قاراعاندى وبلىسىندا «ساران» يندۋستريالىق ايماعى اۋماعىندا تولىق تسيكلدى حيميالىق-فارماتسەۆتيكالىق زاۋىت سالۋ جوباسى تالقىلاندى.
جوبانى حالىقارالىق GMP ستاندارتتارىنا سايكەس جۇزەگە اسىرۋ 170 جۇمىس ورنىن اشۋعا مۇمكىندىك بەرەدى دەپ جوسپارلانۋدا. ءونىم ىشكى جانە جاقىن ماڭداعى نارىقتارعا جەتكىزىلەدى. جوبانىڭ قۇنى 30 ميلليون دوللاردان اسادى.
Tanushree Air Techniques كومپانياسىنىڭ ديرەكتورى اپۋرۆاسينح ءچاۆادا وز سوزىندە قازاقستاندا ءدارى-دارمەك شىعاراتىن زاۋىت اشۋ نيەتى تۋرالى ايتىپ, سونىمەن قاتار كومپانيا ءوندىرىستى ۇيىمداستىرۋمەن قاتار, قازاقستاندىق قىزمەتكەرلەردى جوعارى تەحنولوگيالىق جابدىقپەن جۇمىس ىستەۋدى وقىتۋدى دا ءوز موينىنا الاتىنىنا سەندىردى.
«بىزدە ءۇندىستاننىڭ فارماتسەۆتيكالىق ونەركاسىبىندە 20 جىلدىق تاجىريبەمىز بار, 140-تان استام جوبانى اياقتادىق جانە الەمنىڭ كوپتەگەن ەلدەرىنە ءونىم جەتكىزەمىز. قازاقستاندا ءبىز ورتالىق ازيا ايماعىنداعى ءوندىرىس تىزبەگىن كەڭەيتۋ جوباسىن جۇزەگە اسىرۋدى جوسپارلاپ وتىرمىز», دەدى اپۋرۆاسينح چاۆادا.
ۇلتتىق كومپانيانىڭ باسقارما توراعاسى ءوز كەزەگىندە, ۇكىمەت تاراپىنان سەرىكتەستەردى ينۆەستيتسيالىق الەۋەت پەن فارماتسەۆتيكا سالاسىنداعى شەتەلدىك بيزنەستى قولداۋ شارالارى تۋرالى حابارلاپ, سونداي-اق KAZAKH INVEST قىزمەتى تۋرالى ەگجەي-تەگجەيلى ايتىپ بەردى.
