جيىندا پارتيالىقتار الداعى پرەزيدەنت سايلاۋىنا ۇمىتكەر رەتىندە جسدپ ەلوردالىق فيليالىنىڭ باسشىسى نۇرلان اۋەسباەۆتىڭ كانديداتۋراسىن قولدادى. ناقتىراق ايتساق, پارتيا سەزىنە قاتىسقان 49-دەلەگاتتىڭ 48-ءى ن.اۋەسباەۆتىڭ كانديداتۋراسىن قولداعان.
«سەزد نۇرلان ساتىبالدى ۇلى اۋەسباەۆتى جالپىۇلتتىق سوتسيال-دەموكراتيالىق پارتياسىنان پرەزيدەنتتىككە كانديدات ەتىپ سايلاۋ تۋرالى شەشىم قابىلدادى», دەدى پارتيا توراعاسى اسحات راحىمجانوۆ.
نۇرلان اۋەسباەۆ 1957 جىلى تۋعان. تۇركىستان وبلىسىنىڭ تۋماسى, استانا تۇرعىنى. جوعارى ءبىلىمى بار, م.اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتىن بىتىرگەن, ۇزاق ۋاقىت جەرگىلىكتى اتقارۋشى ورگانداردا جاۋاپتى لاۋازىمداردا جۇمىس ىستەگەن.
پارتيا سەزىندە ن.اۋەسباەۆتان بولەك تاعى ءتورت ادامنىڭ كانديداتۋراسى تالقىعا تۇسكەن. ولاردىڭ قاتارىندا, وپپوزيتسيالىق ساياساتكەر جاسارال قۋانىشالين مەن بۇرىنعى سەناتور ءۋاليحان قايساروۆ تا بار. الايدا سەزد دەلەگاتتارى ەكى ساياساتكەردىڭ دە پارتياعا ەشقانداي قاتىسى جوق ەكەنىن العا تارتىپ, كانديداتۋرالارىن قولداۋدان باس تارتتى. جسدپ-نىڭ پاۆلودار وبلىسىنداعى بولىمشەسىنىڭ توراعاسى اجار ساعىندىقوۆانىڭ ايتۋىنشا, كەزەكتەن تىس پرەزيدەنت سايلاۋى جاريالانا سالىسىمەن بۇل ادامدار الەۋمەتتىك جەلىدەگى جەكە پاراقشالارىندا مالىمدەمە جاساپ, كەز كەلگەن رەسپۋبليكالىق قوعامدىق بىرلەستىكتەر مەن پارتيالاردىڭ اتىنان كانديداتۋرالارىن ۇسىنۋعا دايىن ەكەنىن مالىمدەگەن. «الايدا ساياسي دوداعا قاي پارتيانىڭ ارتىنان, نە ءۇشىن تۇسەتىنىن ايتقان جوق», دەيدى ا.ساعىندىقوۆا.
ال سەزدە سويلەگەن سوزىندە پرەزيدەنتتىكتەن ۇمىتكەر ن.اۋەسباەۆ قوعامدى وزگەرتۋ ءۇشىن ەڭ الدىمەن ءار ادام مەملەكەت الدىنداعى جاۋاپكەرشىلىگىن سەزىنىپ, وزگەرىستى وزىنەن باستاۋى كەرەك ەكەنىن ايتتى.
ايتا كەتەيىك, جالپىۇلتتىق سوتسيال-دەموكراتيالىق پارتياسى ەلىمىزدە وسى ۋاقىتقا دەيىن وتكەن ساياسي ناۋقاندار كەزىندە مۇنداي بەلسەندىلىك تانىتپاعان بولاتىن. «الداعى كەزەكتەن تىس سايلاۋعا قاتىسۋعا نە تۇرتكى بولدى؟», «بۇل سايلاۋدىڭ ەرەكشەلىگى نەدە؟» دەگەن سۇراقتارعا پارتيانىڭ بەلسەندى مۇشەسى تازابەك سامبەتباي: «بۇرىن ەلىمىزدە سۋپەرپرەزيدەنتتىك جۇيە بولعانىن ءبارىمىز بىلەمىز. قازىر قازاقستاندا شىنايى باسەكەگە از دا بولسا جول اشىلدى. الەمدەگى سان قۇبىلعان گەوساياسي جاعدايعا ءبارىمىز كۋا بولىپ وتىرمىز. وسىنداي سىندارلى ساتتە ەلىمىزدىڭ ماڭىزدى ساياسي ناۋقانىنان شەت قالماۋ قاجەت. سەبەبى پرەزيدەنت سايلاۋى – تۇتاس ەلدىڭ تاعدىرىنا جاۋاپتى كەزەڭ», دەپ جاۋاپ بەردى. پارتيانىڭ الماتى قالالىق بولىمشەسىنىڭ باسشىسى ت.سامبەتبايدىڭ ايتۋىنشا, قازىر بۇكىل قوعام, قازاقستان ۇلكەن وزگەرىستەردى باسىنان وتكەرۋدە.
2007 جىلى رەسمي تىركەلگەن جالپىۇلتتىق سوتسيال-دەموكراتيالىق پارتياسى 2015 جانە 2019 جىلى وتكەن پرەزيدەنت سايلاۋلارىنا بويكوت جاريالاعان ەدى. ساياسي ۇيىم 2021 جىلى وتكەن پارلامەنت سايلاۋىنا دا قاتىسقان جوق.
