رۋحانيات • 05 قازان، 2022

Umai ۇلتتىق سىيلىعى ونەر سالاسىنداعى ۇزدىكتەرگە بەرىلەدى

104 رەت كورسەتىلدى

بيىل تۇڭعىش رەت وتاندىق مادەنيەت جانە ونەر قايراتكەرلەرىنىڭ شىعار­ماشىلىق جەتىستىكتەرىن قولداۋ، دامىتۋ جانە ناسيحاتتاۋ ماقساتىندا Umai ۇلتتىق سىيلىعى تاعايىندالعان ەدى. جالپى جۇلدە قورى 54 ملن تەڭگەنى قۇرايتىن سىيلىقتا ءتورت نوميناتسيا بويىنشا 19 جۇلدە تابىس ەتىلەدى. اتاپ ايتساق، «تەاتر ونەرى»، «مۋزىكالىق ورىنداۋشىلىق ونەر»، «حورەوگرافيالىق ونەر»، «تەاترداعى بەينەلەۋ ونەرى». وسىعان وراي ورتالىق كوممۋنيكاتسيالار قىزمەتىندە وتكەن بريفينگتە ونەر سالاسىنداعى العاشقى اۋقىمدى سىيلىقتىڭ شارتتارى مەن مادەنيەت سالاسىنداعى باسقا دا جوبالار تالقىلاندى.

القالى جيىنعا قاتىسقان ما­دەنيەت جانە سپورت ۆيتسە-ءمينيسترى نۇرعيسا داۋەشوۆ بيىلعى بالالار جىلى­نىڭ اياسىندا «ۇزدىك بالالار سپەكتاكلى ءۇشىن» ارنايى جۇلدە تاعايىندالعانىن اتاپ ءوتتى.

«سىيلىق 2022 جىلى قازاقستاننىڭ شىعارماشىلىق ۇجىمدارىنا جانە جەكەلەگەن ونەر قايراتكەرلەرىنە 2020 جىلعى قىركۇيەكتەن باستاپ 2022 جىل­عى شىلدە ارالىعىنا دەيىنگى ەكى تەاتر­لىق، كونتسەرتتىك، شىعارماشىلىق ماۋ­سىمداعى سپەكتاكلدەر، كونتسەرتتەر، شى­عارماشىلىق جوبالار، ونەر تۋىن­دىلارى ءۇشىن تابىستالادى. ال سىي­لىق مولشەرىنىڭ ەڭ تومەنگىسى 2 ملن­ تەڭ­گەدەن باستالىپ، ەڭ جوعارعىسى
10 ملن تەڭگەگە دەيىن بارادى»، دەدى ۆيتسە-مينيستر.

سونداي-اق ونىڭ ايتۋىنشا، «تەاتر ونەرى» نوميناتسياسىنا جالپى سوماسى 22 ملن تەڭگەنى قۇرايتىن جەتى سىيلىق ەنىپ وتىر: «وپەرا ونەرى» (وپە­راداعى ەرلەر جانە ايەلدەر پارتياسى ءۇشىن)، «اكتەرلىك شەبەرلىك» (دراما­لىق نەمەسە مۋزىكالىق-درامالىق سپەك­­­تاكلدەردەگى ەرلەر جانە ايەلدەر رول­­­دەرى ءۇشىن: وپەرەتتا، ميۋزيكل، روك-وپەرا، مۋزىكالىق كومەديادا)، «ۇل­­كەن رەجيسسۋرا»، «سپەكتاكلدىڭ ۇزدىك كور­كەمدىك بەزەندىرىلۋى»، «ۇزدىك مۋزى­كالىق-درامالىق سپەكتاكل».

ودان بولەك جالپى سوماسى 6 ملن تەڭگەنى قۇرايتىن 3 سىيلىقتى «مۋ­زىكالىق-ورىنداۋشىلىق ونەر» نو­مي­ناتسياسىنداعى جەڭىمپازدار الادى: «ۇز­دىك ءداستۇرلى ورىنداۋشى ء(ان ايتۋ)»، «ۇز­دىك ءداستۇرلى ورىنداۋشى (اس­­پاپشى)»، «ۇزدىك مۋزىكالىق انسامبل (كلاسسيكالىق/حالىقتىق)». ال «حو­رەو­گرافيالىق ونەر» نومينا­تسيا­سىندا جالپى سوماسى 18 ملن تەڭ­­گەنى قۇرايتىن بەس اقشالاي جۇلدە انىق­تالدى. ولار «ۇزدىك بي ۇجىمى» (بي انسامبلىنە: حالىق، زاماناۋي جانە ەسترادالىق بيلەر)، «بالەتتەگى ۇزدىك ورىنداۋشى» (ەر/ايەل بالەت ءسوليسى)، «ۇز­دىك حورەوگراف»، «ۇزدىك بالەت سپەك­تاكلى» اتالىمدارى بويىنشا بەرىلەدى.

جالپى سوماسى 6 ملن تەڭگەنى قۇ­رايتىن «بەينەلەۋ جانە ساندىك-قول­دانبالى ونەر» نوميناتسياسى قول­ونەر شەبەرلەرىنە ارنالعان. ولار تاعا­يىن­دالعان سىيلىقتى «ۇزدىك ساندىك-قول­دانبالى ونەر تۋىندىسى» ءۇشىن الادى، ال «بەينەلەۋ جانە ساندىك-قولدان­بالى ونەر» ەكى سىيلىعىنا كوركەم سۋرەت­شىنىڭ/گرافيكا جۇمىسى، سونداي-اق زاماناۋي ونەردەگى (پەرفومانستار، ينستا­لياتسيالار، ارت-نىساندار جانە ت.ب.) جوبالار يە بولادى.

سونىمەن قاتار Umai-2022 سىي­لىعى اياسىندا بالالار جىلىنا وراي­لاستىرىلعان «ۇزدىك بالالار سپەكتاكلى ءۇشىن» 2 ملن تەڭگە كولەمىندەگى ارنايى سىيلىق بايگەگە تىگىلدى.

بريفينگتە ءسوز العان مەملەكەتتىك سىيلىقتىڭ لاۋرەاتى، «استانا وپەرا» مەملەكەتتىك وپەرا جانە بالەت تەاترى ديرەكتورىنىڭ ورىنباسارى تولەۋ­بەك الپيەۆ اتالعان تەاتردىڭ Umai ۇلت­تىق سىيلىعىن وتكىزۋ الاڭى بولىپ وتىر­عانىن اتاپ ءوتتى.

«سىيلىقتان ۇمىتكەر كەز كەلگەن سپەكتاكل، ول ۇلتتىق بولسىن، الدە كلاس­سيكالىق نەمەسە زاماناۋي سپەك­تاكل بولسىن، ونىڭ كرەاتيۆتى شەشى­مى بولۋعا ءتيىس. سونداي-اق ول يننو­ۆا­تسيالىق ەلەمەنتتەردى دە قامتۋى كەرەك. قويىلىمدىق توپتىڭ سپەكتاكلدىڭ مۋزىكالىق بولىگىن اۋىستىرا المايتىنى تۇسىنىكتى، بىراق ۆيزۋالدى بولىگى، ياعني سپەكتاكلدىڭ ستسەنوگرافياسىندا، كوركەمدىك يدەياسىندا، مۋزىكادا، ءارتىستىڭ شەبەرلىگىندە جاڭا كوزقاراس بولۋى قاجەت»، دەدى ول.

ال بەينەلەۋ ونەرى بويىنشا ءسوز سويلەگەن سۋرەتشى-زەرگەر، قازاقستاننىڭ ەڭبەك سىڭىرگەن قايراتكەرى بەرىك ءالىباي ءار ونەر ادامى ءۇشىن مادەنيەت پەن ونەر سالاسىنداعى تۇڭعىش Umai ۇلتتىق سىيلىعىن يەلەنۋدىڭ ماڭىزى زور ەكە­نىن ايتتى.

«جالپى، قول ونەرىنىڭ زەرگەرلىك (التىن، كۇمىس، وڭدەۋ)، ۇستالىق (قارا مەتالدى وڭدەۋ)، اعاش وڭدەۋ، توقىما، كەس­تە­لەۋ، تەرى وڭدەۋ، كيىز باسۋ، كەراميكا جانە ت.ب. تۇرلەرى بار. مىنە، وسىنشاما جان-جاقتى باعىتتا تەر توگىپ جۇرگەن دا­­رىندى ۇمىتكەرلەر كوپ بولارىنا سە­­نىم­دىمىن. سوندىقتان اتالعان نومينا­تسيادا جەڭىمپازدى انىقتاۋ قيىنعا سو­عارى انىق. ەلىمىزدەگى بەينەلەۋ جانە قول­­دانبالى ونەردىڭ بولاشاعىنا زور ۇمىت­­­پەن قارايمىز. سەبەبى بەرىلىپ جات­­­­­قان سىيلىق ونەر ادامدارىن ءبىر قۇل­­­شىن­­­دىرادى دەپ ويلايمىن»، دەدى زەرگەر.

سونداي-اق جيىن بارىسىندا مۋزى­كالىق ونەر باعىتى بويىنشا قازاق­ستاننىڭ ەڭبەك سىڭىرگەن قايراتكەرى، ءانشى ارداق بالاجانوۆا بايانداما جاسادى.

Umai سىيلىعى قازاقستانداعى مادەنيەت جانە ونەر سالاسىندا بۇرىن-سوڭدى بولماعان جاڭاشىلدىق. ول تۋرالى ەستىگەندە، مەنى، ەڭ الدىمەن بايقاۋدا ونەر ادامدارىنا تاقىرىپ تاڭداۋدا ەركىندىك بەرىلگەنى قۋانتتى. باسقا بايقاۋلارداعى سەكىلدى مۇن­دا تاقىرىپتىق شەكتەۋ جوق، كەز كەلگەن ونەر ادامى ءوزىنىڭ يننوۆاتسيالىق تۋىن­دىسىن ۇسىنا الادى. ۇزدىك ءداس­تۇرلى ورىنداۋشىنى تاڭداعان كەزدە ساراپ­تاۋ كوميسسياسىنىڭ مۇشەلەرى ءداستۇرلى انشىلەردىڭ قانداي مەكتەپتەن شىققانىنا، ايماقتىق ەرەكشەلىك­تەرى­نە دە ءمان بەرەدى دەپ ويلايمىن. اتاۋى ايتىپ تۇرعانداي، ءداستۇرلى ونەر تىكە­لەي حالىقتان تاراعان، وعان باسقا ەشقان­داي مادەنيەت ارالاسپاعان»، دەدى ا.بالاجانوۆا.

ايتا كەتەيىك، اتالعان سىيلىققا وتى­نىم­دەردى قابىلداۋ 9 جەلتوقسانعا دەيىن جالعاسادى.

بۇدان بولەك، بريفينگتە جاس وتان­دىق جازۋشىلارعا مەملەكەتتىك قولداۋ كورسەتۋ، جاس اقىندار مەن جازۋشىلارعا جاڭا ەسىمدەردى ۇلىقتاۋ ماقساتىندا جىل سايىنعى «ايبوز» ارنايى ادەبي سىيلىعى تاعايىندالعانى دا ايتىلدى. سونداي-اق 2023 جىلدان باستاپ جىل سايىنعى جاس جازۋشىلار مەن اقىن­دار ءۇشىن ارنايى پرەزيدەنتتىك ادەبي سىيلىق تاعايىنداۋ قاراستىرى­لىپ وتىر­عانى حابارلاندى.

سوڭعى جاڭالىقتار

بۇگىنگى ۆاليۋتا باعامى

قارجى • بۇگىن، 09:55

ۇقساس جاڭالىقتار