تاراپتار كەلىسسوز بارىسىندا قازاقستان مەن بجكب اراسىنداعى بوسقىنداردىڭ, پانا ىزدەۋشىلەردىڭ قۇقىقتارىن قورعاۋ جانە ازاماتتىعى جوقتىقتى ودان ءارى بولدىرماۋ جونىندەگى ىنتىماقتاستىقتىڭ اعىمداعى ماسەلەلەرىن جانە كەلەشەكتەگى ءوزارا ءىس-قيمىل باعىتتارىن تالقىلادى.
«قازاقستاندا ازاماتتىعى جوق ادامدار سانىن ازايتۋ, بوسقىنداردى قورعاۋ جانە گۋمانيتارلىق كومەك كورسەتۋ جونىندە جۇمىستار جۇيەلى تۇردە جۇرگىزىلىپ كەلەدى. ءبىزدىڭ ەلىمىز بوسقىندار ماسەلەلەرى جونىندەگى جاھاندىق فورۋم اياسىندا قابىلداعان مىندەتتەمەلەردى دايەكتى تۇردە ورىنداپ كەلەدى, ول بجكب باسشىلىعى تاراپىنان باسقا ەلدەرگە وڭ ۇلگى رەتىندە اتاپ ءوتىلدى», دەپ اتاپ ءوتتى سەناتور ا.شاكىروۆ.
حانس شوددەر ىنتىماقتاستىقتىڭ اعىمداعى دەڭگەيىن جوعارى باعالادى جانە بۇۇ بجكب قازاقستان رەسپۋبليكاسىنا جاردەمدەسۋدى جالعاستىرا بەرۋگە دايىن ەكەنىن ءبىلدىردى. ول ازاماتتىعى جوق ادامداردىڭ سانىن قىسقارتۋ جونىندەگى ەلىمىزدىڭ جەتىستىكتەرىن اتاپ ءوتىپ, قازاقستان ءىس جۇزىندە وسى سالاداعى حالىقارالىق-قۇقىقتىق ەرەجەلەر تالاپتارىنىڭ 90%-ىن ىسكە اسىرىپ كەلە جاتقانىن جەتكىزدى.
كەزدەسۋ قورىتىندىسى بويىنشا قازاقستان مەن بۇۇ بجكب بوسقىنداردىڭ قۇقىقتارىن قورعاۋ سالاسىنداعى ىنتىماقتاستىقتى ودان ءارى نىعايتۋ تۋرالى ۋاعدالاستىققا قول جەتكىزدى.
كەزدەسۋگە كونستيتۋتسيالىق زاڭناما, سوت جۇيەسى جانە قۇقىق قورعاۋ ورگاندارى كوميتەتىنىڭ توراعاسى ۆلاديمير ۆولكوۆ تا قاتىستى.
