بيىلعى ءدۇبىرلى دوداعا الەمنىڭ قىرىق مەملەكەتىنەن 170-تەن اسا قاتىسۋشى نيەت ءبىلدىرىپ, ولاردان 300-گە جۋىق شىعارما تۇسكەن. كونكۋرستىڭ كوركەمدىك جەتەكشىسى, قازىلار القاسىنىڭ توراعاسى راحات-بي ابدىساعين ءوز سوزىندە بۇل بايقاۋ ەلىمىز ءۇشىن ۇلكەن ابىروي ەكەندىگىن ايتادى. «ويتكەنى وسى بايقاۋ ارقىلى قازاقستاندى الەمنىڭ كوپتەگەن ەلى جاقىن تاني ءتۇستى. سەبەبى ونەر سايىسىنا گەرمانيا, فرانتسيا, يتاليا, ۇلىبريتانيا, اقش, قىتاي, جاپونيا, وڭتۇستىك كورەيا جانە تمد مەملەكەتتەرىنەن قاتىسۋشىلار بار», دەدى ول.
بايقاۋدىڭ ماقساتى – زاماناۋي اكادەميالىق مۋزىكانى ناسيحاتتاپ, جاس تالانتتاردى قولداپ, ولاردى ىنتالاندىرۋ. بۇعان 35 جاسقا دەيىنگى جاس كومپوزيتورلار سيمفونيالىق, كامەرالىق جانە ۆوكالدىق شىعارمالارىمەن قاتىسىپ, باق سىنايدى. ولاردىڭ تۋىندىلارىن تريستان ميۋراي (فرانتسيا), مارك اندرە (گەرمانيا), الەسساندرو سولبياتي (يتاليا), كلود لەدۋ (بەلگيا), يۋري كاسپاروۆ (رەسەي) سەكىلدى شەتەلدىك تانىمال كومپوزيتورلار ساراپقا سالادى. بايقاۋ ونلاين فورماتتا وتەدى, باستى ەرەكشەلىگى – بارلىق قاتىسۋشىنىڭ ەسىمى ازىرگە بەلگىسىز, ياعني قۇپيا ءسوز ارقىلى قاتىسادى. جەڭىمپازدار 7 قازاندا انىقتالادى.
