بۇگىن VII استانا ەكونوميكالىق فورۋمى ءوز جۇمىسىن باستادى
جىل سايىن استانا قالاسىندا ەلباسى نۇرسۇلتان نازارباەۆتىڭ باستاماسىمەن جاھاندىق ەكونوميكالىق فورۋم وتكىزۋ داستۇرگە اينالدى. مىنە, بيىل جەتىنشى رەت وتكىزىلگەلى وتىرعان استانا ەكونوميكالىق فورۋمىنا الەمنىڭ 139 مەملەكەتتەرىنەن بەدەلدى ساراپشىلار, بەلگىلى ساياساتكەرلەر, ەكونوميكا عىلىمىنىڭ كوشباسشىلارى قاتىسۋدا. بيىلعى استانا ەكونوميكالىق فورۋمىنىڭ باستى ەرەكشەلىگى, G-Global اقپاراتتىق كوممۋنيكاتيۆتىك الاڭى نەگىزىندە بەلگىلەنگەن الەمدىك داعدارىسقا قارسى جوسپار تۇجىرىمداماسى قابىلدانباق.
ۇستىمىزدەگى جىلدىڭ ءساۋىر ايىندا وتكەن قازاقستان حالقى اسسامبلەياسىنىڭ ءححى سەسسياسىندا مەملەكەت باسشىسى نۇرسۇلتان نازارباەۆ ءبىزدىڭ ەلىمىزدىڭ باستاماسىمەن ومىرگە كەلگەن G-Global يدەياسىنىڭ ماڭىزدىلىعىن تاعى دا اتاپ كورسەتتى. «جاھاندىق ساياساتتاعى قازىرگى جاعداي – الەم قۇرىلىسىنىڭ كوپقىرلىلىق جاعىنا قاراي اۋىسۋ پاراديگمالارىنىڭ درامالىق اكتىسى. بۇل تۋرالى مەن العاش رەت G-Global باستاماسىن ىلگەرىلەتە وتىرىپ, 2012 جىلى-اق ايتقان بولاتىنمىن. مەن ەگەر حالىقارالىق قۇقىقتا, سىرتقى ساياسي پراكتيكادا, مەملەكەتارالىق قاتىناستار تاسىلدەرىندە تەرەڭ وزگەرىستەر جۇزەگە اسار بولسا, قازىرگى جاھاندىق سىن-قاتەرلەر ەڭسەرىلەدى دەپ ەسەپتەيمىن. سوندىقتان ءبىزدىڭ G-Global قاعيداتتارى تۋرالى ۇسىنىستارىمىز الەمدىك قوعامداستىققا قاي كەزدەگىدەن دە پايدالى. مەن ولاردىڭ الەمنىڭ دامۋىنا قازىرگىدەي بەي-بەرەكەت ەمەس, سىندارلى سيپات بەرۋگە قابىلەتتى ەكەنىنە سەنىمدىمىن. اسسامبلەيانىڭ باي حالىقارالىق بايلانىستارى بار. مەن بارلىعىڭىزدىڭ G-Global يدەياسىن ىلگەرىلەتۋ ءۇشىن وزدەرىڭىزدىڭ حالىقارالىق بايلانىستارىڭىزدى پايدالانۋعا شاقىرامىن», دەدى مەملەكەت باسشىسى ءوز سوزىندە.
ەلباسى الەمگە بۇرىن-سوڭدى بالاماسى بولماعان حالىقارالىق جاڭا ۇنقاتىسۋ الاڭى – G-Global-دى ۇسىندى. بۇل G8 جانە G20 الاڭدارىنىڭ بالاماسى ەمەس. بۇل قوسىمشا جاھاندىق ۇنقاتىسۋ الاڭى. اتاپ ايتقاندا, الەمدىك ساراپشىلارعا جاھاندىق ەكونوميكا ماسەلەلەرى بويىنشا ينتەراكتيۆتى, اشىق جانە ايقىن پىكىرتالاستار وتكىزۋگە جان-جاقتى جاعداي جاسالعان الاڭ. بۇگىندە G-Global پلاتفورماسىنىڭ قاتىسۋشىلارى قاتارىندا الەمنىڭ 190 مەملەكەتىنەن 4 ميلليوننان استام ادام بار. 40 ميلليوننان استام ينتەرنەت-رەسۋرستارعا مونيتورينگ جۇرگىزەتىن Alexa.com ستاتاگەنتتىگىنىڭ دەرەگى بويىنشا, G-Global ءبىزدىڭ پلانەتامىزداعى ادامدار وتە كوپ كىرەتىن 25 مىڭ سايتتىڭ قۇرامىنا كىرەدى.
G-Global اقپاراتتىق-كوممۋنيكاتيۆتىك پىكىر الىسۋ الاڭىنا دۇنيەجۇزىنىڭ عالىمدارى, ساياساتكەرلەرى جانە قوعامدىق قايراتكەرلەرى جوعارى باعا بەردى. وسى جاڭا G-Global ۇنقاتىسۋ الاڭىنىڭ ارقاسىندا كوپتەگەن ساراپشىلار بۇگىنگى كۇننىڭ ەڭ ماڭىزدى قۇجاتى – الەمدىك داعدارىسقا قارسى جوسپار تۇجىرىمداماسىن تالقىلاۋعا مۇمكىندىك الدى. VII استانا ەكونوميكالىق فورۋمىنىڭ جانە ءىى بۇكىلالەمدىك داعدارىسقا قارسى كونفەرەنتسيانىڭ نەگىزگى قورىتىندىسى دا وسى ماڭىزدى قۇجاتتى قابىلداۋ بولىپ تابىلادى.
الەمدىك داعدارىسقا قارسى جوسپار تۇجىرىمداماسى (ادقجت) وتكەن جىلعى VI استانا ەكونوميكالىق فورۋمىنىڭ شەڭبەرىندە بۇۇ باس اسسامبلەياسىنىڭ جانە سول كەزەڭدە G20-عا توراعالىق ەتكەن رەسەي فەدەراتسياسىنىڭ كومەگىمەن ءى بۇكىلالەمدىك داعدارىسقا قارسى كونفەرەنتسيادا بەلگىلەنگەن بولاتىن. بۇل قۇجات – ۇكىمەتتەردىڭ, ورتالىق بانكتەردىڭ, حالىقارالىق دامۋ ينستيتۋتتارىنىڭ, الەمگە بەلگىلى عالىمدار مەن ساراپشىلاردىڭ, سونىمەن بىرگە جاھاندىق ازاماتتىق قاۋىمداستىقتىڭ بىرلەسە اتقارعان وراسان زور ەڭبەگىنىڭ جەمىسى.
الەمدىك ەكونوميكانى ساۋىقتىرۋ جونىندە ۇسىنىلىپ وتىرعان كەشەندى شارالار – بۇل بۇگىن ورىن الىپ وتىرعان پروبلەمالاردى شەشۋدىڭ جانە الداعى ۋاقىتتا بولاتىن رەتسەسسيالاردىڭ الدىن الۋدىڭ عىلىمي نەگىزدەگى جولى بولىپ تابىلادى. ول نەگىزىنەن ۇزاق مەرزىمگە ارنالعان تۇراقتى ەكونوميكالىق ءوسىمدى قامتاماسىز ەتۋگە باعىتتالعان. سونىمەن بىرگە بۇل قۇجات جاھاندىق ساياساتتى ءتيىمدى ۇيلەستىرە وتىرىپ, جاڭا قارجى ارحيتەكتۋراسىن قۇرۋدى كوزدەيدى.
بۇۇ جانە حالىقارالىق دامۋ ينستيتۋتتارى ساراپشىلارىنىڭ بەرگەن باعاسى بويىنشا, ادقجت الەمنىڭ بارلىق مەملەكەتتەرىنىڭ ومىرلىك مۇددەلەرىنە سايكەس كەلەتىن ساپالى قۇجات بولىپ تابىلادى. ماسەلەن, ەۋروپا پارلامەنتىنىڭ سىرتقى ساياسات باس ديرەكتسياسىنىڭ حالىقارالىق ساۋدا دەپارتامەنتىنىڭ ساراپشىسى ر.بەنديني ادقج تۇجىرىمداماسىنىڭ الەۋمەتتىك سيپاتىنا ۇلكەن باعا بەردى. سونىمەن بىرگە ول بۇل قۇجاتتىڭ G20 توبىندا تالقىلاناتىن جاھاندىق ماسەلەلەردى ءتيىمدى شەشۋدەگى ماڭىزدى ءرولىن دە اتاپ كورسەتتى.
2014 جىلعى 2 مامىردا استانا قالاسىندا وتكەن ازيا دامۋ بانكىنىڭ 47-ءشى جىل سايىنعى كەڭەسىنىڭ وتىرىسى شەڭبەرىندە بولعان ءىى بۇكىلالەمدىك داعدارىسقا قارسى كونفەرەنتسيانىڭ ءبىرىنشى پلەنارلىق ءماجىلىسىندە الەمدىك داعدارىسقا قارسى جوسپار تۇجىرىمداماسىنىڭ جوباسى ماقۇلدانعان بولاتىن. وسى پلەنارلىق ماجىلىسكە قاتىسۋشى ازيا دامۋ بانكىنىڭ ۆيتسە-پرەزيدەنتى بيندۋ لوحاني بانكتىڭ باسقارۋشى كەڭەسىنىڭ اتىنان ادقجت-عا جوعارى باعا بەرىپ, بارىنشا قولداۋ كورسەتەتىندىگىن مالىمدەدى. سونىمەن بىرگە ول الەمدىك قاۋىمداستىقتى بۇل ماڭىزدى قۇجاتتى شۇعىل قابىلداۋعا شاقىردى.
ءى بۇكىلالەمدىك داعدارىسقا قارسى كونفەرەنتسيادا نەگىزى قالانعان الەمدىك داعدارىسقا قارسى جوسپار تۇجىرىمداماسىنىڭ جوباسىن تالقىلاۋعا ارنالعان از ۋاقىتتىڭ ىشىندە G-Global پلاتفورماسى 170 مەملەكەتتىڭ 1 ميلليوننان استام قاتىسۋشىلارىن بىرىكتىردى. وسى حالىقارالىق ۇنقاتىسۋ الاڭىندا 15 مىڭ بايانداما جانە زەرتتەۋ جۇمىستارى, 47 مىڭ ساراپتاما مەن پىكىر تالقىلاۋدان وتكىزىلدى. سونىمەن بىرگە الەمنىڭ تانىمال ساراپشىلارى مەن عالىمدارى قاتىسقان 370 بەينەكونفەرەنتسيا وتكىزىلدى. اتقارىلعان وسى جۇمىستىڭ قورىتىندىسى VII استانا ەكونوميكالىق فورۋمى جانە ءىى بۇكىلالەمدىك داعدارىسقا قارسى كونفەرەنتسيادا شىعارىلاتىن بولادى.
جالپى العاندا, استانا قالاسىندا وتەتىن وسى جاھاندىق فورۋم شەڭبەرىندە بۇۇ-نىڭ حالىقارالىق وتباسى ۇيىمى, حالىقارالىق ۆاليۋتا قورى, ميگراتسيا جونىندەگى حالىقارالىق ۇيىم, برەتتون-ۆۋدستى جاڭعىرتۋ جونىندەگى كوميتەت يۋنكتاد, بەو, ەقىۇ, مادريد كلۋبى, حالىقارالىق نوبەل سىيلىعىنىڭ قورى, دۇنيەجۇزىلىك ساۋدا ۇيىمى, بۇكىلالەمدىك ەنەرگەتيكالىق كەڭەس, بۇكىلالەمدىك كەدەن ۇيىمى سياقتى حالىقارالىق ۇيىمدار وزدەرىنىڭ ماڭىزدى شارالارىن وتكىزەتىن بولادى. VII استانا ەكونوميكالىق فورۋمى مەن ءىى بۇكىلالەمدىك داعدارىسقا قارسى كونفەرەنتسياسى جۇمىسىن Euronews, CBS. BBS/ ChinaEconomicNet, ChinaEconomicDaily, FssociatedPress, FinanzundWirtschaft سياقتى الەمگە بەلگىلى حالىقارالىق مەديا-اگەنتتىكتەر ناسيحاتتاماق.
اەف-2014 باسقوسۋىن ۇيىمداستىرۋشىلاردىڭ ءبىرى – «عالىمداردىڭ ەۋرازيالىق ەكونوميكالىق كلۋبى» قاۋىمداستىعىنىڭ مالىمدەۋى بويىنشا, الەمدىك ساياساتتىڭ, بيزنەستىڭ كوشباسشىلارى, ءىرى حالىقارالىق ۇيىمداردىڭ جانە ترانسۇلتتىق كومپانيالاردىڭ باسشىلارى, نوبەل سىيلىعىنىڭ لاۋرەاتتارى سياقتى 500-دەن استام VIP-قوناقتار فورۋم جۇمىسىنا قاتىساتىندىعىن ءبىلدىردى. قازىرگە دەيىن VII اەف جۇمىسىنا 10 مىڭنان استام, ونىڭ ىشىندە 3 مىڭعا جۋىق شەتەل دەلەگاتتارى قاتىسادى دەپ كۇتىلۋدە. ولاردىڭ قاتارىندا بۇۇ-عا مۇشە 139 مەملەكەتتىڭ وكىلدەرى بار. ءىى بۇكىلالەمدىك داعدارىسقا قارسى كونفەرەنتسيا شەڭبەرىندە 3 پانەلدىك سەسسيا جانە اشىق پىكىرتالاستارعا ارنالعان 2 باسقوسۋ وتكىزىلەدى. سونىمەن بىرگە قالىپتاسقان ءداستۇر بويىنشا قازاقستان رەسپۋبليكاسى پرەمەر-ءمينيسترىنىڭ قاتىسۋىمەن كوشباسشىلار ديالوگى وتەدى.
جىلقىباي جاعىپار ۇلى,
«ەگەمەن قازاقستان».
