان ەدىك.
«قازاق وركەسترى جاڭا ماۋسىمدى كۇلاش اپامىزدىڭ 110 جىلدىق مەرەيتويىنا ارنالعان كەشپەن اشتى. ول كىسى ءدۇيىم جۇرتقا بەلگىلى, ەلىمىزدىڭ اتىن اسقاقتاتقان, حالىق ماقتانىشىنا اينالعان قايتالانباس داۋىس يەسى. بۇلبۇل ءانشى كۇلاش اپامىز 1936 جىلى قازاق مادەنيەتىنىڭ ون كۇندىگىن وتكىزۋ ءۇشىن ەلىمىزدىڭ ونەرپازدارىمەن بىرگە ماسكەۋگە اتتانادى. ونىڭ ورىنداۋشىلىق شەبەرلىگى جوعارى باعالانىپ, جەزتاڭداي ءانشىمىز كوپتىڭ قوشەمەتىنە بولەنگەن بولاتىن. كونتسەرتىمىزدى «بۇلبۇل» دەپ اتاۋىمىز بەكەر ەمەس, سەبەبى اسەم ءۇندى كۇلاش اپامىز قالىڭ جۇرتشىلىققا «بۇلبۇل» ەسىمىمەن تانىلعان ەدى. كەيىنگى ۇرپاق تالانتتى ونەر يەسى ەسىمىن ەشقاشان ۇمىتپايدى دەپ سەنەمىز», دەيدى باس ديريجەر. سونداي-اق ول تالانتتى تۇلعانىڭ رەپەرتۋارى كەڭ ءارى باي ەكەنىن اتاپ ءوتتى.
ء«بىر كونتسەرت باعدارلاماسىندا بارلىق رەپەرتۋاردى ورىنداۋ مۇمكىن ەمەس. كۇلاش اپامىز كۇي اناسى دينا شەشەيمەن وتە جاقسى قارىم-قاتىناستا بولعان. سوندىقتان دينانىڭ «اسەم قوڭىر» كۇيىن ەنگىزىپ وتىرمىز. جامبىل اتانىڭ «كۇلاشقا» ءانى, ەۆگەني برۋسيلوۆسكيدىڭ «قىز جىبەك» وپەراسىنان «گاككۋ», لاتيف ءحاميديدىڭ «قازاق ءۆالسى» مەن «بۇلبۇل», مۇقان تولەباەۆتىڭ ء«بىرجان مەن سارا» وپەراسىنان ايتىس, «اباي» وپەراسىنان اجار ارياسى, «قىز جىبەك» وپەراسىنان «شەگەنىڭ تەرمەسى» ورىندالادى. ودان بولەك كۇلاش بايسەيىتوۆا قۇرمانعازى وركەسترىمەن تىعىز بايلانىستا بولدى. ولار العاشقى گاسترولدىك ساپارلارعا بىرگە بارعان. سونى ەسكەرە وتىرىپ, قۇرمانعازى بابامىزدىڭ «سارىارقا» كۇيىمەن كونتسەرتىمىزدى اياقتايمىز», دەدى ايتقالي جايىموۆ.
ايتا كەتەيىك, كونتسەرتتە قازاقستاننىڭ ەڭبەك سىڭىرگەن قايراتكەرلەرى ارايلىم راحىمقىزى, سۆەتلانا ايتباەۆا, سۇندەت بايعوجين, بيبىگۇل جانۇزاق, «دارىن» مەملەكەتتىك جاستار سىيلىعىنىڭ لاۋرەاتى التىنبەك ءابىلدا, حالىقارالىق جانە رەسپۋبليكالىق بايقاۋلاردىڭ لاۋرەاتتارى فەرۋزا راحمەتوۆا, ايگەرىم امانجولوۆا, ايگەرىم وراز, تالعات اللابيرينوۆ, بوتاگوز ءتاشىموۆا ونەر كورسەتتى.
