بار ءۇمىت – بۋبليكتە

استاناداعى ۇلتتىق تەننيس ورتالىعىندا ورنالاسقان Beeline Arena سپورت كەشەنىندە ءوتىپ جاتقان باسەكەنىڭ ەكىنشى كۇنىندە جارىس جولىنا قازاقستاننىڭ ءبىرىنشى، الەمنىڭ 43-راكەتكاسى الەكساندر بۋبليك شىعىپ، Astana Open ATP 500 ءتۋرنيرىنىڭ ەكىنشى اينالىمىنا جولداما الدى.

ءوز جانكۇيەرلەرىنىڭ الدىندا ونەر كورسەتكەن جەرلەسىمىز العاشقى كەزەڭدە الەمنىڭ 54-را­كەتكاسى نيدەرلاندتىق تاللون گريكسپۋرمەن شەبەرلىك بايقاستى. جالپى، كەشەگى ويىن­عا دەيىن قارسىلاستار ءبىر-بىرى­مەن ءوزارا ەكى رەت كەزدەسىپ، ەكە­ۋىندە دە بۋبليكتىڭ اسىعى ال­شى­سىنان تۇسكەن ەدى. بۇل جو­لى دا الەكساندردىڭ باعى جان­­دى. استاناداعى ماتچتىڭ ءبىرىن­شى پارتياسىندا بۋبليك قار­سىلاسىنا بىردە-ءبىر سەت بەر­مەي، 6:0 ەسەبىمەن جەڭىسكە جەت­تى. ءبىرىنشى كەزەڭ نەبارى 21 مي­نۋت­قا سوزىلدى. ەكىنشى سەتتە ت.گريكسپۋر قاتەلىكسىز ويناپ، تارازى باسىن وزىنە اۋداردى – 6:4. الەكساندر العاشقى سەتتەگى جەڭىسىنەن كەيىن ەركىنسىپ كەت­تى مە، ايتەۋىر بۇل پارتيادا برەيك-پوينتتارىن ۇتىمدى پايدالانا المادى. ەسەسىنە ونداي مۇمكىندىكتەردى قارسىلاسى ءمۇلت جىبەرگەن جوق.

ءۇشىنشى، شەشۋشى پارتيادا ەسەپ 2:1 بولعان مەزەتتە قا­زاقستاندىق تەننيسشى برەيك جاساپ، كەيىننەن ءوز گەيمىندە دە جەڭىسكە جەتتى – 4:1. التىنشى گەيمدە دە تاعى ءبىر برەيك جاساپ، 5:1 ەسەبىمەن پارتيانى اياقتاۋعا جاقىن تۇرعان ەدى. بىراق كەيىنگى ەكى گەيمدە گريكسپۋر دە برەيك جاساپ، ەسەپ ايىرماسىن قىسقارتتى – 5:3. دەگەنمەن الەكساندر دوپتى ويىنعا قوسقان ءوز گەيمىن ءساتتى اياقتاپ، 6:3 ەسە­بى­مەن جەڭىسكە جەتتى. ءبىر ساعات 40 مينۋتقا جال­عاسقان باسەكەدە ا.بۋبليك 15 ەيس جاساپ، 9 برەيك-پوينتتىڭ بەسەۋىن پايدالاندى.

بۋبليك بۇگىن ەكىنشى اينالىمدا الەمنىڭ 10-شى، وسى جارىستىڭ 7-راكەتكاسى پولشا وكىلى حۋ­بەرت حۋركاچپەن كەزدە­سەدى. ول ءبىرىنشى كەزەڭدە ار­گەن­تينالىق فرانسيسكو چەرۋن­دولونى (29) ەكى سەتتە – 6:2، 7:6 ەسەبىمەن تىزە بۇك­تىرگەن بولاتىن.

سونداي-اق الەمنىڭ ءتورتىنشى راكەتكاسى رەسەيلىك دانيل مەد­ۆەدەۆ تە ەكىنشى اينالىمعا جولداما الدى. ول تۇساۋكەسەر كەزدەسۋىندە الەمدىك رەيتينگتە 40-ورىندا تۇرعان يسپانيالىق البەرت راموستى ەكى سەتتە – 6:3، 6:1 ەسەبىمەن ەش قينالماي ۇت­تى. مەدۆەدەۆ ەكىنشى كە­زەڭ­دە فينليانديالىق ەميل رۋسۋ­ۆۋ­وريمەن (53) وينايدى. سونى­مەن قاتار حورۆاتيالىق ما­رين چيليچ تە جارىستى ءساتتى باس­تادى. ول گەرمانيالىق وسكار وتتەنى ءۇش سەتتە – 7:5، 6:7، 6:2 ەسە­بىمەن ءسۇ­رىندىردى.

ال الەمنىڭ ونىنشى راكەتكاسى اندرەي رۋبليوۆ ەكىنشى اينالىمدا قىتايلىق چجيچجەن چجاندى ۇتىپ (6:3، 6:2)، العاش­قىلاردىڭ ءبىرى بولىپ ATP 500 Astana Open ءتۋرنيرىنىڭ شيرەك فينالىنا شىقتى.

جۇپتىق سىندا باق سىناعان قازاقستاندىقتار اندرەي گولۋ­بەۆ پەن الەكساندر نەدو­ۆەسوۆ ءبىرىنشى اينالىمدا فران­تسيا­لىقتار ادريان ماننارينو مەن فابريس مارتەنگە جول بەردى – 6:3، 4:6، 9:11. وسىلايشا، استانا دو­دا­سىن­دا قازاقستاننان تەك ا.بۋب­ليك قانا قالدى.