ەكىباستۇز – ەلىمىزدىڭ ەنەرگەتيكالىق ورتالىعى. مۇندا بۇكىل قازاقستانداعى ەنەرگيانىڭ 40 پايىزى وندىرىلەدى. كومىرلى شاھارداعى گرەس-1 جانە گرەس-2 ستانسالارى قازاقستاننىڭ ءبىرتۇتاس ەلەكتر ەنەرگەتيكالىق جۇيەسىنىڭ سولتۇستىك جانە وڭتۇستىك ايماعىنىڭ نەگىزگى ەنەرگيا كوزدەرى بولىپ سانالادى. اتالعان ستانسالار الدەقالاي «تۇشكىرەر» بولسا, وزگە نىسانداردىڭ «تۇماۋراتىپ» قالاتىنى دا سوندىقتان. گرەس-1 كاسىپورنىنىڭ ءبىر عانا ەنەرگوبلوگىنىڭ تاۋلىكتىك ءوندىرىسى (9,7 ملن كۆت/ساع) كوكشەتاۋ قالاسىن 24 ساعات بويى جارىقپەن قامتاماسىز ەتۋگە جەتەدى ەكەن. ستانسالاردىڭ قانشالىقتى ماڭىزدى ەكەنىن وسىدان-اق اڭعارا بەرىڭىز. ال مۇندا ارقايسىسىنىڭ قۋاتتىلىعى 500 مۆت بولاتىن 8 ەنەرگوبلوك (ازىرگە جەتەۋى قاتاردا) جۇمىس ىستەيدى. وسىدان كەيىن پاۆلودارلىق كاسىپورىندار ەلەكتر ەنەرگياسىنىڭ دونورى ەكەنىنە ەشكىم ءشۇبا كەلتىرە قويماس. مۇنىڭ شاراپاتىن كورشى مەملەكەتتەر دە سەزىنىپ وتىرعانىن اتاپ وتكەن ءجون.
ەكىباستۇز قالاسىن الەۋمەتتىك-ەكونوميكالىق دامىتۋدىڭ 2025 جىلعا دەيىنگى كەشەندى جوسپارى ازىرلەنىپ, ەل ۇكىمەتىنىڭ ارالاسۋىمەن قوماقتى ينۆەستيتسيا تارتىلعانى بەلگىلى. شاھاردى گۇلدەندىرۋ ءھام تۇرلەندىرۋ ءۇشىن سالالاردىڭ بارلىعى قامتىلعان. ونىڭ ىشىندە ەنەرگەتيكا الدىڭعى قاتاردا تۇر. ەنەرگەتيكا باعىتىندا كاسىپورىنداردىڭ جەكە قاراجاتى ەسەبىنەن 2 ينۆەستيتسيالىق جوبا جۇزەگە اسادى دەپ جوسپارلانىپ وتىر.
وسى ورايدا مەملەكەت باسشىسى ەكىباستۇزداعى كاسىپورىنداردىڭ الەۋەتىن ەرەكشە اتاپ ءوتىپ, جاڭعىرتۋ جۇمىستارىن جالعاستىرۋدى تاپسىردى. ەلەكترەنەرگەتيكالىق جۇيەمەن قاتار, كومىر ءوندىرۋ باعىتىندا تىڭ تەتىكتەردى ىسكە قوسۋدى ايتتى. پاۆلودار وبلىسىنىڭ, سونىڭ ىشىندە ەكىباستۇزدىق كاسىپورىنداردىڭ الەۋەتى زور ەكەنىن ەسكەرسەك, جوسپارلانعان جوبالار ناتيجەلى جۇزەگە اسادى دەگەن سەنىم مول.
سەرىك سادۋاقاسوۆ,
پاۆلودار وبلىسى كاسىپكەرلەر پالاتاسىنىڭ ديرەكتورى
